因為有好多人起首寫排列我地內中有憑據嘅事。按照始初親眼睇見嚟傳道嘅人所傳俾過我地嘅。
提阿非羅，尊駕呀，我已經詳細考究各樣嘅事，都估至好係隨一隨二寫俾過你
至俾你深深知道所學嘅道理嘅基旨呀。
當希律做猶太王，個陣時，有亞比雅班嘅祭司名叫撒加利亞，佢老婆係亞倫嘅子孫，名叫以利沙伯
佢兩個人喺上帝面前行義，行照主嘅律法禮儀，冇乜差錯。
但係冇仔，因為以利沙伯冇生養嘅，佢兩個人年紀又老。
個時撒加利亞照班輪到做祭司嘅事喺上帝面前。
照祭司嘅禮拈鬮，得倒入上帝殿燒香。
燒香個時，大眾百姓喺外出禱告
主嘅使者顯現出嚟企倒香台右邊。
撒加利亞睇見佢就好慌。
天使話：「撒加利亞，唔使慌，你祈禱嘅說話已經得聽見咯，你老婆以利沙伯將生仔，好叫佢嘅名做約翰。
你將歡喜快樂，眾人歡喜佢生。
因為喺上帝面前算佢做大，淡酒濃酒都唔飲，喺胎個陣時，聖神就充滿嘅咯。
叫好多以色列人歸主，即係佢嘅上帝。
佢將做主嘅先鋒，使以利亞嘅性情才能，叫個的做老竇嘅𢬿心歸佢嘅仔，叫個的忤逆嘅人歸義人嘅智慧，替主預備作新嘅百姓。」
撒加利亞對天使話:「點知到是必係咁樣呢？我已經老咯，我老婆又年老咯。」
天使話：「我係加伯列，企倒上帝嘅面前受打發嚟，對你講呢個好嘅消息俾你知。
你是必啞，唔噲講，到事幹成就個日，因為你唔信我嘅說話，喺時候一到必定得應驗嘅。」
百姓等候撒加利亞，見佢喺殿裡頭咁耐，就見出奇。
到佢出嚟，已經唔噲講就知到喺殿裡頭必定有事睇見，因為𢬿頭嚟會意呮，但係啞嘅咯。
職事完，滿日期，就去歸。
後來佢老婆以利沙伯有身孕，淨自己住埋五個月，
就話：「主照顧我個時，咁樣待我，俾我喺人地中間得除去羞恥。」
到第六個月，天使加伯列奉上帝嘅命去到加利利嘅村鄉，名叫拿撒勒；
去見一個娘仔馬利亞，即係佢嫁大闢後裔約瑟嘅。
天使入去對佢話：受恩嘅女，平安呀，上主同埋你，在眾女之中你得福。
馬利亞睇見，就出奇佢嘅說話，想吓個的係乜野嘅問安呢？
天使話：「馬利亞，你唔使恐怕，你得上帝嘅恩典咯。
你將受胎後來生仔，安名叫做耶穌。
佢將做大，叫做至上者嘅仔；主上帝𢬿佢祖宗大闢嘅位俾過佢。
永遠做雅各一家嘅王，佢嘅國冇窮盡。」
馬利亞對天使話：「我唔曾嫁，點得呢件事呢？」
天使話：「聖神將降臨在你，至上者嘅力將庇蔭你，所以生出個聖嘅得倒叫做上帝嘅仔。
而且你嘅親戚以利沙伯年老，平日叫做冇生養嘅，今時馱倒男仔，已經六個月咯。
因為上帝係冇所不能嘅呀。」
馬利亞話：「我係主嘅婢，情願照你嘅說話應驗係在我，天使就離開佢去嘵。
個陣時馬利亞起程，急急去山嘅地方，去到猶(太)省一個城；
入撒加利亞嘅屋，共以利沙伯問安。
以利沙伯一聽見馬利亞問安嘅聲，胎裡嘅孕就跳起嚟；以利沙伯被聖神感動，
大聲叫話：「眾女之中你得福，你懷嘅孕又得福咯。
我主嘅老母到我呢處，點得呢件事呢？
因為你問安嘅聲一入我嘅耳，個胎孕喺我肚裡頭就歡喜到跳起嚟。
你係信，噉樣有福，因為主對你講嘅是必得應驗呀。」
馬利亞話：「我嘅心獨信主係大。
我嘅心神歡喜上帝我嘅主；
因為主照顧佢嘅婢嘅卑賤。從今以後，萬世嘅人都話我有福咯。
因為佢有能幹，為我做成咁大嘅事，佢嘅名係聖。
佢憐恤敬畏佢嘅，至到世世。
主𢬿佢手臂使力，散開個的心裡頭嘅意思係驕傲嘅人。
有權嘅人，趕佢離開位；卑賤嘅人，提拔起佢。
肚餓嘅人，俾好野過佢食飽；富貴嘅人，俾佢空手番去。
扶持佢嘅臣子以色列，
按照先頭同我祖宗講嘅，即係記念永遠矜恤亞伯拉罕同佢嘅子孫。
馬利亞同埋佢住三個月，就去歸。
以利沙伯懷孕，臨期生仔。
鄰里，親戚聽見上主咁憐恤佢，大家都同埋佢歡喜。
過八日，大家都嚟為佢嘅仔行割禮；𢬿佢老竇嘅名撒迦利亞嚟安俾佢。
佢老母話：「唔好，是必叫佢嘅名做約翰。」
眾人話：在親之中冇人叫做呢個名嘅。」
就𢬿頭嚟會意，問佢老竇，想安做乜野名。
佢老竇請攞一塊粉牌，寫話：「應該叫做約翰。眾人就見出奇。
佢嘅口即時開，佢條脷即時解，講說話嚟稱讚上帝。
鄰里都驚奇，通猶太嘅山都宣揚呢件事。
聽聞嘅人，擠倒心嚟話：唔知呢個仔將來點樣呮？」上主嘅手都幫助佢咯。
佢老竇撒迦利亞被聖神感動講預言話：
應該讚美嘅係主，以色列嘅上帝，因為照顧共屬佢嘅百姓。
為我地舉起拯救嘅角，在佢嘅神子大闢嘅家，
按照佢自古時托聖先知嘅口所講嘅。
即係救我脫仇敵同凡憎惡我者嘅手；
憐恤我嘅祖宗，記念佢聖嘅約，
即係共我嘅祖公亞伯拉罕所發嘅誓，
話，將來救我脫仇敵嘅手；
一生喺上主面前，以虔以義服侍佢，唔使恐怕。
細蚊仔，你將來叫做至上者嘅先鋒，因為將來喺主嘅前頭行，預備佢嘅路。
教百姓知到得救，即係佢嘅罪得赦。
依賴我嘅上帝憐恤嘅心，俾清早嘅熱頭由天上照臨我。
照住個的在黑暗，及死嘅蔭翳嘅人，引我嘅腳行在平安嘅路。」
個細蚊仔漸漸長大，精神壯健，住在荒野，到顯出俾以色列人睇見個日。