提阿非羅大人呀，因爲有好多人將我哋教中大有憑據嘅事一叚叚寫落，
卽係傳道嘅人將自己自始親眼睇見嘅事嚟傳授過我哋嘅，
我旣從起頭子細查明各事，都以爲至好係依住次序寫過你知，
等你深知所學過嘅道理係確實嘅。
當猶太王希律個時，有亞比亞班嘅祭司，名呌撒加利亞；佢妻係亞倫嘅後裔，名呌以利沙伯。
佢兩個人在上帝前係公義嘅，依主嘅律法禮義嚟行，冇的差錯。
但佢冇仔，因爲以利沙伯唔成得孕嘅，佢兩個人年紀又老。
當撒加利亞在上帝之前，照佢班次輪到做祭司嘅職，
依祭司例，佢執籌得倒入主殿燒香。
燒香個時，大衆百姓喺外便祈禱。
主嘅使者顯現過佢睇，企倒香臺右邊。
撒加利亞睇見，就嚇得好慌。
天使對佢話：「撒加利亞，唔便慌，你所祈求嘅已經聽聞咯。你妻以利沙伯將要生仔過你，你就改佢名做約翰。
你將歡喜快樂，衆人亦歡喜佢生。
因爲在主之前佢將來爲大，淡酒濃酒都唔飲，自從母胎個時，就得聖靈充滿嘅咯。
佢必合好多以色列人歸主，卽係佢嘅上帝。
佢將來在主前先行，學以利亞嘅性情才能，合做父親嘅心歸向仔女，合忤逆嘅歸向義人嘅智慧，爲主預備的齊備嘅百姓。」
撒加利亞對天使話：「點知到必有呢件事呢？因爲我已經老，我妻亦年老咯。」
天使答佢話：「我係加伯列，企倒上帝面前，受打發啾報呢個好消息過你知。
但你是必要啞，唔嗆講，至到呢件事成就個日；因你唔信我嘅說話，時候一到必定應騐嘅。」
百姓等候撒加利亞，見佢喺殿裏頭咁耐，就見出奇。
臨到佢出嚟，唔嗆同佢哋講，就知到喺殿裏頭必定睇見異象，因爲佢使頭嚟會意，竟然啞咗咯。
及至佢職事嘅日期滿曉，就番去歸。
後來佢嘅妻以利沙伯懷孕，靜中住埋五個月，就話：
「主照顧我個時噉樣待我，俾我在人間得除羞恥。」
到第六個月，天使加伯列奉上帝命，去到加利利嘅城，名呌拿撒勒，
去見一個童女，名呌馬利亞，卽係大闢嘅後裔約瑟所聘定嘅。
天使入去對佢話：「受恩嘅女，平安呀！主係同埋你，在衆女之中你有福咯。」
馬利亞就驚奇佢嘅說話，想吓噉樣問安係點解呢。
天使對佢話：「馬利亞，你唔使慌，你得上帝嘅恩典咯。
你將懷胎生仔，改佢名做耶穌。
佢將做大，稱爲至上者之子；主上帝必摵佢祖宗大闢嘅位俾過佢，
永遠做雅各一家嘅王，佢國冇窮盡。」
馬利亞對天使話：「我未嫁人，點得呢件事呢？」
天使答佢話：「聖靈將降臨你，至上者嘅力將庇蔭你，所以生出個聖者稱爲上帝之子。
而且你嘅親戚以利沙伯年老，平日話佢唔成得孕嘅，如今䭾倒男仔已經六個月咯。
因爲上帝冇一句話唔做得成。」
馬利亞話：「我係主嘅婢，情願照你嘅說話應騐在我。」天使就離開佢去咗。
個陣時，馬利亞起程，趕快去山嘅地方，去到猶太省一個城，
入撒加利亞嘅屋，問以利沙伯安。
以利沙伯一聽見馬利亞問安，佢懷嘅胎就在肚裏跳起嚟；以利沙伯被聖靈充滿，
大聲呌話：「衆女之中你有福咯，你懷嘅胎亦有福咯！
我主嘅母親到我處，我因何得噉呢？
因爲你問安嘅聲一入我耳嚟，我肚裏嘅胎歡喜到跳起嚟。
你既然信得就有福咯，因爲主對你講嘅是必應騐呀。」
馬利亞話：「我嘅心獨尊主爲大，
我嘅心靈歡喜上帝我嘅救主，
因爲佢照顧佢婢嘅卑賤。從今以後，萬世嘅人都話我有福咯。
因爲權能之主爲我做成咁大嘅事，佢嘅名係聖。
佢憐恤敬畏佢嘅人，至到世世。
主摵佢手臂嘅力，散清心志驕傲嘅人；
有權嘅人革佢離位，卑賤嘅人提拔起佢；
肚餓嘅人俾好野佢食飽，富貴嘅人令佢空手番去。
扶持佢嘅臣子以色列，永遠記念矜恤
亞伯拉罕同佢嘅子孫，照依從前同我祖宗所講嘅。」
馬利亞共以利沙伯住三個月，就番去歸。
以利沙伯生產之期已到，就生個仔。
鄰里親戚聽見上主咁憐恤佢，大家都同埋佢歡喜。
過八日，大家嚟共佢仔行割禮，想依番佢父親嘅名，改佢做撒加利亞。
但係佢母親話：「唔好，是必改佢名做約翰。」
衆人話：「你親戚之中行人呌呢個名嘅。」
就使頭嚟會意，問佢父親想改佢做乜名。
父親請攞一塊粉牌，寫話：「佢名係約翰。」衆人就見出竒。
佢口卽開，佢脷亦解，講說話嚟讚美上帝。
鄰里個個驚慌，通猶太嘅山地都傳揚呢件事。
聽聞嘅人擠倒心嚟，話：「唔知呢個仔將來點樣呀？」因主嘅手都扶持佢咯。
佢父親撒加利亞得聖靈充滿，嚟講預言，話：
「主以色列嘅上帝應該受讚美嘅，因爲眷顧佢嘅百姓，兼贖佢嘅罪；
在臣子大闢嘅家，爲我哋舉起拯救嘅角，
照依佢托自古聖先知之口所講嘅，
卽係救我脫出仇敵，共凡憎惡我者嘅手；
憐恤我嘅祖宗，記念佢嘅聖約，
卽係共我祖公亞伯拉罕所發嘅誓，話：
將來救我脫出仇敵嘅手，總唔使怕，
一生在主之前，將敬虔公義嚟服事佢。
小子呀，你將來呌做至上者嘅先知，因爲你將來在主面前先行，預備佢嘅路，
教佢嘅百姓知到得救，卽係在佢嘅罪得赦。
倚頼我上帝憐恤嘅心，俾清早嘅日光由天上照臨我哋，
照住個的在黑暗及死地陰翳嘅人，引我哋腳行在平安嘅路。」
個小子漸漸長大，精神壯健，住在曠野，至到顯過以色列人見個日。