耶和華喺埃及地對摩西亞倫話。
呢個月必做你哋嘅正月、即係做你嘅年頭。
你要對以色列會眾話、呢個月初十日、各家長要為各家預備一隻羊仔。
若係個家人少、不能用嘥一隻、就共隔離嘅鄰舍同預備、照人嘅數目及食量嚟計羊仔。
你嘅羊仔必要冇瑕疵嘅羊公、未曾滿一年嘅、或要喺綿羊之中、或喺山羊之中揀擇、
你要留到本月十四日、等到挨晚、以色列會嘅眾人就劏羊仔。
都要擰個的血、搽在食羊仔個間屋嘅左右門枋、與及門楣。
個晚要食羊仔嘅肉、用火燒熟、共無酵餅苦茶同食。
生嘅、水煮嘅、都唔好食、必要連頭連髀及五臟、燒熟嚟食。
咪將剩下嘅留到明日、若有留到明日、必要用火焚燒。
你哋要噉樣食、腰間綁帶、腳上著鞋、手揸拐杖、又要急速食、個日就係耶和華嘅逾越節。
因為個晚我必喺埃及地周圍行、打死埃及嘅長子、及第一胎嘅畜牲、亦審問埃及嘅眾神、我係耶和華呀。
個的血在你所住嘅屋、為你哋做記號、我一見個的血、就逾越你哋去、我擊埃及地之時、災禍唔到你身上滅你。
你哋當要記念呢個日子定為節期、在耶和華面前謹守、世世代代守呢個節、永遠做定例。
七日之內、你哋要食無酵餅、頭一日、各家要除清有酵之物、因為頭一日至到第七日、凡食有酵餅嘅、必在以色列中被滅絕。
頭一日、你哋應當有聖會、到第七日亦應有聖會、呢兩日、除嘵預備各人所食之外、唔俾做工夫、獨係預備食物呮。
你哋當要守無酵節期、因為個日我帶你哋大眾出埃及地、故此你要世世代代謹守此日、永遠做定例。
從正月十四日個晚、至到二十一日個晚、你哋要食無酵餅。
七日之內、你哋各家唔好有酵、唔論做人客嘅、或本土人、凡食有酵之物嘅、必在以色列會中被滅絕。
有酵之物、你哋總唔好食、唔論住在邊處、必要食無酵餅。
摩西招以色列眾長老嚟、對佢哋話、你哋每家要揀擇一隻羊仔、劏嘵、做逾越節嘅羊仔。
都要𢬿一把牛膝草、擠落盤內嘅血浸濕、將血搽在門楣、與及左右嘅明枋、咪俾一個人出門口、等到天光。
因為耶和華必周圍行、打死埃及人、見有血在門楣、及左右門枋、耶和華必越過個度門、唔容行剿滅入你屋打死你。
你哋必要遵守此事、為你共子孫永遠做定例。
你哋已經到嘵耶和華照所應許就賜過你嘅地方、必要守此禮。
將來你哋子孫若問你、因乜事行呢樣禮。
你哋要答話、呢的係耶和華逾越節嘅祭、因耶和華打死埃及人之時、喺埃及地越過以色列人嘅屋、拯救我哋各家呀、百姓就噁低頭叩拜。
以色列人退出、遵依耶和華所吩咐摩西亞倫嘅嚟做。
到嘵半夜、耶和華打死凡埃及嘅長子、從坐王位嘅法老之長子、至到監中犯人嘅長子、與及第一胎嘅畜牲。
夜間法老共眾僕及埃及眾民都起身、埃及有好大喊聲、因為冇一家冇死人嘅。
夜間法老就召摩西亞倫話、起身出去、離開我嘅百姓之中、你共以色列人去服事耶和華、照你所講。
亦帶牛群羊群同去、照你所講、但都願你祝福我。
埃及眾人催逼以色列人急速出埃及、話、我哋眾人噲死咯。
百姓就擰無酵嘅生麵、搓麵嘅盤、已經共衣服包埋擠在膊上。
以色列人遵依摩西所講嚟做、向埃及人攞金銀嘅器皿、與及衣服。
耶和華令百姓喺埃及人面前得恩、埃及人都俾過佢哋、噉就奪嘵埃及人嘅嘢咯。
以色列人從蘭塞去到數割、除嘵細蚊仔之外、步行嘅壯年人、大約有六十萬。
有好多閒雜人同佢哋上去、亦有牛群羊群極多。
眾人將從埃及帶出嚟嘅無酵生麵、炕成無酵餅、因以色列人被趕逐出埃及、不能遲慢、又未曾預備乾糧呀。
以色列人喺埃及寄居、共四百三十年。
過嘵四百三十年、當個日、耶和華嘅眾軍由埃及地出嚟。
個晚、因帶佢哋出埃及地、故此要為耶和華謹守、稱為耶和華之夜、凡以色列子孫、都要世世代代謹守個晚。
耶和華對摩西亞倫話、逾越節嘅事例係噉、人客不可食。
但用銀所買嘅奴隸、你已經同佢行割禮嘅、個人就可以食。
人客及僱工嘅人、都不可食。
必要喺一間屋裏嚟食、咪擰的多肉出去屋外、亦咪整斷一條骨。
以色列會眾人、俱要守此節。
若有人客在你哋處寄居嘅、想為耶和華守逾越節、佢所有嘅男人、必要受割禮、然後可以同守、就好似本土人一樣、但未曾受割禮嘅、必不可食。
本土人與及人客在你哋處寄居嘅、都要同此例。
以色列人遵依耶和華所吩咐摩西亞倫嘅、都噉樣做。
當個日、耶和華將以色列人、依住軍旅、帶佢哋出嘵埃及地。