個陣時有幾萬人聚埋、彼此踹踏、耶穌先對門生話、要提防法利賽人嘅酵種、即係偽善呀。
冇遮掩嘅事、將來唔露出隱藏嘅事、將來唔顯出𡃉。
所以你哋係黑暗處講嘅、必定喺光明處被人聽聞、你哋喺密房向埋耳邊講嘅、必定喺屋背被人宣揚出嚟。
我嘅朋友、我話過你知、獨係殺你嘅身、後來不能做別樣嘅、唔使怕個的人。
但我指點你哋、應當怕嘅、係怕殺身之後、又有權𢫕落地獄嘅、我實在話你知、應當怕嘅、就係呢位咯。
五隻雀仔、唔係賣得二分銀致咩、但係在上帝面前、一隻都唔忘記呀。
連你哋嘅頭髮、都已經數過嘥、唔使怕、你更貴重過好多雀仔呀。
我又話你哋知、但凡喺人面前認我嘅、人子喺上帝嘅天使面前亦必認佢。
喺人面前唔認我嘅、我喺上帝嘅天使面前、亦必唔認佢。
但凡𢬿說話凌辱人子嘅、佢嘅罪可以赦得、惟係褻瀆聖靈嘅、就唔赦得咯。
人哋拉你去到會堂、及官府掌權嘅人面前、你唔使掛慮點樣申訴、點樣講話。
因為個陣時、聖靈必定指示你所當講嘅。○
眾人之中、有一個對耶穌話、老師、請你吩咐我嘅兄弟、共我分開家業喇。
耶穌對佢話、朋友、乜誰立我做你哋審事官、或做分斷家業嘅呢。
就對眾人話、謹愼提防貪心、因為人嘅生命、唔在乎佢所有嘅豐足呀。
就設譬喻對佢哋話、有一個財主人、佢所有嘅田地、生產豐盛。
佢心中思想話、冇地方藏得我咁多土產、點樣好呢。
就話、我必要拆嘵我嘅倉、起過間更大嘅、噉樣、就藏得嘥我嘅穀及貨物咯。
以後對我靈魂話、靈魂呀、你有咁多貨物、積埋做得好多年嘅使用、可以安安逸逸、飲食快樂咯。
但上帝對佢話、愚蠢嘅人呀、今晚將向你攞番你嘅靈魂、噉就你所預備嘅歸乜誰呢。
凡有人為自己積財、但在上帝面前、唔富厚嘅、都係噉樣呀。○
耶穌對門生話、所以我話你哋知、唔使掛慮你嘅生命點得食、身體點得著。
生命貴過糧食、身體貴過衣裳呀。
試想吓個的老鴉、佢冇耕田、冇收割、冇倉冇庫、但上帝都養佢哋、你哋豈唔貴重過雀好多咩。
你哋乜誰能𢬿思慮長多一刻生命呢。
倘若至細嘅事、尚且唔做得嚟、使乜掛慮別樣呢。
試想吓個的百合花、點樣生長、佢冇勞苦、冇織紡、但我話你哋知、當所羅門至華美之時、佢嘅穿著都唔及得呢的花一朶呀。
個的草、今日喺野地、明日就丟落火爐嘅咯、上帝都俾噉樣穿著佢、何况你哋小信嘅人呢。
而且你哋唔使打算點得食、點得飲、又唔使憂慮。
因為個的物件、都係呢世上各國嘅人所求、你哋天父、知到你要用嘅。
但係要求上帝嘅國、呢的物件、就另外俾過你咯。
你細小嘅群呀、唔使怕、因為你嘅父、歡喜𢬿個國賜過你哋。
賣嘵你哋所有嘅嚟周濟人、為自己預備在天永遠唔爛嘅袋、唔使得盡嘅財、即係賊唔到得、虫唔蛀得壞個處。
因為你嘅貨財所在、你心亦在個處咯。○
要束緊你哋腰帶、點著你哋嘅燈。
又要學人哋等待家主、從婚筵番嚟、嚟到打門、可以即時開過佢噉咯。
家主嚟到、見僕儆醒、個的僕就有福咯、我實在話你知、個家主是必叫佢哋坐埋筵席、自己就束起帶、行前嚟服事佢哋。
或二更番嚟、或三更番嚟、睇見噉樣、個的僕就有福咯、
倘若家主知賊幾時嚟、就必定儆醒、唔俾佢挖爛個間屋、呢的係你知嘅喇。
你哋亦要預備、因為你哋估唔到嘅時候、人子就嚟咯。○
彼得對佢話、主、設呢個譬喻、為我哋呀、抑或為眾人呢。
主話、邊個係忠心智慧嘅管家、即係家主可以叫佢管理家人、依時分發糧食嘅呢。
佢哋家主嚟到、見佢噉樣做、個僕就有福咯。
我實在話你知、家主將立佢管嘥所有嘅家業咯。
倘若個僕心內話、我嘅家主遲吓致嚟、就起首打個的僕婢、又飲又食、而且大醉。
就喺唔估到嘅日子、唔知到嘅時候、個僕嘅主將噲到、就斬死佢、定佢同唔信嘅人一類。
有個僕知佢主人嘅旨意、唔預備、又唔依佢嘅旨意嚟做、受打是必多。
若唔知到嘅、做出應打嘅事嚟、受打是必少、因為但凡俾多過佢嘅、必定向佢攞番多、托佢多嘅、必定向佢取番多呀。○
我嚟到、𢬿火丟落世上、倘若已經燒著、豈唔係我想嘅咩。
但我有應受嘅洗禮、呢的禮未成、點唔悲切呢。
你哋以為我嚟、俾世上平靜咩、我話你哋知唔係、反轉有分爭呀。
因為從今以後、一家五個人是必分爭、三共兩爭、兩共三爭。
父共子爭、子共父爭、母共女爭、女共母爭、姑共媳爭、媳共姑爭呀。○
耶穌就對大眾話、你哋見西邊有雲起、就話、上下有雨落、果然係有。
你哋睇見南風吹嚟、就話、上下暑熱咯、果然又有。
偽善嘅人呀、你噲審度天地嘅氣色、做乜唔噲審度呢個時候呢。
做乜自己又唔審度邊樣係公平嘅呢。
你共告你嘅人去見官府、喺路上個時、應當盡心求佢解脫、恐怕拉你去交過審事官、個審事官發俾差、個差擠你落藍。
我話你知、毫釐未曾還清、斷不能出得個處呀。