路加福音 19 · 1883《路加傳福音書》（粵語聯合譯本修訂本，香港教育大學）

耶穌入耶利哥，經過個時，

有一個人，名叫撒該，佢做收稅嘅頭人，係財主嘅。

佢想睇見耶穌係點樣嘅人，但係人多，唔睇得見，因佢身材矮細呀。

佢就走前去，爬上桑樹，等睇得見耶穌，因為耶穌將經過個處。

耶穌嚟到個處，擔高頭睇吓，對佢話，撒該呀，快的落嚟喇，因為今日，我要喺你屋企住呀。

佢就快的落嚟，歡喜迎接耶穌。

個的睇見嘅人，俱譏彈耶穌話，佢入罪人嘅屋歇宿，呀。

撒該就企處對主話，主呀，我所有嘅，擰一半嚟周濟窮人，若係訛詐過人嘅，就賠番四倍。

耶穌對佢話，今日得救嘅恩，降臨呢家咯，因為佢都係亞伯拉罕嘅子孫。

人子嚟，係揾個的喪失嘅人，嚟救佢呀。

佢哋聽聞呢啲說話之時，耶穌因為嚟近耶路撒冷，又因眾人估上帝嘅國，即時顯明，故此佢再講譬喻話，

有個尊貴嘅人，去好遠地方，想受封得國致番嚟。

就叫佢嘅僕十個嚟，俾十斤銀過佢，對佢哋話，你去做生意，等到我番嚟。

但佢嘅百姓憎惡佢，打發人隨後去話，我哋唔想呢個人做我嘅王呀。

個尊貴嘅人，受封得國番嚟，就吩咐人，叫個的託，落銀嘅僕嚟，等知到佢哋賺得幾多利錢。

第一個嚟話，主，你嘅一斤，已經賺得十斤咯。

個主就對佢話，好，良善嘅僕呀，至小嘅事，你既然忠心，可以管理十個城咯。

第二個嚟話，主，你嘅一斤，已經賺得五斤咯。

個主對佢話，你都可以管理五個城咯。

又有一個嚟話，主呀，睇吖，你個斤銀喺處，我俾手巾包住擠埋。

因為我怕你係嚴令嘅人，未曾擠落嘅，就要攞番，未曾撒種嘅，就要收割呀。

個主對佢話，惡僕呀，我就𢬿你嘅口供嚟判斷你，你知到我係嚴令嘅人，未曾擠落嘅就要攞番，未曾撒種嘅就要收割嘅咩。

噉做乜唔𢬿我嘅銀擠落銀舖，等我番嚟，就可以連本帶利攞番呢。

就吩咐側邊企處嘅人話， 攞番個斤銀，俾埋個個有十斤嘅喇。

眾人對佢話，主，佢已經有十斤咯。

主話，我話你知，但凡有嘅重要俾的佢添，冇嘅，就連佢所有嘅都要奪埋，

至於我個的仇敵，唔想我做佢王嘅，拉佢嚟，喺我面前殺佢。

耶穌講完呢的，就向前行，上去耶路撒冷。

嚟到伯法基伯大尼，近住個山，名叫橄欖山，佢就打發兩個門生話。

你去對面個條村，入去個時，必遇着一隻驢仔綁倒處，向來未有人騎過嘅，你哋就解甩拉佢嚟。

倘若有人問你，為乜事解個隻驢，你就噉話，主要用佢。

受打發嘅人去，果然遇着照依耶穌對佢哋所講嘅。

佢哋解緊驢個時，驢嘅主人就問話， 解個隻驢做乜野呢。

佢哋話，主要用佢，就拉佢到耶穌處。

𢬿自己嘅衫，鋪落驢背上，扶耶穌騎上去。

佢行個陣時，眾人𢬿自己嘅衫，鋪落路上。

嚟近耶路撒冷，將落橄欖山，大眾門生，因所有見過嘅奇能，就好歡喜，大聲讚美上帝。

話托主名嚟嘅王，有福咯，在天有和平，在至高處有榮光。

眾人之中，有的𠵽唎㘔人，對耶穌話，老師，責成你嘅門生喇。

耶穌就答話，倘若呢的人閉口無言，個的石頭就噲出聲咯。

佢已經行近耶路撒冷，睇見個城，就為佢哭起嚟。

話，若係你先日，即係喺你嘅日子，曉得關你平安嘅事，就好咯，但如今隱藏埋，你嘅眼唔得見咯。

因為日子一到，你嘅仇敵，是必築個泥城，周圍圍住你，四面困住你。

而且剿平你共你裏頭嘅子民，又在你處，唔留一嚿石，踏住第二嚿石之上，因為你唔知睇顧嘅時候呀。

耶穌就入殿堂，趕個的喺處買賣嘅人。

對佢哋話，聖經有寫，我屋係祈禱嘅屋，但你哋𢬿佢嚟做賊巢咯。

耶穌日日喺殿堂教人，眾祭司長，讀書人，及民間尊貴嘅，都想殺佢。

但唔揾得出點樣法子，因眾百姓好留心聽佢講呀。