亞波羅喺哥林多個時、保羅經過上便嘅地方、到以弗所、遇著幾個門生、
就問佢地話、你信主之後、受過聖神未呢、佢地答話、我地都唔曾聽過有聖神呀。
保羅對佢地話、噉就你受乜野洗禮呢。答話、係約翰嘅洗禮。
但保羅話、約翰施悔改嘅洗禮、佢對百姓話、應該信後過我嚟嘅、即係基督呀。
個的眾人聞得、就奉主耶穌嘅名受洗禮、
保羅按手佢地上頭、聖神降臨佢地、眾人就噲講別國嘅土談、而且講先知嘅說話、
共計約有十二個。
保羅入去會堂、放膽嚟講、有三個月咁耐、𢬿上帝國嘅事、辯論及勸人。
有幾個硬頸唔肯信嘅、喺眾人面前、毀謗個的道、保羅噉就帶埋門生、離開佢地、日日在推喇奴嘅書院辯論。
噉樣、喺個處兩年、個的住在亞西亞嘅、唔論猶太人、希利尼人、都聞得主耶穌嘅道咯。
上帝用保羅嘅手、做少有嘅奇事、
至到由佢身上擺出手巾、或圍裙、擠落病人處、病就好、惡鬼亦出去。
個陣時、有的猶太人、到處遊行、係使邪術嘅、遇著惡鬼侵害之人、試喓起耶穌嘅名話、我倚賴保羅所講嘅耶穌、叫你出嚟。
有個猶太嘅祭司長、名叫士基瓦、七個仔都做呢件事。
個惡鬼答話、耶穌我知到、保羅我亦識得、但你地係乜人呢。
個一個被惡鬼所迷嘅人、就跳上佢地身、贏嘵佢、制伏佢、令佢赤身受傷、走出個間屋。
以弗所嘅猶太人、希利尼人、都知到呢件事、眾人驚慌、噉就主耶穌嘅名、好大顯著咯。
信道嘅、好多嚟認自己罪、將自己所做嘅事講出嚟。
又有平日行邪術嘅人、好多集埋佢嘅書、喺眾人面前燒嘵、計吓個的價錢、值得五萬銀。
噉樣、主嘅道越發大行、而且得勝。
已經做完呢的事、保羅打定主意、經過馬基頓、亞該亞、去耶路撒冷、又話、到耶路撒冷之後、我必見羅馬。
就打發服事佢嘅兩個人、即係提摩太、以拉都、去馬基頓處、獨自己暫留在亞西亞。
個陣時、因呢的道、好大震動。
因為有個打銀師傅、名叫底米丟、係整亞底米銀龕嘅、令做個樣工作嘅、得利都唔少。
就聚埋同行、兼相類嘅工人嚟話、列位呀、你知到我地由呢的工作發財、
呢個保羅、引誘迷惑眾人話、由人手所做嘅、唔係上帝、佢不獨在以弗所、就是在亞西亞全地、亦係噉講、你地睇見及聽聞哩。
噉樣、不獨我地生意危險、俾人輕忽、連大女神亞底米嘅殿、都噲冇嘵、而且亞西亞全地、與及天下所有奉事亞底米嘅威勢、都消散嘥。
眾人聞得噉樣、十分惱怒、喓話、以弗所嘅亞底米係大呀。
通城都擾亂起嚟、捉住保羅、同行嘅馬基頓人該猶、亞哩達古、同心擠擁入去戲園。
保羅想入眾百姓處、門生唔俾佢、
有幾個亞西亞嘅大官、共保羅做朋友嘅、都打發人勸佢、唔好輕身入去戲園。
眾人嘈吵、一人話一樣、因為會眾立亂、大半唔知為乜事聚集呀。
猶太人將亞力山大從眾人之中、推佢出去、亞力山大擺手、想訴明過百姓知。
眾人知到佢係猶太人、就同聲喓話、以弗所人嘅亞底米係大呀、噉樣大約一個時辰咁耐。
有個司書嘅官彈壓眾人話、以弗所人呀、乜誰唔知以弗所嘅城、服事大女神亞底米、由丟士所降臨嘅偶像呢。
呢的事、已經唔駁得倒、噉就你應該安靜、唔好咁浮躁嚹。
因此呢的人唔係偷殿嘅物件、唔係毀謗你嘅女神、你地竟然拉佢地到呢處。
倘若米丟合埋同手藝嘅人、共人有爭訟、自己有審判日期、有官府、等兩家告訴呀。
你地若問別樣事、可在合例嘅會嚟議定。
因為我地慌到為今日之擾亂被審問、冇說話解得呢的紛紛聚集呀。
噉樣講、就散嘵呢的聚會。