1
以色列會眾遵從耶和華所吩咐嘅路程、由汛嘅曠野起行、去到哩非停安營、百姓冇水飲。
2
故此向摩西爭鬧話、俾水過我哋飲喇、摩西對佢哋話、為乜向我爭鬧呢、為乜試耶和華呢。
3
百姓喺個處好頸渴、就怨恨摩西話、你做乜帶我哋出埃及、令我共仔女及畜牲都渴死呢。
4
摩西求耶和華話、我向百姓要點樣做呢、佢哋爭的想𢬿石矴我咯。
5
耶和華對摩西話、你手要揸住從前打河嘅拐杖、帶住以色列長老中幾個人、在百姓前頭行。
6
睇吖、我必喺何烈山嘅磐石上、對住你企立、你打磐石、必有水流出、俾百姓飲、摩西在以色列長老面前噉樣做。
7
因以色列人嘅爭鬧、又因佢哋試耶和華話、耶和華係在我哋之中唔係呢、故此摩西稱個處做馬撒、又叫做米利巴。
8
個時、亞馬力人嚟、喺哩非停共以色列人打仗。
9
摩西對約書亞話、你為我哋揀擇人、出去共亞馬力人打仗、明日、我手揸住神嘅拐杖、企在山頂。
10
約書亞照依摩西所講嚟做、共亞馬力人打仗、摩西、亞倫、戶耳、同上山頂。
11
摩西舉手、就以色列人打贏、摩西垂手、就亞馬力人打贏。
12
摩西手癐、故此𢬿石擠落佢身下、等佢坐處、亞倫、戶耳、一個喺左便、一個喺右便、扶住摩西嘅手、等佢手唔搖擺、至到熱頭落個時。
13
約書亞用刀打敗亞馬力人王共佢嘅百姓。
14
耶和華對摩西話、我要在天下之內除滅亞馬力人嘅名、你當寫落書中嚟做記念、又讀過約書亞聽。
15
摩西起個壇、改佢名叫做耶和華尼西、
16
意思話、因亞馬力人攻打耶和華嘅座位、故此耶和華世世都要共佢打仗呀。