當時該撒亞古士督，有旨降下，吩咐天下嘅人，註落戶口冊。
居里扭做敘利亞總督個時，呢的註冊嘅事，始初頒行。
眾人去註冊，各歸自己嘅城。
約瑟都離嘵加利利嘅拿撒勒，上到猶太省大闢城，名叫伯利恒嘅，因佢係大闢家嘅子孫呀。
就同埋佢聘定嘅妻馬利亞，一齊註冊，個陣時，馬利亞已經懷嘵胎咯。
佢地住在個處之時，馬利亞生產嘅期已到。
就生個長頭仔，使塊布包住，擠倒馬槽處，因為佢地在客店冇地方。
喺個處野外，有看羊嘅人，夜晚輪流看守羊羣。
忽然間，主嘅使者臨近佢地，主嘅榮光，周圍照住佢地，佢就十分驚慌。
天使對佢地話，唔使慌，我報個大歡喜嘅好消息過你知，關大眾百姓𡃉。
因為今日喺大闢嘅城，為你地生個救世者，就係主基督。
你將揾着個細蚊仔，俾布包住，瞓倒馬槽處，個的就係記號咯。
忽然間，有大隊天軍，同埋個天使，讚美上帝話。
在天上榮光，歸番上帝，在地下有和平，人得恩澤。
個的天使離開佢升天去，看羊嘅人相講話，我地去到伯利恒，睇吓呢的事，即係主令我地知嘅[口月貳]。
就快的去到，揾倒馬利亞共約瑟，又睇見個細蚊仔瞓倒馬槽處。
已經睇見，就將天使所講過佢知個細蚊仔嘅事，遠近傳開。
凡聽聞看羊人所講嘅，個個都見出奇。
馬利亞擠埋呢的說話喺心嚟想吓。
看羊嘅人，因為所見所聞，都照依天使所講嘅，噉就歸榮讚美上帝，番去歸。
到第八日，為個細蚊仔行割禮，攺佢嘅名叫做耶穌，即係唔曾懷胎個時，天使所攺落嘅。
馬利亞嘅潔淨日期已經滿，照依摩西律法，就抱個細蚊仔上耶路撒冷，獻佢過上主。
照依主嘅律法所載話，凡初胎嘅男仔，要歸上主，叫做聖物，
又照依主嘅律法所講，𢬿兩隻斑鳩，或兩隻白鴿仔嚟獻祭。
在耶路撒冷有個人，名叫西面，佢公義敬虔，平日仰慕個個安慰以色列百姓嘅，聖神嚟感動佢。
佢曾得聖神默示話，未死之時，必定睇見上主嘅基督。
個陣時，佢被聖神感動，入到殿堂，適值耶穌父母，抱細蚊仔入嚟，想照律法去做。
西面兩手抱起個細蚊仔，讚美上帝話。
主呀，如今可以照依你講，釋放你個僕，安安樂樂過世咯。
因為我親眼睇見你嘅救主。
即係你在萬民之前所預備嘅。
佢係做光，嚟照異邦嘅人，亦做你以色列民嘅榮耀。
約瑟共個細蚊仔嘅母親，見佢所講及耶穌嘅，以為出奇。
西面祝福佢地，對佢嘅母親馬利亞話，呢個細蚊仔被主設立，令以色列好多人，或興起，或衰敗，做譏笑嘅話柄。致令多人嘅意念露出嚟，又有把劍㓤穿你自己嘅心。
又有個女先知，叫做亞拿，係亞設支派，法內力嘅女，年紀老大，少年出嫁，同丈夫住嘵七年。
佢做寡婦，大約八十四年，都唔離開殿堂，禁食祈禱，日夜服事上帝。
個陣時，就行前嚟讚美上主，又將呢個細蚊仔嘅事，講過凡在耶路撒冷，想望得救嘅人聽。
約瑟馬利亞遵主律法，做完各樣嘅事，就去歸加利利拿撒勒，自己嘅村鄉。
個個細蚊仔漸漸長大，精神壯健，智慧充滿，上帝嘅恩典照顧佢。
年年逾越節，佢父母去耶路撒冷。
耶穌十二歲個時，佢地都遵節期嘅例，上耶路撒冷。
節期滿嘵，大眾番去歸，個細蚊仔耶穌，重喺耶路撒冷，佢老母共約瑟都唔知到，
估佢必喺同行嘅人之中。已經行嘵一日路，就喺親戚相識之中查問。
唔遇得着，就番去耶路撒冷揾佢。
三日後，遇着佢喺殿堂裏頭，坐倒先生中間，一面聽，一面問。
聽聞嘅人，都驚奇佢咁聰明，又咁噲對答。
約瑟共馬利亞睇見佢，就見出奇，佢母親話，我嘅仔呀，做乜噉樣待我地呢，你父親共我，傷心嚟揾你呀。
耶穌對佢地話，使乜揾我呢，豈唔知我應該喺我父親個處咩。
佢地唔明佢所講嘅說話。
耶穌同埋佢地番落拿撒勒，順從父母，佢母親𢬿呢的事，擠嘥落心處。
耶穌年紀越大，越發智慧，又越發得上帝共人嘅恩典。