約瑟吩咐個管家話、依佢孭得幾重、就𢬿穀袋滿佢袋、亦擠番佢地各人嘅銀落袋口。
又將我個隻銀酒杯、共個少年人糶穀嘅銀、擠落個少年人袋處、管家就約瑟吩咐去做。
到天光、打發的人共驢去。
出城冇遠、約瑟對管家話、你去追個的人、追倒、就話、做乜你𢬿惡嚟報善呢。
呢隻唔係我主所飲嘅杯咩、唔係用佢嚟占卜嘅咩、你噉樣做、實係惡嚹。
既追倒、就將呢的說話對佢地講。
佢地答話、我主呢、做乜噉講呢、你僕斷唔做噉嘅、
前時我地喺袋裏所得嘅銀、我地尚且從迦南送番過你、豈有從你主家中、偷金銀嘅咩。
你僕之中、唔論喺邊個處搜倒、個個是必死、我地亦做主嘅僕。
管家話、如今照你說話去做、唔論喺邊個處搜倒、就要個個做僕人、其餘各人都冇罪。
眾兄弟急急𢬿袋放落地處、解開佢。
管家從長至幼、都搜過嘥、喺便雅憫袋中、搜出個隻杯嚟。
眾兄弟擘爛自己衣服、將個的袋孭在驢背、番轉頭入城。
猶大及兄弟番到約瑟家中、約瑟重喺處、佢地就向佢俯伏地上。
約瑟對佢地話、你地所做嘅係乜呢、你地唔知到我噉嘅人、是必噲占(算)咩。
猶大話、我地在主之前、重有乜說話呢、重有乜好講呢、重點能表得明呢、上帝已經抽出你僕嘅罪咯、如今我地共個個被搜出酒杯嘅、都做主嘅僕喺哩。
約瑟話、我斷唔噉做、惟係被搜出酒杯個個就是必要做我嘅僕、其餘可以平安番去父親處。
猶大上前對約瑟話、我主、你係同法老一樣、容你僕講一句說話過你聽、請主咪惱。
從前我主問你僕話、你有父親或兄弟冇。
我地對主話、有一個父親、係年老嘅人、到年老之時、生出個細仔、佢同母嘅大佬已經死、單獨剩落佢、父親愛痛佢。
你對僕話、帶佢落嚟、等我親眼見佢。
我地對主話、個細仔不能離開父親嘅、若是離開、父親就要死咯。
你對僕話、你個細佬、唔同你嚟、就唔准你地再見我面。
我地番去你僕我父親處、將我主嘅說話、講過佢聽。
父親話、你地再去替我糶的穀嚟。
我地就話、我地不能再去、若係同埋個至細嘅細佬、就可以落去、因為細佬唔同我地去、必不能見個人嘅面。
你僕我父親對我地話、你知到我嘅妻生兩個仔過我、
一個喺我處出去、我話佢必被咬碎、到如今都唔得見。
你地又要帶呢個離開我去、設使受害、係令我白髮凄涼入墳墓咯。
父親受惜個細仔好似生命噉、如今我番去見你僕我父親、個細仔唔同埋我地番去。
佢見個細仔唔同埋我地番去、佢是必死、噉樣、你我地令你僕我父白髮凄涼入墳墓咯。
而且你僕也曾在父親面前、擔保個細仔話、我若係唔帶佢番嚟你處、就算我永遠受罪。
今求你准我替個細佬留落呢處、做我主嘅僕、容個細仔同兄弟番去。
因為個細仔唔同埋我番去、我點見得父親呢、怕噲見父親受禍咯。