約翰福音 4 · 1883《約翰福音傳》（粵語聯合譯本修訂本，香港理工大學）

主知到法利賽人、聞得耶穌施洗、招人做門生、多過約翰、

其實唔係耶穌自己施洗、係佢門生呮、

主就離開猶太、再去加利利

但必要經過撒馬利亞、

到撒馬利亞嘅一個城、名叫做敘加、近住雅各所賜佢仔約瑟個笪地、

喺個處、有雅各井、耶穌因行路疚倦、坐到井邊、個陣時、大約晏晝、

有一個撒馬利亞嘅婦人嚟打水、耶穌對佢話、俾的我飲、

因為佢門生入嘵城買食物呀、

撒馬利亞嘅婦人對佢話、你既係猶太人、因何向我撒馬利亞婦人求飲呢、因為猶太人共撒馬利亞人唔相往來呀、

耶穌答佢話、倘若你知上帝嘅賞賜、與及對你講俾水我飲嘅係乜誰、你就必定求佢、佢就俾生活嘅水過你、

婦人對佢話、主呀、你冇打水器具、個井又深、你從何有生活嘅水呢、

我祖宗雅各留落呢個井過我哋、佢自己與及佢仔共生口、都飲過嚹、你豈大過佢咩、

耶穌答佢話、但凡飲呢的水嘅、必定再頸渴、

但係飲我所俾佢嘅水、就永遠唔頸渴、因為我所俾佢嘅水、必喺佢裏頭成為有源嘅水、湧到永生處呀。

婦人對佢話、主呀、俾呢的水過我、等我唔頸渴、亦唔使嚟呢處打水咯、

耶穌對佢話、你去叫埋你丈夫嚟呢處

婦人答佢話、我冇丈夫、耶穌對佢話、你話冇丈夫著嘅、

因為你已經有五個丈夫、獨係如今所有嘅、唔係你丈夫、你呢的說話、真咯、

婦人對佢話、主呀、我睇你係先知呀、

我哋列祖喺呢個山嚟拜上帝、但係你哋話、應拜上帝個處、係在耶路撒冷

耶穌對佢話、婦人呀、你要信我、時候將近到咯、你哋拜父、唔係在呢個山、亦唔係在耶路撒冷、

你哋所拜嘅、你哋唔知、我哋所拜嘅、我哋致知、因為救世之法、係從猶太人出呀、

時候將近到、如今係咯、真實拜嘅、必要𢬿心靈、𢬿真實嚟拜父呀、因為父想人噉樣拜佢、

上帝係靈、拜佢嘅、必要𢬿心靈𢬿真實嚟拜呀、

婦人對佢話、我知到彌賽亞、即係稱為基督嘅、是必嚟、佢嚟之時、必𢬿各樣道理、講過我哋知、

耶穌對佢話、如今同你講嘅、就係佢咯、

適値佢門生嚟到、見佢共個婦人講、以為出奇、但冇人話你求乜野、亦唔話你因何共佢講呢、

婦人留落佢嘅水埕、就入城、對眾人話、

嚟睇吓、有一個人、𢬿我但凡做過嘅事話我知、佢豈唔係基督咩。

眾人就出城、嚟耶穌處、

當個時、門生請佢、話、夫子、食囉、

耶穌對佢哋話、我有糧嚟食、你唔知到嘅、

故此門生大家相講、話、有人俾野佢食咩、

耶穌對佢哋話、遵行打發我嚟嘅旨意、與及做成佢嘅工夫、就係我嘅糧咯、

你豈唔話、重有四個月、致係收割嘅咩、睇吖、我話你哋知、你舉眼嚟睇吓的田、已經白色、可以收割咯、

收割嘅得倒人工、就積埋收成嘅、至到永生、等撒種嘅共收割嘅同埋快樂呀、

噉就俗語所話、一個撒落、一個收割、係真嘅咯、

我打發你收割、你所有未曾勞過力嘅、別人勞過力、你就得佢所勞力嘅咯、

個城嘅撒馬利亞人好多信佢、因為婦人做證、話佢𢬿我但凡做過嘅事、話我知呀、

噉就撒馬利亞人嚟到耶穌處、求佢同埋住、佢就喺個處住兩日、

因佢所講嘅、越發多人信、

又對個婦人話、如今我哋唔係為你說話嚟信、係因我哋自己聽過佢講、知到佢真係救世主呀、○

過嘵個兩日、耶穌離開個處、去加利利

因為耶穌自己證明、先知在本鄉、冇人尊敬𡃉 、

佢到嘵加利利、加利利人見佢喺耶路撒冷節期、所有做嘅事、就接待佢、因為佢哋都去守個節呀、

耶穌再到加利利嘅迦拿、即係佢變水為酒個處、有一個王臣、佢仔喺迦百農有病、

聞得耶穌從猶太到加利利、就嚟佢處、求佢落去醫個仔、因為個仔將近死咯、

耶穌就對佢話、倘若唔見異跡奇兆、你哋就唔信、

王臣對佢話、主呀、趁我仔未死、求你落去、

耶穌對佢話、番去喇、你嘅仔生咯、個人信耶穌共佢講嘅說話、就番去、

當落去個時、佢嘅僕人遇著佢、話、你仔生咯、

佢就問幾時起首好番呢、佢哋話、昨日未時退嘵熱嘅、

噉就個父親知到個陣正係耶穌話你仔生咯之時、於是佢與及全家都信、

耶穌從猶太到加利利所行嘅異跡、呢的係第二次呀、