迦南飢荒、越甚起嚟。
喺埃及載番嚟嘅穀、已經食嘥咯、雅各對眾子話、再去替我糶的穀番嚟喇。
猶大話、個個人好嚴令叮囑我地話、倘若你地唔帶我個細仔嚟就唔准你見我面。
倘若父親使個細佬同我去、我地就替你落去糶穀。
唔使佢去、我地就唔落去、因為個人對我地話、設使你唔帶個細佬嚟、就唔准見我面。
以色列話、做乜你地對個人話、重有個細佬呢、噉樣、係害害咯。
佢地話、個人好詳細問我家中話、你父親重在生唔呢、重有兄弟冇呢、我地就照直講佢知、點估到佢必話、要帶個細佬嚟呢。
猶大又對父親以色列話、使個細佬同我去、我地即起行、噉就你共我地、及我地嘅子女、都可以得生、免致死亡。
我情願擔保你、你惟我手是問、倘若唔帶佢番嚟、交番你面前、我就永遠都係受罪、
我地設使唔係咁阻滯、如今都第二次番嚟咯。
以色列對佢地話、既然要噉、就照呢樣行喇、將呢處嘅好土產、載落器皿處、即係乳香、蜜糖、與及香料沒藥、榧子、杏仁、帶去送過個人做禮物。
又擰雙倍嘅銀去、個的喺袋裏帶番嚟嘅銀亦送番去、恐怕係有差錯呀。
又帶你細佬去、再見個個人。
願全能嘅上帝、令你地得個人嘅憐憫、使你個個兄弟同便雅憫番歸、若要喪失我嘅仔、就喪失喇。
於是佢地擰齊禮物、共雙倍嘅銀、兼便雅憫就起程、落去埃及、企倒約瑟面前。
約瑟見便雅憫同埋嚟、就對個管家話、帶呢的人入家中、又劏定的牲口、到晏晝時呢的人要共我食。
管家依佢吩咐、帶個的人入約瑟家中。
個的人見帶佢入約瑟嘅家、就慌起嚟、相講話、必係因先日袋裏嘅銀、故此引我地入嚟呢處、想藉端攻擊我地、執我地做奴隸、搶我地嘅驢呀。
於是喺門口對約瑟嘅管家話、
主呀、先日我地落嚟糶穀、
番歸入歇店之時、打開的袋、見各人嘅銀、照數喺處、如今我地擰番嚟。
另外人又擰銀嚟糶穀、實情唔知乜誰擠銀落我地袋呀。
個管家話、你放心囉、唔使慌、你嘅上帝、與及你父親嘅上帝、將財寶賜在你袋處、你地嘅銀、我已經收嘵咯、於是帶西面出嚟見眾兄弟。
管家就帶佢地入約瑟嘅家、俾水佢地洗腳、而且餵佢地嘅驢。
眾兄弟預備禮物、等候約瑟晏晝番嚟、因為聽見佢喺呢處食餐呀。
約瑟歸家個時、兄弟擰住禮物入去、俯伏在地拜佢。
約瑟問安話、你先日所講嘅老父親、如今好吖、重在生咩。
佢地答話、你僕嘅父親好、重在生、就鞠躬嚟拜。
約瑟舉眼、見佢同母嘅細佬便雅憫話、你地先日所講至細嘅細仔、就係呢個咩。又話、小子呀、願上帝施恩過你。
約瑟痛愛個細佬、心中好似火燒噉、急急搵一笪地方嚟喊、噉就入屋喊起嚟。
又洗過面出去、勉強忍住、叫人擺設食物。
於是擺一席過約瑟、擺一席過十一人、擺一席過埃及人、因為埃及人唔共希伯來人同食、若係同食、就被埃及人憎嘅咯。
約瑟叫兄弟坐在佢面前、亦能依佢地長幼嘅次序、使佢地坐、兄弟彼此就見詫異。
約瑟𢬿自己面前的送菜、俾過佢地、惟係俾過便雅憫嘅、比較別人多五倍、眾人就共約瑟飲酒快樂。