耶穌喺一處祈禱、已經完、佢門生有一個對佢話、主、請教我哋祈禱、好似約翰教佢嘅門生噉樣。
耶穌對佢哋話、你哋祈禱個陣時、應當噉話、我哋嘅父在天、願你嘅名係聖、你嘅國降臨、你嘅旨意得成就、在地好似在天一樣。
我哋需用嘅糧、日日俾我哋。
求赦免我哋嘅罪、因為我哋亦赦免凡欠負我嘅、咪引我哋入誘惑、就救我哋脫離罪惡。
又對佢哋話、你哋乜誰有個朋友、半夜去到對佢話、朋友呀、請你借三個餅過我。
因為我有朋友喺路上嚟、冇野供應佢呀。
佢喺裏頭答話、咪嘈我喇、已經閂埋門咯、我共我嘅仔女喺床處、唔起得身嚟俾你呀。
我話你哋知、縱然唔因佢係朋友、起身嚟俾佢、但因佢咁𠼮求、亦必起身嚟、俾夠佢用呀。
我又話你哋知、求就俾你、搵就搵倒、打門就開過你咯。
因為但凡求嘅就得倒、搵嘅就搵倒、打門嘅就必得開呀。
你哋之中做父親嘅、邊個有仔求餅、反轉俾石過佢呢、求魚、反轉俾蛇過佢當作魚呢。
或求蛋、反轉俾蠍過佢呢。
你哋雖係惡人、尚且知到俾好野過仔女、何况天父、豈唔𢬿聖靈賜過求佢嘅咩。○
耶穌趕一隻啞鬼、鬼出嘵、啞嘅人就噲講、眾人見出奇。
其中有的話、佢倚賴鬼王別西卜嚟趕鬼呮。
又有的嚟試佢、求顯出從天嚟嘅奇兆。
耶穌知佢哋嘅意思、就對佢哋話、但凡國自己相爭、就必定變為墟、一家自己相爭、就必定敗壞。
若係撒但自己相爭、就佢嘅國點樣建立呢、因為你哋話、我倚賴別西卜嚟趕鬼。
若係我倚賴別西卜嚟趕鬼、就你嘅子弟、倚賴邊個嚟趕鬼呢、故此佢哋將議論你咯。
若係我倚賴上帝嘅手嚟趕鬼、噉就上帝國降臨到你咯。
有個勇士將軍器嚟看守佢屋、個陣時、佢所有嘅物件、就穩當咯。
惟係有越發勇力嘅人嚟打贏佢、搶嘵佢所恃嘅武具、就分開佢嘅贜物咯。
唔歸向我嘅、就係攻打我、唔共我聚埋嘅、就係分散嘅咯。○
邪鬼既離開人、喺旱地或來或往、想安樂又唔得、就話、我要番去我出嚟個間屋。
去到、就見個間屋、已經打掃乾淨、又粉飾好嘥、
就出去帶七隻鬼惡過自己嘅、同埋入去住、噉就個個人嘅後患、比較先日越發關係。
講緊呢的個陣時、眾人之中、有一個女人大聲對佢話、懷你胎嘅、餵奶過你嘅、有福咯。
耶穌話、唔似聽上帝嘅道理、而且遵守嘅更有福呀。○
眾人擠擁聚集個時、耶穌起首講話、呢個係惡嘅世代想睇奇兆、除約拿嘅奇兆之外、冇𢬿別樣奇兆俾佢睇咯。
因為約拿喺尼尼微人處做奇兆、噉樣、人子亦將喺呢個世代做奇兆咯。
南方嘅女王、當審判個時、對呢代嘅人、噲起嚟、定佢嘅罪、因為女王喺地之極嚟、聽所羅門嘅智慧、何况有大過所羅門嘅喺呢處呀。
尼尼微人、當審判個時對呢代嘅人、噲起嚟、定佢嘅罪、因為尼尼微人、聽約拿宣講就悔改、何况有大過約拿嘅喺呢處呀。○
冇人點著燈、擠落暗(口焙)地方、或擠落斗下底嘅、必係擠倒燈臺上、等入嚟嘅人睇見個的光呀。
你眼就係身嘅燈哩、你嘅眼若係明、就你一身都光、你嘅眼若係矇、就你一身都暗。
故此要謹愼、免至你裏頭嘅光變為暗呀。
倘若你全身光明、冇一點黑暗、噉就個的光完全、好似燈嘅光(谷炎)、照住你咯。○
耶穌講緊個時、有一個法利賽人。請佢同食朝飯、耶穌就入去坐席。
個法利賽人見耶穌唔先洗手致食、就以為出奇。
主對佢話、你哋法利賽人、杯盤外邊、就整到潔淨、但你哋心內、就積滿搶奪惡毒嘅念頭。
愚蠢嘅人呀、造外頭嘅、豈唔亦造裏頭咩。
但𢬿你所有嘅施捨過人、就一的都潔淨咯。
你哋法利賽人有禍咯、因為你𢬿薄荷芸香、及各樣蔬菜、十分納一、至於公義共愛敬上帝你就廢嘵、但呢的係你所應該做嘅、個的亦唔好唔做呀。
你哋法利賽人有禍咯、因為你歡喜喺會堂坐上位、喺街上人問你安。
你哋有禍咯、因為你好似隱藏嘅墳墓、喺上面行嘅人、都唔知到呀。○
有一個教法師答佢話、老師、你講呢的說話、亦係羞辱我哋咯。
耶穌就話、你哋教法師都有禍咯、因為你𢬿難擔嘅責任俾人擔、自己就一隻手指都唔摩吓。
你哋有禍咯、因為你建做先知嘅墳墓、即係你哋祖宗所殺嘅。
噉樣、你係做見證嘅、又係歡喜祖宗所做嘅咯、因為你祖宗殺個的先知、你又建做佢嘅墳墓。
故此智慧嘅上帝有話、（或作上帝嘅智慧有話）我將打發先知共使徒去佢個處、其中有的被佢殺死、有的被佢迫害嘅。
令開闢以來、所有流先知血嘅罪、要為呢代人是問。
自亞伯嘅血起、至到撒加利亞、死倒殿共壇中間嘅血止、我實在話你知、是必為呢代人是問𡃉。
你哋教法師有禍咯、因為你哋奪嘵知識個條鎖匙、自己唔入去、又阻住個的想入去嘅人。○
耶穌喺個處出嚟、個的讀書人、共法利賽人盤問佢、激佢多講。
埋伏嚟賍佢、想執佢口所講嘅。