耶和華對摩西話、睇吖、我使你向法老替代神、你大佬亞倫就做你嘅先知。
凡我吩咐你嘅、你必要講出嚟、你大佬亞倫必要對法老講、等佢釋放以色列人出佢嘅境界。
我必剛愎法老嘅心、亦必喺埃及地行好多奇跡。
但法老必唔聽從你、至到我喺埃及動手、行大刑罰嚟帶我軍旅、即係我嘅百姓以色列人、出埃及地。
我舉手攻擊埃及人、帶以色列人從佢哋之中出嚟之時、埃及人就必知我係耶和華。
摩西亞倫就照依耶和華所吩咐嚟行。
對法老講個時、摩西已經八十歲、亞倫八十三歲。
耶和華對摩西亞倫話。
法老若對你話、你行奇跡我睇、你要對亞倫話、𢬿你拐杖𢫕落法老面前、等拐杖變為蛇。
摩西亞倫入去見法老、遵依耶和華所吩咐嚟做、亞倫喺法老及佢眾僕人面前、𢫕拐杖落地、就變為蛇。
法老亦召埃及嘅聰明人、巫者、即係埃及嘅博士、佢哋用邪術嚟做呢的事。
各人𢫕佢嘅拐杖、俱變為蛇、惟係亞倫嘅拐杖、舌嘵佢哋嘅拐杖。
但法老嘅心好硬、唔聽從佢、好似耶和華所講。
耶和華對摩西話、法老頑梗、唔肯放百姓去。
明朝、你去法老處、佢必出到河邊、你企在河邊、手揸從前變蛇嘅拐杖嚟等佢。
你要對佢話、希伯來人嘅神耶和華、打發我嚟見你、話、放我百姓去、等佢哋喺曠野服事我、向來你唔肯聽從。
耶和華噉話、因此事、你必知到我係耶和華、睇吖、我就𢬿手揸嘅拐杖嚟打河水、水必變為血。
河中嘅魚必死、個河腥臭、埃及人憎厭飲河中嘅水。
耶和華對摩西話、你要對亞倫話、擰你拐杖、伸開手指住埃及所有嘅水、即係江、河、池、及各水塘、令變為血、等埃及通國木石器皿裏都有血。
摩西亞倫照依耶和華所吩咐嚟做、當法老及眾臣面前舉起拐杖打河水、河水就變為嘥血。
河中嘅魚死嘵、河就腥臭、埃及人不能飲河裏嘅水、埃及通國都有血。
埃及嘅博士、用邪術亦照樣嚟做、法老嘅心、仍然剛硬、唔肯聽從、好似耶和華所講。
法老番入宮、亦唔挂念呢件事。
埃及人因河水不能飲、故此跟住河邊、掘地搵水，
耶和華打河之後、滿嘵七日。