耶穌都對佢嘅學生話：有個財主佬，有一個管家，有人𢬿佢使主人家業嘅事嚟，對佢家主講。
家主就叫佢嚟，對佢話：我聽見論及你嘅，個的點樣呢？你家吓交出個帳目嚟，因為你唔得仍舊做管家咯。
個管家自己想吓，話：東家革我管家嘅職，後來點樣呢？耕田又冇氣力，乞食又冇面子。
嗯，我知點樣咯，若係噉樣做，就革嘵我管家嘅職之後，人地是必接我，喺佢屋企咯。
噉就凡係欠佢主人嘅債嘅，一一叫佢嚟，對先到嘅話：你欠我主嘅幾多呢？
佢答話： 我欠一百斗油呀； 管家對佢話：擰你嘅單嚟，快的坐倒處，寫欠五十罷喇。
又對第二個話：你欠幾多呢！佢話：我欠一百擔麥呀；管家話：擰你嘅單嚟，寫欠八十罷喇。
家主睇見嗰個不義管家做事咁精，就稱讚佢；因為呢世界嘅人，論及世事，比較光明嘅人，重精呀。
我都話你知，𢬿非義嘅錢財交結朋友，就到你喪失個陣時，接你入永遠嘅屋咯。
有人在至小嘅忠心，就多嘅亦忠心；在至小嘅不義，就多嘅亦不義呀。
若係非義嘅錢財你地都唔忠心，就邊個𢬿真實嘅嚟，交托俾你地呢？
若係人地喺嘅野你都唔忠心，就邊個𢬿你自己嘅嘢嚟俾你呢？
冇一個僕能服事兩個主𡃉，或係憎呢個，愛嗰個，或係睇重呢個，睇輕嗰個；你唔做得服事上帝，又服事財帛呀。
個的貪錢嘅𠵽唎㘔人都聽見呢的說話，就笑佢。
耶穌對佢話：你係喺人面前稱讚自己係公義嘅，但上帝知道你嘅心噃；因為人睇上嘅，上帝厭惡呀。
自律法與及先知師至到約翰；以後，上帝嘅國有福音，道理傳揚出嚟，人人都出力入去咯。
廢去天地, 比較廢少律法一畫，都重容易呀。
但凡出佢嘅老婆，娶返第二個，係行姦淫呀；娶人地所出嘅，又係行姦淫呀。
有個財主佬，著紅袍共幼細嘅布，日日繁華快樂。
又有個窮佬，名叫拉撒路，生得滿身瘡，的人地𢬿佢嚟擠倒財主佬門口處，
想𢬿財主佬跌落檯下底，個的濕碎嘅野嚟食飽；個的狗又嚟舐佢嘅瘡。
後來嗰個窮佬死嘵，上帝嘅使者捧佢，擠倒亞伯拉罕嘅襟懷；財主佬又死嘵葬埋。
佢喺陰間痛苦個陣時，擔高頭，遠遠睇見亞伯拉罕及拉撒路喺佢襟懷個處；
就大聲叫，話：我嘅祖公亞伯拉罕呀，可憐我，打發拉撒路𢬿手指尖點的水嚟涼吓我條脷喇，因為我喺呢處火焰中間好辛苦呀。
但亞伯拉罕話：仔啊，你應該記念，你生前曾受你嘅福，拉撒路受艱難；而家佢受安慰，你受苦楚咯。
唔止噉添呀，喺你共我中間，有一條大坑隔住，想喺呢處過去你個處，唔做得；想喺你個處過嚟我呢處，又唔做得𡃉。
佢就話：若係噉樣，就求我嘅祖公，打發拉撒路去我老竇屋企。
因為我重有五個兄弟，使拉撒路為佢作證，免至又嚟到呢處受苦嘅地方喇。
亞伯拉罕對佢話：佢有摩西共先知師，自己就好聽佢哩。
但佢話：唔係噉樣，我嘅祖公亞伯拉罕呀，若有死人番生，去到佢個處，就是必悔改咯。
亞伯拉罕對佢話：若唔聽摩西共先知師嘅話，就有死人番生，佢亦唔聽勸嘅哩。