提阿非羅大人呀、因為有好多人、將我哋教中大有憑據嘅事、一段段寫落。
即係傳道嘅人、將自己自始親眼睇見嘅事嚟傳授過我哋嘅。
我既從起頭子細查明各事、都以為至好係依住次序寫過你知、
等你深知所學過嘅道理、係確實嘅。○
當猶太王希律個時、有亞比亞班嘅祭司、名叫撒加利亞、佢妻係亞倫嘅後裔、名叫以利沙伯。
佢兩個人、在上帝前、係公義嘅、依主嘅律法禮義嚟行、冇的差錯。
但佢冇仔、因為以利沙伯唔成得孕嘅、佢兩個人、年紀又老。
當撒加利亞在上帝之前、照佢班次、輪到做祭司嘅職。
依祭司例、佢執籌得倒入主殿燒香。
燒香個時、大眾百姓、喺外便祈禱。
主嘅使者顯現過佢睇、企倒香臺右邊。
撒加利亞睇見、就嚇得好慌。
天使對佢話、撒加利亞唔使慌、你所祈求嘅、已經聽聞咯、你妻以利沙伯、將要生仔過你、你就改佢名做約翰。
你將歡喜快樂、眾人亦歡喜佢生。
因為在主之前、佢將來為大、淡酒濃酒都唔飲、自從母胎個時、就得聖靈充滿嘅咯。
佢必令好多以色列人歸主、即係佢嘅上帝。
佢將來在主前先行、學以利亞嘅性情才能、令做父親嘅、心歸向仔女、令忤逆嘅、歸向義人嘅智慧、為主預備的齊備嘅百姓。
撒加利亞對天使話、點知到必有呢件事呢、因為我已經老、我妻亦年老咯。
天使答佢話、我係加伯列、企倒上帝面前、受打發嚟、報呢個好消息過你知。
但你是必要啞、唔噲講、至到呢件事成就個日、因你唔信我嘅說話、時候一到、必定應驗嘅。
百姓等候撒加利亞、見佢喺殿裏頭咁耐、就見出奇。
臨到佢出嚟、唔噲同佢哋講、就知到喺殿裏頭、必定睇見異象、因為佢使頭嚟會意呮、竟然啞嘵咯。○
及至佢職事嘅日期滿嘵、就番去歸。
後來佢嘅妻以利沙伯懷孕、靜中住埋五個月。
就話、主照顧我個時、噉樣待我、俾我在人間得除羞恥。○
到第六個月、天使加伯列奉上帝命、去到加利利嘅城。名叫拿撒勒。
去見一個童女、名叫馬利亞、即係大闢嘅後裔、約瑟所聘定嘅。
天使入去對佢話、受恩嘅女平安呀、主係同埋你、在眾女之中、你有福咯。
馬利亞就驚奇佢嘅說話、想吓噉樣問安、係點解呢。
天使對佢話、馬利亞、你唔使慌、你得上帝嘅恩典咯。
你將懷胎生仔、改佢名做耶穌。
佢將做大、稱為至上者之子、主上帝必𢬿佢祖宗大闢嘅位俾過佢。
永遠做雅各一家嘅王、佢國冇窮盡。
馬利亞對天使話、我未嫁人、點得呢件事呢。
天使答佢話、聖靈將降臨你、至上者嘅力、將庇蔭你、所以生出個聖者、稱為上帝之子。
而且你嘅親戚以利沙伯年老、平日話佢唔成得孕嘅、如今䭾倒男仔、已經六個月咯。
因為上帝冇一句話唔做得成。
馬利亞話、我係主嘅婢、情願照你嘅說話、應驗在我、天使就離開佢去嘵。○
個陣時、馬利亞起程、趕快去山嘅地方、去到猶太省一個城。
入撒加利亞嘅屋、問以利沙伯安。
以利沙伯一聽見馬利亞問安、佢懷嘅胎、就在肚裏跳起嚟、以利沙伯被聖靈充滿。
大聲叫話、眾女之中、你有福咯、你懷嘅胎、亦有福咯。
我主嘅母親到我處、我因何得噉呢。
因為你問安嘅聲、一入我耳、喺我肚裏嘅胎、歡喜到跳起嚟。
你既然信得、就有福咯、因為主對你講嘅、是必應驗(日牙)。○
馬利亞話、我嘅心、獨尊主為大。
我嘅心靈、歡喜上帝我嘅救主。
因為佢照顧佢婢嘅卑賤、從今以後、萬世嘅人、都話我有福咯。
因為權能之主、為我做成咁大嘅事、佢嘅名係聖。
佢憐恤敬畏佢嘅人、至到世世。
主𢬿佢手臂嘅力、散清心志驕傲嘅人。
有權嘅人、革佢離位、卑賤嘅人、提拔起佢。
肚餓嘅人、俾好野佢食飽、富貴嘅人、令佢空手番去。
扶持佢嘅臣子以色列。
永遠記念矜恤亞伯拉罕、同佢嘅子孫、照依從前同我祖宗所講嘅。
馬利亞共以利沙伯住三個月、就番去歸。○
以利沙伯生產之期已到、就生個仔。
鄰里親戚、聽見上主咁憐恤佢、大家都同埋佢歡喜。
過八日、大家嚟共佢仔行割禮、想依番佢父親嘅名、改佢做撒加利亞。
但係佢母親話、唔好、是必改佢名做約翰。
眾人話、你親戚之中、冇人叫呢個名嘅。
就使頭嚟會意、問佢父親想改佢做乜名。
父親請攞一塊粉牌寫話、佢名係約翰、眾人就見出奇。
佢口即開、佢脷亦解、講說話嚟讚美上帝。
鄰里個個驚慌、通猶太嘅山地、都傳揚呢件事。
聽聞嘅人、擠倒心嚟話、唔知呢個仔、將來點樣呀、因主嘅手、都扶持佢咯。○
佢父親撒加利亞、得聖靈充滿、嚟講預言話。
主以色列嘅上帝、應該受讚美嘅、因為眷顧佢嘅百姓、兼贖佢嘅罪。
在臣子大闢嘅家、為我哋舉起拯救嘅角。
照依佢托自古聖先知之口所講嘅。
即係救我脫出仇敵、共凡憎惡我者嘅手。
憐恤我嘅祖宗、記念佢嘅聖約。
即係共我祖公亞伯拉罕所發嘅誓。
話將來救我脫出仇敵嘅手、總唔使怕。
一生在主之前、將敬虔公義嚟服事佢。
小子呀、你將來叫做至上者嘅先知、因為你將來在主面前先行、預備佢嘅路。
教佢嘅百姓、知到得救、即係在佢嘅罪得赦。
倚賴我上帝憐恤嘅心、俾清早嘅日光、由天上照臨我哋。
照住個的在黑暗及死地陰翳嘅人、引我哋腳、行在平安嘅路。○
個小子漸漸長大、精神壯健、住在曠野、至到顯過以色列人見個日。