耶和華對摩西話、你要琢成兩塊石碑、好似先時嘅一樣、你所𢫕爛個兩塊石碑上嘅說話、我要再寫落此碑。
明日朝早、你要預備上西乃山、喺山頂處、企在我面前。
別人唔好共你同上去、山嘅四圍、亦唔好有人、牛群羊群、都唔好喺山前餵養。
摩西就琢成兩塊石碑、好似先時嘅一樣、明日好早起身、照依耶和華所吩咐嘅上西乃山、手揸兩塊石碑。
耶和華在雲中降臨、同摩西企落個處、自己傳揚耶和華嘅名。
耶和華經過摩西面前、傳揚話、耶和華、耶和華、係慈悲、大施恩典、係容忍、大有憐憫、與及真實嘅神。
施恩過人至到千代、赦免愆尤、過失、罪惡、惟係常時行惡嘅斷唔肯赦佢無罪、罰父嘅罪與及子孫、至到三四代。
摩西急的屈身敬拜。
話、主呀、如今我若喺你面前得恩典、就求我主同我哋去、因為呢的百姓係板頸嘅、求你赦免我哋嘅愆尤罪惡、接我哋做你嘅子民。
耶和華話、我如今立約要喺你嘅百姓面前行奇事、係天下萬國所未曾有嘅、而且你在其中嘅百姓、必見耶和華所行、因我向你所行嘅、係可驚懼嘅事。
你要守我今日所吩咐嘅、睇吖、我趕逐亞摩哩人、迦南人、赫人、比哩洗人、希未人、耶布士人、離開你嘅面前。
你要謹慎、唔好共你所去之地嘅居民立約、恐怕佢喺你哋之中、做引誘機檻。
惟你要拆爛佢嘅壇、毀壞佢嘅偶像、斬斷佢嘅木柱。
你不可拜別神、因為耶和華嘅名叫做妒忌、佢係妒忌嘅神。
恐怕你共個處地方嘅居民立約、佢哋妄從佢哋嘅神、又獻祭佢哋嘅神、就叫你、你就食佢哋嘅祭物。
又恐怕你為個仔娶佢哋嘅女、個女就妄從佢哋嘅神、亦令你個仔妄從佢哋嘅神。
你不可為自己鑄各樣神像。
你要喺亞筆月內、照依所定嘅日期守無酵餅嘅節筵、七日之內、要遵依我嘅吩咐、食無酵餅、因亞筆月係你哋出埃及嘅時候呀。
凡初胎嘅都歸我、你畜牲嘅初胎、唔論牛共羊公嘅都要歸我。
惟係第一胎嘅驢、必要𢬿羔羊代贖、若唔代贖、就要砍斷驢頸、你初生嘅眾子、要代贖佢、凡到我面前朝見嘅、唔好空手嚟到。
六日之內、你要做工夫、惟到第七日、就要安息、當耕種收割嘅時候、亦要安息。
麥初結實之時、你要守七個七節筵、年尾之時、要守收割節筵。
你哋眾男人、每年三次、要朝見主、即係耶和華以色列嘅神。
因為我必趕逐列邦人離開你面前、令你嘅地界寬闊、你每年三次上去朝見你神耶和華之時、必冇人想佔你嘅地方。
畜牲嘅血、不可共酵餅同埋獻祭、逾越節筵嘅祭物、唔好留到明日。
你田間初結實之物、要擰入你神耶和華嘅殿、又不可用羔羊母嘅奶嚟煮羔羊。
耶和華對摩西話、你要寫落呢的說話、因我依呢的說話嘅意思、共你及以色列人立約。
摩西共耶和華喺個處四十日四十夜、唔食餅、唔飲水、將立約嘅說話寫落碑上、即係十誡。
摩西從西乃山落嚟、手揸兩塊證詞石碑、摩西落山個時、自己唔知自從共神講之後、面皮都發光。
亞倫共以色列眾人、睇見摩西嘅面皮發光、就畏懼唔敢近佢。
摩西叫佢哋嚟、亞倫就共會中嘅牧伯、都行埋摩西處、摩西共佢哋講。
後來眾以色列人就行近前、摩西𢬿耶和華在西乃山共自己所講嘅、都吩咐佢哋。
摩西用巾遮住面、等待講完。
摩西入到耶和華面前、共神講、就揭開面巾、等到出嚟、既出、就𢬿神吩咐嘅對以色列人講。
以色列人見摩西面、覺得摩西嘅面皮發光、摩西再用巾遮住面、至到入去共神講。