當時、希律王落手迫害教會中幾個人、
將刀殺嘵約翰嘅兄弟雅各。
見猶太人歡喜、又捉彼得添、個陣時、啱啱係除酵節日子。
已經捉倒、就困落監處、交過十六個兵看住佢、想喺逾越節後、拉佢出嚟百姓處。
彼得被困在監、但教會為佢懇切求上帝。
希律想拉佢出嚟、個晚彼得有兩條鐵鏈鎖住、瞓在兩個兵丁中間、看守嘅人、在監門外守住。
忽然間、主嘅使者企倒側邊、有光照住監房、佢𢬿手拍彼得身邊、叫醒佢話、快的起身、鐵鏈就喺佢手脫甩。
天使對佢話、束起你帶、著番你鞋、彼得就照噉樣做、天使又對佢話、摟番你件袍嚟跟從我。
佢就出去跟從、但唔知天使所做、係真嘅唔係、估係睇見異象呮。
已經過嘵監嘅第一第二座、行到通出城嘅鐵門、個度門自己打開、佢地出去行嘵一條街、天使即時離開佢。
彼得醒悟話、我如今果然知到主係打發佢嘅使者、救我出嘵希律手、與及猶太人嘅想望。
正在思想個時、就到約翰、又名叫馬可嘅母親馬利亞屋企、裏頭有好多人聚集祈禱。
彼得敲外便個度門、有個妹仔、名叫做羅大、出嚟打聽。
認得係彼得嘅聲、因好歡喜、連個度門都唔曾開、走入去話、彼得喺門外企處呀。
眾人對佢話、你發顛咩、個妹仔切實話、真係𡃉、眾人話、噉、必係佢嘅天使咯。
彼得不歇敲門、眾人開門見佢、就驚奇起嚟。
彼得擺手、令佢咪出聲、就將主點樣帶佢出監、話過佢地知、又話、你將呢的事、講過雅各共眾兄弟知、佢就去別處地方。
到天光、個的兵丁唔知彼得去邊處、就好驚慌。
希律搵彼得唔倒、就查問看守嘅兵丁、吩咐要殺佢地、後來離開猶太、落該撒利亞。
希律好惱推羅西頓嘅百姓、但呢兩個城嘅百姓、要倚賴王嘅地方、致得口糧、故此一心嚟到佢處、托王嘅內大臣伯拉士都求和。
希律立定日期、著番朝服、坐在位上、當面同佢地講。
個的百姓喓話、呢的係上帝嘅聲、唔係人嘅聲呀。
主嘅使者、因為希律唔歸榮上帝、即時攻擊佢、佢俾虫咬、噉就死嘵。
於是上帝嘅道、越發興旺廣闊。
巴拿巴共掃羅做完施捨嘅職事、就同埋約翰名叫馬可嘅、由耶路撒冷番嚟。