耶穌又對佢地講譬喻，係指示人當時時祈禱，唔好癐。
就話，喺一個城，有一個審事官，佢唔怕上帝，又冇禮貌待人嘅。
喺嗰個城，有一個寡婦，入去見佢話，有人共我做仇敵，求你伸我嘅寃喇。
個官好耐都唔肯，後來自己心裏話，雖然我唔怕上帝，又冇禮貌待人。
但因為呢個寡婦攪擾我，我要替佢伸寃，免致佢時常嚟嘈吵我咯。
主話，你地聽個不義嘅官，所講嘅說話。
就上帝所揀擇嘅人，日夜祈禱，雖然忍耐好久，豈有到底唔共佢伸寃嘅咩。
我話你地知，上帝好快共佢地伸寃嘅，雖然係噉樣，人子嚟到，豈見有信佢嘅人在世上咩。
有的人恃自己係公義，就睇輕別人嘅，所以耶穌設呢的譬喻，對佢地話。
有兩個人，上殿堂祈禱，一個係𠵽唎㘔人，一個係收稅嘅人。
個個𠵽唎㘔人，另自企倒處祈禱話，上帝呀，我感謝你，因為我唔似別人搶奪嘅，不義嘅，行淫嘅，又唔似呢個收稅嘅。
我每七日之期，兩回禁食，𢬿所入嘅，嚟十分納一呀。
個收稅嘅，遠遠企倒處，唔噉擔高頭嚟望天，就自己泵胸話，上帝呀，可憐我有罪嘅人。
我話你地知，呢個人去歸，比較個𠵽唎㘔人，越發得稱為義呀，因為自高嘅，必降為卑，自卑嘅，必得升高呀。
有人帶個的嫩仔嚟耶穌處，等佢摩吓，門生睇見，就責成佢地。
但耶穌叫個的嫩仔嚟話，由得嫩仔嚟我處，唔好禁止佢，因為在上帝國嘅，正係噉樣嘅人呀。
我實在話你地知，但凡承受上帝國嘅人，唔似細蚊仔噉樣，必唔入得個國。
有一個官，嚟問耶穌話，良善嘅先生呀我要做乜野，致得永生呢。
耶穌對佢話，你為乜稱我良善呢，除上帝之外，冇一個係良善𡃉。
各條誡命，你都曉得哩，即係唔好行淫，唔好殺人，唔好偷野，唔好做假見證，要孝敬你嘅父母。
佢話，呢各條誡，我自小都守住咯。
耶穌聽聞呢的，就對佢話，你重少一件，你𢬿所有嘅野賣嘵，嚟救濟窮人，就是必有財帛喺天咯，又嚟跟隨我喇。
個人聽見，就好憂愁，因為佢係財主𡃉。
耶穌見佢咁憂愁就話，財主人入上帝嘅國，係好難咯。
駱駝穿過針眼，比較財主人入上帝嘅國，更容易呀。
聽聞嘅人話，噉就邊一個能得救呢。
耶穌話，在人所不能做得嘅，在上帝就做得呀。
彼得話，我地已經舍嘵所有嘅野，嚟跟隨你咯。
耶穌對佢地話，我實在話你地知，有人因為上帝嘅國，離嘵屋宇，或父母，或兄弟，或妻兒嘅。
喺今世唔得倒好多倍，喺來世唔得倒永生，總有噉嘅呀。
耶穌帶埋十二個門生對佢地話，我地上耶路撒冷，在先知所寫，論及人子嘅，樣樣都必得應驗嚹。
因為佢俾人地解佢過異邦人，就受戲弄凌辱，及口水唾佢。
𢬿鞭嚟打佢，又殺佢，到第三日，佢就番生咯。
呢的事，佢嘅門生唔曉得，而且呢的說話，係秘密嘅，佢地就唔識佢講乜野。
耶穌行近耶利哥個時，有一個盲眼嘅人，坐倒路邊乞食。
佢聽聞大眾行過，就問吓係乜野事。
有人對佢話，拿撒勒人耶穌經過呀。
佢就大聲喓話，大闢嘅子孫耶穌，可憐我呀。
前頭行嘅人，就責成佢，叫佢咪出聲，但佢越發大聲話，大闢嘅子孫，可憐我呀。
耶穌就歇住脚，吩咐人帶佢嚟，嚟到近，就問佢話，你想我替你做乜野呢。
佢話，主，我想睇得見呀。
耶穌對佢話，睇得見咯，你嘅信醫好你咯。
佢即時睇得見，跟隨耶穌，稱讚上帝，眾百姓見呢件事，亦稱讚上帝。