耶穌擔高頭，見個的財主嘅人，將佢所簽嘅銀擠入庫。
又見一個窮嘅寡婦，簽兩個錢。
就話，我實在話你地知，呢個窮嘅寡婦，比較眾人，越發簽得多呀。
因為眾人係𢬿餘剩嘅嚟簽過上帝，但呢個寡婦係缺乏嘅，亦將所有養口嘅嚟簽嘥呀。
個陣時，有的人講論個殿堂，係𢬿好石，及供獻嘅物件嚟修飾。
耶穌就話，你地所見個的物件，日子一到，就冇一嚿石，留番喺第嚿石之上唔毀拆𡃉。
眾人問佢話，先生，幾時有呢的事呢呢的事應驗之時，有乜兆頭呢。
耶穌話，你地謹慎，咪俾人迷惑呀，因為將來，有好多人假冒我名嚟話，我係基督，時候近咯，但你地咪跟從佢。
你地將來聽見打仗作亂嘅事，唔使慌，因為呢的事，必定先有嘅，但末日唔係即時到呮。
耶穌又對佢地話，民將攻打民，國將攻打國。
周圍地大震，有飢荒瘟疫，而且有可怕嘅事，大嘅異象，自天上現出嚟。
呢的各樣事之先，人地將捉你，迫害你，解你到會堂，擠你落監，又為我嘅名，拉你到王侯面前。
你地遇着呢的事，就係證據。
所以你地要把定你嘅心，唔使預先憂慮，點樣說話對答。
因為我將𢬿口才智慧賜過你地，等你所有仇敵，不能辯駁對敵。
你地將被父母兄弟親戚朋友解去，而且你地之中，有被佢地殺嘅。
你地為我嘅名，被眾人憎惡。
但你地一條頭髮都唔喪失呀。
你地要忍耐，致得保全你嘅生命。
你地將見大兵圍住耶路撒冷之時，就知到呢個城，將近滅亡咯。
個陣時，在猶太地方嘅人，就要走上山，在城裏嘅，就要出去，在鄉下嘅，唔好入城。
因為個日係伸寃嘅日子，等聖經所寫嘅各事，俱得應驗。
個陣時，懷胎共喂奶嘅女人有禍咯，因為此地必有大難，嬲怒降落呢的百姓呀。
佢地必死在刀下，被人擄掠到各國，而且耶路撒冷，被異邦人踹踏，直到異邦人嘅日子滿呀。
日月星宿，將有出奇嘅形象，地上各國，有困苦流離，海浪湧起好大聲音 。
又想着將要臨到世上嘅事，就人人驚慌，魂不附體，因為天象必定震動呀。
到個時，必睇見人子𢬿權勢及大榮，坐住雲落嚟。
一有呢的事，你地就要興起擔高頭，因為贖你嘅日子近咯。
耶穌又設譬喻對佢地話，試睇吓無花果樹，共各樣嘅樹吖，佢發芽個時，你地睇見，自然知到夏天近咯。
噉樣你地睇見，呢的事成嘵個時，就知到上帝國近咯。
我實在話你知，呢個世代未曾過，呢的事俱要成嘵。
天地將噲廢壞，但我嘅說話，斷唔噲廢壞。
你地要自己謹慎，恐怕有時被多飲多食，及世事嘅掛慮，昏迷你心，個日子，不覺就嚟到你處。
因為個日子，將臨到全地嘅人，好似羅網噉呀。
故此你地要儆醒，時時祈禱，等你係堪避將來各樣嘅事，及堪企倒人子面前。
耶穌日間喺殿堂教人，夜晚出去個山，叫做橄欖山歇宿。
大眾百姓，早早嚟到殿堂，聽佢講道。