此後、耶穌喺提庇哩亞海邊、自己再顯現過門生睇、佢顯現嘅事、列明在下、
有西門彼得、多馬叫做低土馬、加利利迦拿嘅拿但業、西庇太兩個仔、又有兩個門生、都同埋喺處、
西門彼得對眾人話、我去攞魚、眾人對佢話、我哋都同埋你去、眾人就出去落船、個晚一的都唔攞得倒、
已經天光、耶穌企倒岸上、但門生唔知係耶穌、
耶穌就對佢話、小子呀、你有的食物冇、佢哋答話、冇、
耶穌對佢話、喺船右便撒網、必定搵得倒、眾人撒網、就唔拉得起、因為咁多魚呀、
故此、耶穌所愛嘅門生、對彼得話、係主咯、西門彼得脫嘵衫、一聞得係主、就著番衫自己跳落海、
其餘門生喺小艇處、拉載魚嘅網埋岸、因為離岸冇幾遠、大約二百尺呮、
上到岸、眾人睇見有炭火、而且有魚擠倒火上、亦有餅添、
耶穌對佢哋話、你如今所得嘅魚、擰的嚟、
西門彼得就去、拉網上岸、載住大魚一百五十三條、雖係咁多、網都唔裂、
耶穌對佢哋話、嚟食喇、門生因為知到佢係主、唔敢問話你係乜誰、
耶穌嚟到、將餅俾眾人、俾魚都係噉樣、
耶穌由死復生之後、自己顯現過門生睇、呢的係第三次咯、
眾人食完、耶穌對西門彼得話、約翰嘅仔西門、你愛我多過呢的人唔呢、佢答話、主呀、係咯、你知到我愛你咯、耶穌對佢話、餵我嘅羊仔呀、
耶穌第二次對佢話、約翰嘅仔西門、你愛我唔呢、佢答話、主呀、係咯、你知到我愛你咯、耶穌對佢話、看我羊呀、
第三次對佢話、約翰嘅仔西門、你愛我唔呢、彼得因佢三次問你愛我、就憂悶起嚟、答佢話、主、你無所不知、你知我愛你咯、耶穌對佢話、餵我羊呀、
我實實話你知、你年少之時、自己束起條帶、任從你行邊處、但到老大個時、你就伸開手俾別人綁住、拉你到唔想去個處、
佢講呢的、係指彼得將來點樣死、嚟歸榮上帝嘅、講完、又對佢話、跟從我、
彼得(口佞)轉便、見耶穌所愛嘅門生跟住、即係當晚餐時挨倒耶穌胸懷、問話、主、賣你係乜誰個個、
彼得睇見佢、就問耶穌、話、主、呢個人將來點樣、
耶穌對佢話、我若係想佢住倒處、等到我嚟、與你何干呢、你跟從我罷囉、
於是呢的說話、喺兄弟處傳開、話、呢個門生將來唔死、其實耶穌唔係話佢唔死、不過話我若係想佢住倒處、等到我嚟、與你何干噉呮、
為呢的事證明、及寫落呢的事嘅、即係呢個門生、而且我哋知到佢所證嘅係真、
耶穌所做嘅事、重有好多、倘若一一寫落、我估世上唔載得嘥所寫佢嘅書咯、