保羅定眼睇住公會就話列位兄弟呀、我平素𢬿良心、喺上帝之前嚟做人、至到今日。
噉就大祭司長亞拿尼、吩咐缽倒側邊嘅打佢口。
保羅對佢話、粉飾嘅牆呀、上帝要打你、你企倒處、當依住律法嚟審我、做乜違背律法、叫人打我呢。
企倒側邊嘅話、你{口閙}上帝嘅大祭司長咩。
保羅話、兄弟呀、我唔識得佢係大祭司長呀、因為聖書有寫、咪謗毀你百姓嘅官長。
保羅知大眾一半係{口撒}吐該人、一半係法利賽人、就喺公會中大聲叫話、列位兄弟呀、我係法利賽人、亦係法利賽人嘅仔、因為我望死者翻生、我受審問咯。
講出呢的法利賽人共{口撒}吐該人、爭論起嚟、眾人就分開。
因為{口撒}吐該人話冇翻生、冇天使共魂靈、但法利賽人話、兩樣都有。
眾人大嘈吵起嚟、法利賽之中嘅讀書人、起身爭論話、我地見呢個人冇惡、若係有魂靈、或有天使曾對佢講、我地就唔好共上帝相爭。
個陣時、好大爭競、千總怕保羅被眾人擘開、叫兵卒落嚟、喺眾人處奪番佢、帶佢入營盤。
個晚主企近保羅處話、保羅、安你嘅心、你已經喺耶路撒冷處證明我、亦必要喺羅馬處、照噉樣做證呀。
及至天光、有的猶太人同設計謀、誓起願話、若唔殺保羅、必定唔食唔飲。
同埋誓願嘅四十多人、
就嚟眾祭司長及長老處話、我地已經誓過大願、唔殺保羅、乜野都唔食。
如今你地共議事公會、請千總明日拉佢見你地、假意細問佢嘅情由、我地預備、趁佢唔曾到就殺佢。
保羅嘅外甥、聞得佢地有埋伏、就行入營中話保羅知。
保羅請一個百把總嚟話、帶呢個少年人到千總處、因為有事、告過佢知。
噉就帶佢去見千總話、個囚犯保羅求我帶呢個少年人見你、佢有事對你講。
千總拖住佢手、帶佢去僻靜之地、問佢話、有乜事告我知呢。
佢話、猶太人已經約定、求你明日拉保羅到公會假意有事、𢬿嚟詳細審問佢。
所以你唔好聽從佢地、因為其中有四十多人、埋伏嚟害保羅、自己誓願、唔殺保羅、就唔食唔飲、如今已經預備、單係等你應承呮。
噉就千總令少年人去、戒佢話、咪𢬿你對我講嘅事、話過別人知呀。
就叫兩個百把總嚟話、預備步兵二百、馬兵七十、揸長鎗嘅二百、今晚二更、就去該撒利亞。
又整定的牲口、俾過保羅騎、護送佢到總督腓力士處。
佢又寫一封文書噉樣話、
革老丟、呂西亞、請總督大人腓力士安。
呢個係猶太人、捉倒將近殺嘅、但我聞得佢係羅馬人、就帶兵去救佢。
及後我想知到猶太人告佢嘅緣故、就帶佢到佢地嘅公會。
我查得所告佢嘅、獨係辨論佢嘅律法呮、未曾有應死應綁嘅案情。
有人𢬿猶太人埋伏佢嚟話我知、故此我即時打發佢嚟你處、又吩咐告佢嘅、將所告嘅事話你知、願你平安。
兵丁遵依命令、即晚將保羅帶到安提帕底。
第二日、佢地使馬兵護送佢去、其餘就番歸營盤。
馬兵到該撒利亞處、將文書遞上總督、𢬿保羅企倒佢面前。
總督睇完、問明佢邊省嘅人、知到佢係屬基利家嘅、
就話、等告你嘅嚟、我致聽吓你所講、就吩咐在希律嘅王府看守住佢。