有一個人、名叫拉撒路、有病、屬伯大尼、即係馬利亞共佢姊妹馬大嘅村、
呢個馬利亞、即係𢬿香膏搽主、𢬿頭髮抹佢腳嘅、佢兄弟拉撒路有病、
故此個的姊妹打發人去耶穌處、話、主呀、你所愛嘅人有病呀、
耶穌聞得就話、呢的病唔噲死、係顯上帝嘅榮光、令上帝之子因此得榮光、
耶穌愛馬大共佢姊妹與及拉撒路、
已經聞得佢有病、重喺個處住兩日、
此後、對門生話、我哋要再去猶太。
門生對佢話、夫子、猶太人近來想𢬿石矴你、你重去個處咩、
耶穌答話、一日唔係有十二點鐘咩、人若係日間行、就唔跌親、因為見世上嘅光呀、
人若係夜晚行、就跌親、因為冇光在佢處呀、
耶穌講完呢的、就對門生話、我哋嘅朋友拉撒路瞓咯、我去叫醒佢、
門生就話、主呀、佢若係瞓、就必好咯、
但耶穌所講、係指佢死、惟門生估係話佢抖身瞓著、
故此耶穌明白話佢知、拉撒路死咯、
因你哋嘅緣故、我歡喜唔喺佢處、等你哋信呀、但我哋要去佢處、
多馬又叫做低土馬、就對同輩嘅門生話、我哋都要去、等共主同死、
耶穌去到、就知拉撒路已經塟落墳墓四日咯、
伯大尼係近住耶路撒冷、相隔大約六里、
有好多猶太人嚟馬大馬利亞處、想因佢兄弟安慰佢、
馬大聞耶穌到、就去迎接佢、馬利亞仍然坐倒屋裏、
馬大對耶穌話、主呀、你若喺呢處、我嘅兄弟唔死咯、
但係你如今所有求上帝嘅、我知到上帝必定賜過你、
耶穌對佢話、你兄弟必定復生、
馬大對佢話、我知到末日復生個時、佢必定復生、
耶穌對佢話、復生與及生命係我呀、信我嘅、雖然死都必定生、
但凡在生信我嘅、永遠唔死、你信呢的唔呢、
馬大話、主呀、係咯、我信你係基督上帝之子、應該臨世嘅呀、
講完呢的、就去、靜靜叫佢姊妹馬利亞話、老師嚟咯、叫你呀、
馬利亞聞得噉樣、就急的起身、去耶穌處、
耶穌重未入村、仍然喺馬大迎接佢個處、
個的喺屋裏、安慰馬利亞嘅猶太人、睇見佢急的起身行出去、就跟從佢、估佢去墳墓處喊呀、
馬利亞嚟到耶穌處、見佢、就𡂈倒佢腳下、對佢話、主呀、你若喺呢處、我嘅兄弟唔死咯、
耶穌見佢喊、與及同佢嚟嘅猶太人都喊、就傷心悽慘、
話你安置佢喺邊處、眾人答話、主、嚟睇喇、
耶穌就流眼淚、
故此猶太人話、睇佢愛得佢咁切吖、
其中有的話、佢開嘵盲人嘅眼、豈不能令呢個人唔死咩、
耶穌又傷心起嚟、去到墳墓、墓係一個洞、門前有石安處、
耶穌話、你哋移開嚿石喇、死者嘅姊妹馬大對佢話、主呀、佢如今臭咯、因為已經第四日嚹、
耶穌對佢話、我豈唔係對你噉話、倘若你信、必定見上帝嘅榮光、
眾人就移開嚿石、耶穌舉眼、話、父呀、我多謝你、因為也曾聽我、
我知你常時聽我、但我因周圍企處嘅、就講呢的、令佢哋信你打發我呀、
講完、就大聲喓話、拉撒路出嚟、
個死者就出、手腳有布束住、面有巾包住、耶穌對眾人話、放鬆佢、任從佢行、
噉就嚟馬利亞處嘅猶太人、見耶穌所做嘅事、有好多信佢、
其中有的去見法利賽人、就𢬿耶穌所做嘅事話佢知、
於是眾祭司長共法利賽人、聚集埋個公會、話、呢個人行好多異跡、我哋點做呢、
若我噉由得佢、眾人必定信佢、羅馬人就嚟滅我土地、共我百姓咯、
其中有一個人、名叫做該亞法、本年做大祭司長、對眾人話、你哋乜野都唔曉、
竟然唔想到一人替百姓死、令通國唔滅亡、係你哋嘅益呀、
佢講呢的、唔係由自己、係因本年做大祭司長、預先話耶穌要替百姓受死、
而且唔止為呢的百姓、又要令上帝嘅仔女散開四方嘅、聚埋一處、
自個日之後、眾人商議想殺耶穌
故此耶穌唔再顯然喺猶太人處行、就由個處去近住曠野嘅地方、到一個城、名叫做以法連、共門生喺個處住、
猶太人嘅逾越節將近、有好多人由鄉下上耶路撒冷、想趁逾越節之前、嚟潔淨自己、
佢哋搵耶穌、大家企在殿處相講話、你哋意思點呢、估佢唔嚟過節囉咩、
眾祭司長共法利賽人、也曾出命令話、若有人知到耶穌喺邊處、就要報信、令可以捉佢、