後嚟，主又立七十人，日對對打發佢，先去佢想去嘅，各城，各地方。
對佢話：要收嘅榖係多，但做工夫嘅人係少；所以應該求田主打發人去收呀。
去喇！我打發你，好似羊仔入到柴狼嘅群。
唔好帶荷包，共袋，共鞋，路上唔使共人行禮。
入人地屋企，就先話：你家有平安咯！
倘若有平安嘅仔喺個處就你嘅平安俾過佢；若冇，就你嘅平安歸番你。
你喺個處住，佢俾你嘅，就飲，就食；因為做工夫嘅人得工錢係應該𡃉；唔好喺呢間屋搬去嗰間屋。
所入嘅城，有人接你，就食佢擺設嘅。
喺嗰處有有病嘅，就醫好佢，兼之對眾人話： 上帝嘅國曾嚟近你嚹。
入城，人唔接你，就出去街，
話：連你城嘅塵，黏倒我地嘅，而家對住你拍甩佢；雖然，你亦應該知道，上帝嘅國已經嚟近你嚹。
我話你知，到嗰日，所多瑪嘅刑罰，比較嗰個城重容易受呀。
哥拉汛，有禍咯！伯賽大，有禍咯！因為喺你中間行嘅神蹟，若喺推羅，西頓嚟行，就早已着麻衫，坐倒灰處，悔罪改過咯。
但到審判個日，推羅，西頓嘅刑罰，比較你，重容易受呀。
迦伯農，你已經升高到天，將近又推落陰間。
聽從你嘅，即係聽從我；睇輕你嘅，即係睇輕我；睇輕我嘅，即係睇輕打發我嘅嚹。
七十人歡歡喜喜番嚟，話：主，因為你嘅名，鬼都順服我呀。
耶穌對佢話：我睇見撒但喺天跌落嚟，好似閃電噉樣。
我𢬿能幹賜俾你，可以踩得蛇共毒蟲，制服仇敵各樣嘅權勢，必定冇損害你嘅咯。
但唔使因為個鬼(順)服你，就見歡喜，乃因為你嘅名寫落喺天，見歡喜呮。
個陣時，耶穌心神歡喜，話：父親，天地嘅主阿，我稱讚你，因為𢬿個的道理，對個的智慧嘅，巧捷嘅，就隱藏；對個的細蚊仔就顯明；實在天父善嘅旨意係噉樣咯。
萬物都係天父賜俾我，除父之外，冇人識仔，除仔共仔歡喜指示嘅之外，又冇人識父。
耶穌睇吓佢嘅學生，靜靜對佢話：睇見你所睇見嘅，個的眼有福咯。
我話你知，因為好多先知師共君王都想睇見你地所睇嘅，又唔睇得見；想聽你地所聽嘅，又唔聽得見。
有教律法嘅先生起嚟試耶穌話：先生，我應該點樣做，致可以得永生呢？
耶穌對佢話：律法寫嘅係點樣呢？你讀嘅點樣呢？
答話：應該盡心，盡性，盡力，盡意，愛主你嘅上帝；又愛鄰舍如同自己。
耶穌對佢話：你所答嘅係着；噉樣做，就得生咯。
嗰個人想稱自己為善義，故此對耶穌話：邊個係我鄰舍呢？
耶穌就答話：有人喺耶路撒冷去耶利哥，遇著賊；剝佢嘅衫，打傷佢，去嘵，由得佢喺處半死。
啱啱有個祭司喺個條路嚟；睇見佢，就過嘵去，
又有個利未人嚟到個處，行前去睇下佢，又去嘵。
但有個撒馬利亞人，行路個時，嚟到嗰處地方，一睇見，就起憐憫嘅心。
行近佢，𢬿油𢬿酒斟落傷口個處，包好：𢬿自己騎個隻畜生，俾佢騎，帶到歇店嚟照顧佢。
第二日，將近行身，擰出二錢銀嚟，交俾店主，話：你且照顧佢；若係使多的，等我番嚟，個時俾番你。
個三個人中間，你估邊個係嗰個遇著賊嘅鄰舍呢？
話：可憐佢嘅，就係哩；耶穌對佢話：你去照噉樣行喇。
正行路個時，耶穌入一條村鄉，個處有一個女人，名叫馬大，迎接耶穌入佢屋企。
佢有個姊妹，名叫馬利亞，坐倒耶穌腳下，聽佢講。
馬大供應嘅事多，心中忙亂，就行近對耶穌話：我嘅姊妹由得我一個人辦理供應嘅事，主，你唔理唎咩，吩咐佢幫助我好呀。
但耶穌答佢話：馬大阿！馬大阿！你心思忙亂，因為事幹十分多；
但緊要嘅係一件呮。馬利亞已經揀倒好嘅份(祉？)，就唔搶得佢嘅咯。