耶穌又對佢哋講譬喻、係指示佢當時時祈禱、唔好癐。
就話、喺一個城、有一個審事官、佢唔怕上帝又冇禮貌待人嘅。
喺個個城、有一個寡婦、入去見佢話、有人共我做仇敵、求你伸我嘅寃喇。
個官好耐都唔肯、後來自己心裏話、雖然、我唔怕上帝又冇禮貌待人。
但因為呢個寡婦攪擾我、我要共佢伸寃、免致佢時常嚟嘈吵我咯。
主話、你哋聽個不義嘅官、所講嘅說話。
就上帝所揀選嘅人、日夜祈禱、豈有到底唔共佢伸寃咩、都忍耐佢好久咯。
我話你哋知、上帝好快共佢哋伸冤嘅、雖然係噉樣、人子嚟到、豈見有信德在世上咩。○
有的人恃自己係公義、就睇輕別人嘅、所以耶穌設呢的譬喻對佢哋話。
有兩個人上殿堂祈禱、一個係法利賽人、一個係收稅嘅人。
個個法利賽人、另自企處祈禱話、上帝呀、我感謝你、因為我唔似別人搶奪嘅、不義嘅、行淫嘅、又唔似呢個收稅嘅。
我每七日之期、兩回禁食、𢬿所入嘅、嚟十分納一呀。
個收稅嘅、遠遠企處、唔噉擔高頭嚟望天、就自己泵胸話、上帝呀可憐我有罪嘅人。
我話你哋知、呢個人去歸、比較個法利賽人、越發得稱為義呀、因為自高嘅、必降為卑、自卑嘅、必得升高呀。○
有人帶的嫩仔嚟耶穌處、等佢摩吓、門生睇見、就責成佢哋。
但耶穌叫個的嫩仔嚟話、由得細伩仔嚟我處、唔好禁止佢、因為在上帝國嘅、正係噉樣嘅人呀。
我實在話你哋知、但凡承受上帝國嘅人、唔似細伩仔嘅樣、必唔入得個國。○
有一個官、嚟問耶穌話、良善嘅老師呀、我要做乜野、致得永生呢。
耶穌對佢話、你為乜稱我良善呢、除上帝之外、冇一個係良善𡃉。
各條誡命、你都嘵得哩、即係唔好行淫、唔好殺人、唔好偷野、唔好妄證、要孝敬你嘅父母。
佢話、呢各條誡、我自小都守住咯。
耶穌聽聞呢的、就對佢話、你重少一件、去賣嘥你所有嘅嚟周濟窮人、就是必有財帛喺天上、而且嚟跟從我。
個人聽見、就好憂愁、因為佢係財主嘅。
耶穌見佢就話、財主人入上帝嘅國、係好難咯。
駱駝穿過針眼、比較財主人入上帝嘅國、更容易呀。
聽聞嘅人話、噉就邊一個能得救呢。
耶穌話、在人所不能做得嘅、在上帝就做得呀。
彼得話、我哋已經舍嘵自己所有嘅嚟跟從你咯。
耶穌對佢哋話、我實在話你哋知、有人因為上帝嘅國、離嘵屋宇、或父母、或兄弟、或妻兒嘅。
喺今世唔得倒好多倍、喺來世唔得倒永生、總冇噉嘅呀。○
耶穌帶埋十二個門生對佢哋話、我哋上耶路撒冷、在先知所寫、論及人子嘅、樣樣都必得應驗。
因為佢俾人哋解佢過異邦人、就受戲弄凌辱、及口水唾佢。
𢬿鞭嚟打佢、又殺佢、到第三日、佢就復生。
呢的事、佢嘅門生唔曉得、而且呢的說話、係隱密嘅、佢哋唔識佢講乜野。○
耶穌行近耶利哥個時、有一個盲眼嘅人、坐倒路邊乞食。
佢聽聞大眾行過、就問吓係乜野事
有人對佢話、拿撒勒人耶穌經過呀。
佢就大聲喓話、大闢嘅子孫耶穌、可憐我呀。
前頭行嘅人、就責成佢、叫佢咪出聲、但佢越發大聲話、大闢嘅子孫、可憐我呀。
耶穌就歇住腳、吩咐人帶佢嚟、嚟近、就問佢話、你想我共你做乜野呢。
佢話、主、我想睇得見呀。
耶穌對佢話、可以睇見咯、你嘅信德醫好你咯。佢即時睇得見、跟從耶穌、歸榮上帝、眾百姓見呢件事、亦讚美上帝。