個陣時同埋喺處嘅，有的人話耶穌知，彼拉多𢬿加利利人嘅血，混雜喺佢嘅祭物處。
耶穌答佢地話，因為呢的加利利人，受噉嘅害，你就估佢嘅罪，越發大過眾加利利人咩。
我話你地知，唔係，若你地唔悔攺，大眾亦必滅亡呀。
從前西羅亞塔跌嘵，磧死嘅十八個人，你地估個的人，比較喺耶路撒冷住嘅人，越發有罪咩。
我話你地知，唔係，若你地唔悔攺，大眾亦必滅亡呀。
就講呢的譬喻話，有個人，𢬿無花果樹，種落佢嘅菩提園，後來嚟到，喺樹上揾果子，唔揾得倒。
就對看園嘅人話，我三年都嚟，喺呢樖無花果樹揾果子，總唔揾得倒，斬嘵佢喇，做乜俾佢廢嘵個的地呢。
看園嘅答話，主，今年由得佢，等我周圍掘開嚟培糞。
或者可以有果結，倘若冇然後致斬嘵佢喇。
當安息日，耶穌喺一間會堂教緊人。
喺個處，有個女人被鬼迷，病嘵十八年，背駝總唔伸得直。
耶穌睇見，就叫佢嚟對佢話，女人呀，你嘅病解甩咯。
就𢬿隻手按吓佢，個女人即時伸得直腰，稱讚上帝。
管理會堂嘅睇見耶穌當安息日醫人，就好嬲，答大眾話，有六日應該做工夫，個六日嚟得受醫，但安息日就唔好嚹。
主答佢話，偽善嘅人呀，當安息日，你地邊個唔喺欄裏頭，解佢嘅牛或驢，拉去俾水佢飲呢。
何况呢個女人，係亞伯拉罕嘅女，撒但已經綁住佢十八年，唔應當喺安息日，解甩佢嘅結咩。
耶穌講出呢的事，個的對敵嘅人，大家都見羞愧，但羣眾因耶穌做咁多榮顯嘅事，就好歡喜。
耶穌又話，上帝嘅國，好似乜野呢，又𢬿乜野嚟比較佢呢。
好似一粒芥菜種，被人𢬿嚟撒落佢嘅園，長大起嚟，成嘵一樖大樹，個的空中嘅雀鳥，住在佢枝上呀。
又話，我𢬿乜野嚟比較上帝嘅國呢。
好比酵種，個女人𢬿嚟藏埋三斗麵粉裏頭，等佢發起嘥酵嚟。
耶穌向住耶路撒冷去，經過各城各鄉，一路教訓人。
有個人對耶穌話，主呀，得救嘅人係少咩。
耶穌對佢地話。盡力爭入窄門喇，我話你地知，因為好多想入唔入得嘅呀。
及家主起身閂埋門之後，你地企倒外出打門話，主呀，主呀，開門過我地喇，佢將答你地話，我唔知你地喺邊處嚟嘅。
個陣時，你地就噲話，我地也曾喺你面前飲食，你亦喺我地街上教訓。
佢將話，我話你地知，我唔知你喺邊處嚟嘅，你行惡嘅眾人，離開我去喇。
你睇見亞伯拉罕，以撒，雅各，與及眾先知，都喺上帝嘅國，惟獨自己被趕逐出外個時，就必定咬牙切齒嚟啼哭咯。
喺東邊西邊，南邊北邊，將有人嚟喺上帝嘅國坐席。
但有的尾後嘅人，將做先頭，先頭嘅人，將做尾後呀。
個日有的𠵽唎㘔人，嚟對耶穌話，你離開呢處去喇，因為希律想殺你呀。
耶穌對佢地話，你去話過個隻狐狸知，今日明日，我要趕鬼醫人，到第三日，我就完全咯。
雖然係噉樣，今日明日及後日，我必要去咯，因為先知，唔得在耶路撒冷之外死亡𡃉。
耶路撒冷呀，耶路撒冷呀，你時時殺個的先知，𢬿石打個的奉命到你處嘅人，我已經幾多回，想聚集你嘅仔女，好似鷄乸聚集佢嘅仔喺翼下噉[口月貳]，但你地唔肯。
你地嘅屋，將留落為廢地嘅，我實在話你地知，從今以後，你地唔再見我，等到你地話，托上主名嚟嘅有福個時囉。