個時摩西共以色列人唱此歌讚美耶和華話、至高至大嘅耶和華、我要歌頌佢、因佢將馬共馬兵𢫕落海中。
耶和華係我嘅能力、我所歌頌、做我嘅拯救、佢係我嘅神、我要讚美佢、又係我父嘅神、我要尊榮佢。
耶和華乃係威武、佢名稱為耶和華。
將法老嘅馬車及佢嘅軍兵、𢫕落海中、法老所揀擇嘅兵頭、亦被沈在紅海。
大水遮蓋佢哋、好似石沉海底。
耶和華呀、你右手用力顯出榮顯、耶和華呀、你右手打破仇敵。
你用大威嚴、剿滅背逆你嘅、你發大怒燒壞佢、好似乾草一樣。
你用鼻氣聚埋海水、令波浪企立、好似土堆、喺海心之中凝結。
仇敵話、我要追倒、我要分開搶奪嘅嘢、心中滿足、拔出刀劍、用手殺戮。
你令大風吹起、海水遮蓋仇敵、佢哋好似錫沉落大水。
耶和華呀、眾神之中、乜誰似得你呢、乜誰似你由聖潔得榮耀、由歌頌顯威嚴、行各樣奇事。
你伸出右手、地就吞佢哋。
你用仁慈、帶你所贖嘅百姓、又用能力、帶佢哋入你聖殿。
列國聽聞、無不畏懼、住在非利士嘅、亦見苦楚。
以東嘅侯伯都懼怕、摩押嘅英雄都打震、迦南嘅百姓亦失驚。
大眾都驚慌、因你手臂嘅大能、佢哋好似石頭咁靜、等待你百姓過去、等待你所得嘅百姓過去。
你必帶佢哋入你產業嘅山、喺個處栽培佢哋、耶和華呀、即係你自己所預備嘅住所、耶和華呀、即係你手所起嘅聖殿。
耶和華必掌大權、至到永遠。
因為法老嘅馬與及馬車馬兵、趕入海中、惟係耶和華𢬿海水沈嘵佢哋、獨係以色列人喺海中嘅旱地行去。
個時、有亞倫嘅大姊、先知米哩暗、手揸住鼓、各女人亦揸住鼓、跟從佢跳舞。
米哩暗唱詩答佢哋話、至高至大嘅耶和華、我要歌頌佢、因佢將馬及馬兵、都𢫕落海中。
摩西帶以色列人由紅海去書耳曠野、在曠野行嘵三日、唔見水。
去到馬刺、不能飲馬刺嘅水、因個的水係苦嘅、故此叫個笪做馬刺。
百姓怨恨摩西話、我哋飲乜嘢呢。
摩西求耶和華、耶和華𢬿一樖樹指示佢、摩西就𢫕的木落水、水就變為甜、耶和華喺個處為佢哋立律例、又喺個處試驗佢哋話。
你哋若係謹慎聽從你神耶和華嘅說話、行佢所歡喜嘅、聽從佢誡命、謹守佢律法、我就必唔𢬿降落埃及人嘅疾病、降過你哋、因我耶和華係醫你哋嘅呀。
眾人去到以林、即係有十二個口井、七十樖棗樹、就喺個笪水邊安營。