個陣時，有幾萬人聚埋，彼此踹踏，耶穌先對佢嘅門生話，要提防𠵽唎㘔人嘅酵種，即係偽善呀。
冇遮掩嘅事，將來唔露出，隱藏嘅事，將來唔顯出𡃉。
所以你地喺黑暗處講嘅，必定喺光明處被人聽聞，你地喺密房向埋耳邊講嘅，必定喺屋背被人宣揚出嚟。
我嘅朋友，我話過你知，獨係殺你嘅身，後來不能做別樣嘅，唔使怕個的人。
但我指點你地，應當怕嘅，係怕殺身之後，又有權𢫕落地獄嘅，我實在話你知，應當怕嘅，就係呢個咯。
五隻雀仔，唔係賣得二分銀致咩，但係在上帝面前，一隻都唔忘記呀。
連你地嘅頭髮，都已經數過嘥。所以唔使怕，你更貴重過好多雀仔呀。
我又話你地知，但凡喺人面前認我嘅，人子喺上帝嘅天使面前亦必認佢。
喺人面前唔認我嘅，我喺上帝嘅天使面前，亦必唔認佢。
佢凡𢬿說話凌辱人子嘅，佢嘅罪可以赦得，惟係褻凟聖神嘅，就唔赦得咯。
人地拉你去到會堂，及官府掌權嘅人面前，你唔使掛慮點樣申訴，點樣講話。
因為個陣時，聖神必定指示你所當講嘅。
眾人之中，有個人對耶穌話，先生，請你吩咐我嘅兄弟，共我分開家業喇。
耶穌對佢話，朋友，乜誰立我做你地審事嘅官，或做分斷家業嘅呢。
就對眾人話，謹慎提防個貪心呀，因為人嘅生命，唔在乎佢所有嘅豐足呀。
就設譬喻對佢地話，有一個財主人，佢所有嘅田地，生產豐盛。
佢心中思想話，冇地方藏得我咁多土產，點樣好呢。
就話，我必要拆嘵我嘅倉，起過間更大嘅，噉樣，就藏得嘥我嘅土產及貨物咯。
以後對我靈魂話，靈魂呀，你有咁多貨物，積埋做得好多年嘅使用，可以安安逸逸，飲食快樂咯。
但上帝對佢話，愚蠢嘅人呀，今晚將向你攞番你嘅靈魂，噉就你所預備嘅歸乜誰呢。
凡有人為自己積財，但在上帝面前嘅，唔富厚嘅，都係噉樣呀。
耶穌對佢嘅門生話，所以我話你地知，唔使掛慮你嘅生命點得食，身體點得着。
生命貴過糧食，身體貴過衣裳呀。
試想吓個的老鴉，佢冇耕田，冇收割，冇倉冇庫，但上帝都養佢地，你地豈唔係貴重過雀好多咩。
你地乜誰能𢬿思慮延多一刻生命呢。
倘若至細嘅事，尚且唔做得嚟，使乜掛慮別樣呢。
試想吓個的百合花，點樣生長，佢冇勞苦，冇織紡，但我話你地知，當所羅門至華美之時，佢嘅穿着都唔及得呢的花一朶呀。
個的草，今日喺野地，明日就丟落火爐嘅咯，上帝都俾噉樣穿着佢，何况你地小信嘅人呢。
而且你地唔使打算點得食，點得飲，又唔使掛慮。
因為個的物件，都係呢世上各國嘅人所求，你地天父，知到你要用嘅。
但係要求上帝嘅國，呢的物件，就俾過你咯。
你細小嘅羣呀，唔使怕，因為你嘅天父，歡喜𢬿個國賜過你地。
賣嘵你地所有嘅嚟周濟人，為自己預備在天永遠唔爛嘅袋，唔使得盡嘅財，即係賊唔到得，虫唔蛀得壞個處。
因為你嘅貨財所在，你心亦在個處咯。
要束緊你地腰帶，點着你地嘅燈。
又要學人地等佢嘅家主，從婚筵番嚟，嚟到打門，可以即時開過佢噉咯。
家主嚟到，見僕儆醒，個的僕就有福咯，我實在話你知，個家主是必叫佢地坐埋筵席，自己就束起帶，行前嚟服事佢地。
或二更番嚟，或三更番嚟，睇見噉樣，個的僕就有福咯。
倘若家主知賊幾時嚟，就必定儆醒，唔俾佢挖爛個間屋，呢的係你知嘅喇。
所以你地亦要預備，因為你地估唔到嘅時侯，人子就嚟咯。
彼得對佢話，主，設呢個譬喻，為我地呀，抑或為眾人呢。
主話，邊個係忠心智慧嘅管家，即係家主可以叫佢管理家人，依時分發米糧嘅呢。
佢地家主嚟到，見佢做噉樣，個僕就有福咯。
我實在話你知，家主將立佢管嘥所有嘅家業咯。
倘若個僕心內話，我嘅家主遲吓致嚟，就起首打個的僕婢，又飲又食，而且大醉。
就喺唔估到嘅日子，唔知到嘅時候，個僕嘅主將噲到，就斬死佢，定佢同唔信嘅人一類。
有個僕知佢主人嘅旨意，唔預備，又唔依佢嘅旨意嚟做，受打是必多。
若唔知到嘅，做出應打嘅事嚟，受打是必少，因為但凡俾多過佢嘅，必定向佢攞番多，托佢多嘅，必定向佢取番多呀。
我嚟到，𢬿火丟落世上，倘若已經燒着，豈唔係我所想嘅咩。
但我有應受嘅洗禮，呢的禮未成，點唔悲切呢。
你地以為我嚟，俾世上平靜咩，我話你地知唔係，倒轉有分爭呀。
因為從今以後，一家五個人是必分爭，三共兩爭，兩共三爭。
父共子爭，子共父爭，母共女爭，女共母爭，姑共媳爭， 媳共姑爭呀。
耶穌就對大眾話，你地見西邊有雲起，就話，上下有雨落，果然係有。
你地睇見南風吹嚟，就話，上下暑熱咯，果然又有。
偽善嘅人呀，你噲審度天地嘅氣色，做乜唔噲審度呢個時候呢。
做乜自己又唔審度邊樣係公平嘅呢。
你共告你嘅人去見官府，喺路上個時，應當盡心求佢解脫，恐怕拉你去交過審事官，個審事官發俾差，個差擠你落監。
我話你知，毫釐未曾還清，斷不能出得個處呀。