上古之時、上帝創造天地。
地係空虛蒙混、淵上黑暗、上帝嘅神、運行水面。
上帝話、應該有光、噉就有光、
上帝見光係好、就分開光暗。
上帝叫個的光為晝、叫個的暗為夜、有晚有朝、係第一日。
上帝話、水中應有穹蒼、嚟分開上下嘅水、
就作出穹蒼、令穹蒼以上、共穹蒼以下嘅水、伶俐分開、於是照噉樣。
上帝叫穹蒼為天、有晚有朝、係第二日。
上帝話、天下嘅水、應該聚集埋一處、等個乾土現出、於是就照噉樣。
上帝叫乾土為地、叫水聚之處為海、上帝見噉係好、
上帝話、地要生出的結子嘅青草蔬菜、樹生果、果包核、各樣依番種類、於是就照噉樣。
地就生出的結子嘅青草蔬菜、樹生果、果包核、各樣依番種類、上帝見噉係好。
有晚有朝、係第三日。
上帝話、天上應有眾光、等分開晝夜、嚟定四時年日嘅記號。
與及由天上照住地面、於是就照噉樣。
上帝作出兩個大光、大嘅管理晝、細嘅管理夜、又作出眾星。
上帝將個三光擠在天上、嚟照住地面。
等佢又管理晝夜、分開光暗、上帝見噉係好。
有晚有朝、係第四日。
上帝又話、水要生出各樣生物、又要地上有雀鳥、飛在空中。
噉就造出大魚共水中所生嘅各樣生物、與及雀鳥、每樣依番種類、上帝見噉係好。
就祝福各物話、生長日多、充滿海中、飛鳥亦多生地上。
有晚有朝、係第五日。
上帝話、地上應該生出各樣生物、即如六畜昆蟲野獸、各樣都依番種類、於是就照噉樣。
上帝造出野獸六畜昆蟲各樣都依番種類、上帝見噉係好。
上帝話、應該照依我地嘅形像嚟造出人、等佢管理海中嘅魚、共空中飛鳥、與及六畜、亦管理個地、及躝地嘅昆蟲。
上帝就依自己嘅像造人、造出嚟、學番上帝噉樣、而且造出一男一女。
上帝又祝福佢話、生養眾多、充滿地上、而且管理佢、又管理海內之魚1空中飛鳥、及地上各樣生物。
上帝話、全地結子嘅蔬菜、共有核嘅果子、我賜過你做食物。
至於地上野獸、空中飛鳥、及各樣躝地嘅生物、我賜青草佢做食物、於是就照噉樣。
上帝見所造嘅物樣樣盡善、有晚有朝、係第六日。