一到五旬節時、大眾門生、同心聚集一處。
忽然間自天有聲嚟、好似一陣猛風、充滿所坐嘅屋。
就見有的脷分開、好似火噉樣、止在佢地各人之上。
眾人得滿聖神、起首講別樣嘅話、係照依聖神賜過佢地講出嚟嘅。
個陣、有敬虔嘅猶太人、喺天下各國嚟嘅、住落耶路撒冷。
呢的聲一響、眾人聚集、各人聽見佢地照依自己嘅土談嚟講、噉就心亂起嚟。
大家驚慌見奇、相講話、呢的講嘅、豈唔係俱皆加利利人咩。
為乜聽佢說話、竟然係我地各人出世個處嘅土談呢。
有帕提亞人、米太人、以攔人、又居住米所波大米、猶太、伽帕多加、本都、亞西亞、弗呂家、旁非利亞、埃及、呂彼亞一帶、住近古利奈嘅。
又有喺羅馬嚟做客嘅、或猶太人、或進教嘅。
亦有革哩、及亞喇伯人、大家聽見佢𢬿我地土談、講出上帝嘅大作用。
噉就眾人見出奇、思疑起嚟、彼此相問、呢的係乜野意思呢。
有人譏笑話、呢的人飲醉新酒呮。
彼得共十一個使徒企處、大聲對佢地話、猶太人、及凡住在耶路撒冷嘅、你地應當知到、請聽我話。
呢的人、實在唔係醉、好似你估噉嘅、因為呢陣不過已時頭呮。
但呢的係先知約耳所講、收尾嘅日子、我𢬿我聖神施俾萬人、你仔女噲講未來嘅事、
年少嘅、要見異象、年老嘅、得夢報。
個的日子、我要𢬿我聖神、施俾我嘅僕婢、佢地就噲講未來嘅事。
我將來顯現奇事喺天上、異蹟喺地下、係血係火係雲煙。
在主大大顯現嘅日未到之先、熱頭變為黑暗、月光變成血。
但凡禀求主名嘅、是必得救。
以色列人呀、聽呢的說話、你地知到上帝𢬿拿撒勒人耶穌、做出大能奇事異蹟、喺你地之中、代耶穌立個憑據、指示你地𡃉。
呢個人、依上帝所定嘅主意、及預先嘅知見、被解出嚟、你地𢬿不義嘅手、捉佢釘死。
但係上帝放甩佢死嘅苦難、俾佢復生、因為佢不能被死拘束得住嘅。
大闢指耶穌噉話、我見主常在我面前、因佢係在我右邊、令我唔震動。
故此我心歡喜、我口讚美、而且我肉身葬後、重有指望。
因你唔留落我靈魂喺陰間、唔俾你聖者見廢壞。
你也曾𢬿生命嘅路指點我、你將來𢬿面各我、令我滿心歡喜。
列位兄弟呀、容我講明個先祖大闢過你聽、佢死嘵、又葬埋、佢嘅墳墓、至到今日重喺我地處。
大闢既然係先知、又知上帝也曾共佢發誓、話將來喺佢子孫之中、舉個基督、坐佢嘅位。
預先見到、講及基督嘅翻生話、佢嘅靈魂、唔留落在陰間、佢嘅肉身、唔至到廢壞。
呢個耶穌、上帝令佢翻生、我地眾人都做見證。
故此已經舉高佢喺上帝右邊、而且受嘵天父所應承嘅聖神、𢬿呢的嚟施賜.即係你所見所聞嘅。
因為大闢未曾上天、佢自己有話、主對我主話、你坐倒我右邊、
等到我𢬿你嘅仇敵、做你嘅腳踏凳。
故此以色列全家、要確實知到呢個耶穌、你所釘十字架上嘅、上帝已經立佢做主、做基督咯。
眾人聞得噉樣、就㓤親佢心、問彼得共別位使徒話、列位兄弟呀、我地應該做乜野呢。
彼得對佢地話、你地各人要悔改、奉耶穌基督嘅名、嚟受洗禮、令罪惡得赦、噉就你必受聖神恩賜咯。
因為所有應許嘅、都係屬你、與及你子孫、共凡遠處嘅人、即係主我嘅上帝所召嘅。
又𢬿好多說話嚟做證、勸佢地話、你要救自己出呢個邪惡世代呀。
歡喜接納佢說話嘅、就受洗禮、個日約莫添多三千人、
佢地都常受使徒嘅教訓、共交接、擘餅、祈禱。
眾人都敬畏佢地、而且使徒做好多奇事異蹟。
所有信嘅、同埋一處、共用各樣物件。
而且賣嘵產業、與及什物、照各人所需用嘅、嚟分過佢。
日日同心、喺殿聽候、及在家擘餅、歡喜誠心嚟食。
讚美上帝、眾百姓都歡喜佢、主𢬿得救嘅人、日日加多入會。