當時，有好多收稅嘅共罪人，嚟近耶穌處，聽佢講。
𠵽唎㘔人，共讀書人，譏彈耶穌話，佢接納個的罪人，同埋食飯呀。
耶穌對佢地講呢個譬喻話。
你地之中，邊個人有一百隻羊，失嘵一隻，唔留落個九十九隻喺曠野，就去揾個隻失嘵嘅，至到揾倒呢。
揾倒，就好歡喜，托落佢嘅膊頭。
番到屋企，就請埋朋友共鄰舍嚟，對佢地話，同埋我歡喜喇，因為我揾番失嘵個隻羊咯。
我話你地知，好似噉樣，有一個罪人悔攺，在天上替佢歡喜，多過九十九個義人，唔使悔攺𡃉。
抑或邊個女人，有十個銀錢仔，失嘵一個，佢唔點着燈打掃屋裏，子細嚟揾，至到揾倒咩。
揾倒，就請埋佢嘅朋友鄰舍嚟話，同埋我歡喜喇，因為我揾番失嘵個銀錢仔咯。
我話你地知，好似噉樣， 有一個罪人悔攺，在上帝嘅天使面前，都替佢歡喜呀，
又話，有一個人，有兩個仔。
個細仔對父親話，亞爸，𢬿我所應得嘅家業分過我喇。個父親就同兩個仔分開家業。
冇幾多日，個細仔聚埋所有嘅野，去好遠地方遊耍，喺個處好放蕩，花散佢嘅家業。
佢一的都散清之時，個處地方有大饑荒，佢就冇得使。
噉就去投靠個處地方一個人，個個人打發佢去佢嘅田餵豬。
佢至到要𢬿豬所食嘅豆殼嚟充饑，都冇人俾野佢食。
個陣時，佢醒悟起嚟話，我父親咁多僱工嘅人，佢糧食都有剩，但我就餓到要死咯。
我要起身，去到我父親個處，對佢話，亞爸，我得罪天，又得罪你。
從今以後，唔敢當做你嘅仔，俾我做你一個工人噉罷喇。
噉就起身，歸到佢父親處，重離好遠。佢父親睇見，就可憐佢，走前去抱住佢條頸，共佢親嘴。
個仔就對佢話，亞爸，我得罪天，又得罪你，從今以後，唔敢當叫做你嘅仔咯。
佢父親對個的僕話，攞至好嘅長衫俾佢着，攞戒指戴落佢手指，攞鞋着落佢嘅脚。
拉個隻肥牛仔去劏，等我地快樂嚟食。
因為我呢個仔，死嘵又番生，失嘵又得番𡃉。噉就佢地起首快樂。
但佢個大仔喺田處，及至番嚟，將近到屋，聽聞作樂跳舞嘅聲。
就叫一個後生嚟問吓，因乜野事幹呢。
個後生對佢話，你細佬番嚟，你父親因為得番佢，冇病痛，所以劏嘵個隻肥牛仔。
個大仔就嬲起嚟，唔肯入去，佢父親出嚟勸佢。
佢就答個父親話，我服事你咁多年，總冇背逆你嘅吩咐，你都未曾俾一隻羊仔過我，等我共朋友同埋快樂。
惟係你呢個仔，同妓婦吞嘥你嘅家業，佢一到，你就為佢劏個隻肥牛仔唎咩。
個父親對佢話，我嘅仔呀，你時時同埋我，我所有嘅野，一的都係你嘅哩。
但你呢個細佬，死嘵又番生，失嘵又揾番嘅，故此我地應該歡喜快樂嚹。