耶穌去到橄欖山、
天矇光、再番入殿、眾人嚟佢處、佢就坐處教佢哋、
讀書人共法利賽人拉住一個婦人、係行淫之時被捉嘅、嚟到耶穌處、令佢企倒中間、
就對耶穌話、老師呀、呢個婦人係行緊姦淫之時被捉嘅、
摩西律法之中、吩咐我哋話、若係噉樣嘅人、就要𢬿石嚟矴佢、你話點樣呢、
眾人講呢的嚟試耶穌、想得倒告佢嘅緣故、耶穌噁攣腰、𢬿手指畫地、
眾人不歇問、耶穌企番起身對佢話、你哋邊個冇罪、嘅就先俾石矴佢喇、
又噁攣腰𢬿手指畫地、
眾人聞得呢的說話、自長至幼、個個都行出、獨係剩耶穌喺處、共個婦人仍然喺中間、
耶穌企番起身、就對佢話、婦人呀、個的人喺邊處呢、冇人定你罪囉咩、
佢答話、主呀、冇咯、耶穌話、我都唔定你罪、你去喇、咪再犯罪呀、○
耶穌又對眾人話、我係世上嘅光、跟從我嘅、就唔喺暗處行、必得生命嘅光、
故此法利賽人對佢話、你為自己做證、你嘅證唔得真、
耶穌答佢哋話、我雖然為自己做證、我嘅證都係真因為我知到我從邊處嚟、向邊處去、但你唔知我從邊處嚟、向邊處去、
你哋依住外貌嚟審判、惟係我唔審判人、
倘若我審判人、我嘅審判係真、因為唔係單獨我喺處、打發我嚟嘅父、亦同埋我喺處呀、
你哋律法有寫話、兩個人嘅證係真、
我為自己做證、打發我嚟嘅父、亦為我做證、
眾人對佢話、你父喺邊處。耶穌答佢話、我與及我父、你都唔識、你若然識我、亦必識我父、
耶穌喺殿教訓、在庫房講呢的說話、冇人捉住佢、因為佢時候未到呀、
耶穌再對佢地話、我去、你必搵我、而且你哋必死在罪惡之中、我去個處、你不能到得、
猶太人話、佢係想整死自己唔係呢、因佢話、我去個處、你不能到得呀、
耶穌對佢話、你從下頭嚟、我從上頭嚟、你屬呢個世界、我唔屬呢個世界、
故此我對你話、你哋必死在罪惡之中、倘若你唔信我係佢、你哋必死在罪惡之中咯、
眾人對佢話、你係乜誰呢、耶穌答佢哋話、即係我自始初話你知嘅係咯、
我重有好多樣為你哋講而且審判你添、但係打發我嘅係真、我在佢處所聞嘅事、傳過世界知、
眾人唔知佢所講嘅、係指天父呀、
所以耶穌話、你舉起人子之後、就知到我係佢、而且我所做嘅事、冇擅自嚟做、我講呢的、係照依我父所教我嘅、
打發我嚟嘅、係同我喺處、佢唔留我獨自喺處、因為我常做佢所歡喜嘅事呀、
耶穌講緊呢的說話、好多人信佢、
耶穌就對信佢嘅猶太人話、你若長長住在我嘅道中、就真係我嘅門生咯、
都必曉得真理、真理就釋放你咯、
眾人答佢話、我哋係亞伯拉罕嘅後裔、從來未做過人嘅奴僕、做乜你話你哋必被釋放呢、
耶穌答佢哋話、我實實話你哋知、但凡犯罪嘅、係罪嘅奴、
奴唔係長住倒家裏、仔係長住倒處、
故此個仔釋放你哋、你就真係被釋放咯、
我知到你係亞伯拉罕嘅後裔、但你想殺我、因為你個心冇地方容載我嘅道呀、
我𢬿喺我父處所見嘅嚟講、你𢬿喺你父處所見嘅嚟做、
眾人答佢話、亞伯拉罕係我哋嘅父呀、耶穌對佢哋話、你若係亞伯拉罕嘅子孫、就必做亞伯拉罕所做嘅事、
如今我係𢬿所聞於上帝嘅真理、話過你哋知嘅人、你想嚟殺我、呢的唔係亞伯拉罕所做嘅呀、
你哋係做你父所做嘅、眾人對佢話、我哋唔係由姦淫生嘅、我哋有一個父、即係上帝呀、
耶穌對佢哋話、倘若上帝係你父、你必定愛我、因為我由上帝處出嚟、我唔係擅自嚟、係上帝打發我嘅、
你何以唔曉我說話呢、因你不能聽我道呀、
你哋係屬你父魔鬼、都想依住你父嘅私慾嚟行、佢自始初做殺人嘅、唔住在真理處、因佢冇真理在心中、佢講大話之時、係講自己本性出嘅呀、因佢係好講大話、亦係做大話嘅父、
因我講真理、你哋唔信我、
你哋乜誰執得我罪呢、我既然講真理、你因何唔信我呢、
由上帝嚟嘅、必聽上帝嘅說話、你所以唔聽嘅、因你唔係由上帝嚟呀、
猶太人就答佢話、我哋話你係撒馬利亞人、又被鬼迷嘅、豈唔著咩、
耶穌答佢話、我唔係被鬼迷嘅、但係我尊敬我父、你就羞辱我、
我唔求自己嘅榮光、但有一位求嘅、而且做審判嘅呀、
我實實話你知、人若係守我道、就永遠唔見死、
猶太人就對佢話、如今我哋知你被鬼迷咯、亞伯拉罕已經死、眾先知都係、獨你話人若守我道、就永遠唔嘗過死、
你豈大過我死嘵嘅祖宗亞伯拉罕咩、眾先知都死嘵、你自己以為係乜誰呢、
耶穌答話、我若係尊榮自己、噉就我嘅尊榮冇用、尊榮我嘅、係我父呀、即你哋話係你嘅上帝、
你哋唔識佢、但我識佢、若我話唔識佢、噉就我係講大話、好似你哋一樣、但我識佢、而且守住佢道、
你嘅祖父亞伯拉罕好歡喜見我嘅日子、佢見嘵就快樂、
噉就猶太人對佢話、你未夠五十歲、你豈係見過亞伯拉罕咩、
耶穌對佢哋話、我實實話你知、未有亞伯拉罕之先、我已經喺處咯、
眾人執石想矴佢、耶穌躱避出殿、從眾人之中經過就去嘵、