當時該撒亞古士督、有旨降下、吩咐天下嘅人、註落戶口冊。
居里扭做敘利亞總督個時、呢的註冊嘅事、始初頒行。
眾人去註冊、各歸自己嘅城。
約瑟都離嘵加利利嘅拿撒勒、上到猶太省大闢城、名叫伯利恆、因佢係大闢家嘅子孫、
就同埋所聘定嘅妻馬利亞、一齊註冊、個陣時、馬利亞已經懷胎咯。
佢哋住在個處之時、馬利亞生產嘅期已到。
就生個長子、使塊布包住、擠落馬槽處、因為佢哋在客店冇地方。○
喺個處野外、有看羊嘅人、夜晚輪流看守羊群、
主嘅使者臨近佢哋、主嘅榮光、周圍照住佢哋、佢就十分驚慌。
天使對佢哋話、唔使慌、我報個大歡喜嘅好消息過你知、關大眾百姓𡃉。
因為今日喺大闢嘅城。為你哋生個救世者、即係主基督。
你將搵著一個嫩仔、俾布包住、瞓倒馬槽處、個的就係記號咯。
忽然間、有大隊天軍、同埋個天使讚美上帝話。
在天上榮光歸番上帝、在地下和平、人得恩澤。
個的天使離開佢哋升天、看羊嘅人相講話、我哋去到百利恆，睇吓呢的事、即係主令我哋知嘅、
就快的去到、搵著馬利亞共約瑟、又見個嫩仔瞓倒馬槽處。
已經見過、就將天使講佢知個嫩仔嘅事。遠近傳開。
凡聽聞看羊人所講嘅、個個都見出奇。
馬利亞擠埋呢的說話喺心嚟想吓。
看羊嘅人、因為所見所聞、都照依天使所講嘅、就歸榮讚美神番去歸。
到第八日、為個嫩仔行割禮、改佢名做耶穌、即係唔曾懷胎個時、天使所改落嘅。○
佢哋嘅潔淨日期已經滿照依摩西律法、就抱個嫩仔上耶路撒冷、獻佢過主。
依主嘅律法所載話、凡初胎嘅男仔、要歸主、叫做聖物、
又依主嘅律法所講、𢬿兩隻斑鳩、或兩隻白鴿仔嚟獻祭。○
在耶路撒冷有個人、名叫西面、佢係公義敬虔嘅、平日仰慕個個安慰以色列百姓嘅、聖靈嚟感動佢。
佢曾得聖靈默示話、未死之時、必定睇見主嘅基督。
個陣時、佢被聖靈感動、入到殿堂、適值耶穌父母、抱嫩仔入嚟、想照律法去做。
西面抱起個嫩仔、讚美上帝話。
主呀、如今可以照依你講、釋放你個僕、安安樂樂過世咯。
因為我親眼得見你所立嘅救主。
即係你在萬民之前所預備嘅。
佢係做光嚟照異邦人、亦做你以色列民嘅榮耀。○
耶穌嘅父母、聽見佢所講及耶穌嘅、以為出奇。
西面祝福佢哋、對佢母親馬利亞話、呢個嫩仔被主設立、令以色列好多人、或興起、或衰敗、做譏笑嘅話柄。
致令多人嘅意念露出嚟、又有把劍㓤穿你自己嘅心。○
又有個女先知、叫做亞拿、係亞設支派、法內力嘅女、年紀老大、少年出嫁、同丈夫住嘵七年。
佢做寡婦、已經八十四年、都唔離開殿堂、禁食祈禱、日夜服事上帝。
個陣時、就行前嚟讚美上帝、又將呢個嫩仔嘅事、講過凡在耶路撒泠、想望得救嘅人聽。○
約瑟馬利亞遵主律法、做完各樣事、就去歸加利利拿撒勒、自己嘅村鄉。
個嫩仔漸漸長大壯健、智慧充滿、上帝嘅恩典照顧佢。○
年年逾越節、佢父母去耶路撒冷。
耶穌十二歲個時、佢哋都遵節期嘅例上去。
節期滿嘵、大眾番去歸、個嫩仔耶穌重喺耶路撒冷、佢父母都唔知到。
估佢必喺同行嘅人之中、已經行嘵一日路、就喺親戚相識之中查問。
唔遇得著、就番去耶路撒冷搵佢。
三日後、遇著佢喺殿堂裏頭、坐倒先生中間、一面聽、一面問。
聽聞嘅人、都驚奇佢咁聰明、又咁噲對答。
約瑟共馬利亞睇見佢、就見出奇、佢母親對佢話、仔呀、做乜噉樣待我哋呢、你父親共我、傷心嚟搵你呀。
耶穌對佢哋話、使乜搵我呢、豈唔知我應該喺我父親嘅屋處咩 。
佢哋唔明佢所講嘅說話。
耶穌同埋佢哋番落拿撒勒、順從父母。佢母親𢬿佢嘅說話、擠嘥落心處。
耶穌年紀越大、越發智慧、又越發得上帝共人歡喜佢。