雅各喺迦南居住、即係佢父親寄居嘅地方。
雅各嘅紀略、開列在左、約瑟十七歲個時、同埋眾兄弟看羊、佢仍屬係童子、共父親嘅妾待辟拉息帕嘅仔在一處、佢地有過、約瑟就話父親知。
以色列老年、致生約瑟、所以愛約瑟勝過愛眾子、為佢做一件花衫。
眾兄弟見父親愛約瑟勝過自己、就憎約瑟、唔共佢講和好嘅說話。
約瑟發一個夢、講過眾兄弟知、所以越發憎佢。
約瑟話、請聽我所發嘅夢吖、
我地喺田扎禾、我所扎嘅禾、企立起嚟、你地所扎嘅禾、圍住我個扎嚟拜。
眾兄弟對佢話、你是必做我王上咩、是必管理我地咩、佢地因佢嘅夢、與及佢說話、越發憎佢。
後來約瑟又發一個夢、講過兄弟知話、我又夢見日月兼十一粒星、都跪倒處拜我。
佢𢬿呢個夢、對住父兄講之時、佢父親責成佢話、你所夢嘅、係乜野呢、唔通我共你母親、與及你眾兄弟、都要跪倒地拜你咩。
眾兄弟妒忌佢、惟係父親記住佢嘅說話。
後來眾兄弟去示劍、為父親看養畜牲。
以色列對約瑟話、你眾兄弟在示劍看養畜牲、你嚟、我使你去佢地處。約瑟話、我喺呢處。
以色列話、你去睇吓你眾兄弟與及畜牲、平安唔平安、番嚟話我知、於是打發佢出希伯崙谷、去示劍。
佢喺田間迷失路、有人遇著佢、問佢話、你搵乜誰。
佢話、我搵眾兄弟、請話我知、佢喺邊處看畜牲吖。
個人話、佢地已經離開呢處哩、我聽聞佢地話、要去多丹、於是約瑟去搵佢兄弟、果實喺多丹遇著。
未曾行近之時、眾兄弟隔遠望見、大眾同謀殺佢。
彼此相講話、個發夢嘅嚟嚹。
不如我地殺佢、𢫕佢落井、就話惡獸食嘵、睇佢嘅夢有乜應驗。
流便聽聞、要救佢出眾人嘅手、就話、我地唔好殺佢。
又話、唔好流佢嘅血、唔使落手害佢、但𢫕佢落呢處野地嘅井、就得哩。流便嘅意思係想殺佢出眾人之手、嚟送番過父親。
約瑟嚟到眾兄弟處、佢地就剝佢所著個件花衫、
將佢擠落井裏、個井係乾嘅、冇水嘅。
佢地就坐處食飯、舉眼睇見一隊以實馬利人、從基列嚟𢬿駱駝馱住香料乳香沒藥、想去埃及嘅。
猶大對兄弟話、殺嘵細佬、藏埋佢血、有乜益呢。
佢係我地嘅兄弟、我地嘅骨肉、唔好落手害佢命、不如賣佢過以實馬利人罷哩、眾弟就聽從佢。
啱啱有米田嘅商人經過、眾兄弟喺井拉約瑟出嚟、賣過以實馬利人、得二十個銀錢、個商人就帶約瑟去埃及。
流便去到井邊、見約瑟唔在井裏、自己就擘爛衣服、
番去兄弟處話、個童子唔喺處、叫我點去歸呢。
眾兄弟就劏一佣山羊仔、攞約瑟件衫、染的血落去、
叫人拈個件花衫番去父親處話、我地執倒呢的、試睇吓係你仔嘅衫唔係。
佢父親認得、就話、係我仔嘅衫呀、一定惡獸食佢、約瑟是必被咬碎咯。
雅各擘爛自己嘅衣服、拈粗麻布束住條腰、為個仔喊嘵好多日。
眾子女都嚟安慰佢、父親唔受佢地安慰話、我必喊到落陰府、見嘵我仔致得、於是父親就為佢痛哭。
米田人帶約瑟去埃及、賣過法老嘅臣子、即係領侍衛大臣波提乏。