除酵節、又叫做踰越節、係將近咯。
眾祭司長讀書人、商量點樣殺得耶穌、但係怕百姓呮。
十二使徒之中有一個加略人、名叫猶大、撒但入嘵佢心。
佢就去同眾祭司長及各官斟酌點樣交得耶穌過佢哋。
佢哋就歡喜、約定俾銀過佢。
猶大應承、就搵機會、𥅾眾人唔喺處、交耶穌過佢哋。○
除酵日、即係要劏踰越節羊仔嘅日。
耶穌打發彼得共約翰話、你去為我哋預備踰越節嘅筵席、等我哋食喇。
佢哋就對佢話、你想我哋喺邊處預備呢。
耶穌對佢哋話、你入城個時、必有一個擰水埕嘅人遇著你、佢所入嘅屋、你就跟佢入。
對個家主話、老師問你、人客房喺邊處呢、我將共我嘅門生、喺處食踰越節嘅筵席呀。
佢必俾一間擺設齊整嘅大樓過你睇、你就喺個處預備喇。
佢哋去、果然遇著照依耶穌對佢所講嘅、就預備踰越節嘅筵席。○
個時候既到、耶穌同埋十二個使徒坐席。
耶穌對佢哋話、我受難之先、好想同你哋食呢個踰越節嘅筵席。
我話你哋知、我唔再食呢個節嘅筵席、等到呢的事、應驗在上帝國致食咯。
就擰起隻杯嚟感謝話、將呢的分開大家飲喇。
我話你哋知、我唔再飲菩提汁、等到上帝國嚟致飲咯。
耶穌又擰起餅嚟感謝、擘開俾佢哋話、呢的係我嘅身、為你哋捨去嘅、你要做呢件事嚟記念我。
食完節筵、亦係噉樣擰起隻杯話、呢隻杯係新約、在我嘅血、代你哋流𡃉。
但係賣我個人、佢嘅手同我喺席上咯。
人子去世、係照先頭所定嘅、但係賣人子嘅、佢有禍咯。
眾人彼此相問、我哋之中、乜誰噲做呢件事呢。○
門生彼此爭論、喺佢哋之中邊個做大。
耶穌對佢哋話、異邦之君王、管理佢嘅百姓、揸權柄嘅、人稱為恩主。
但你哋唔好噉樣、你哋之中做大嘅、應該好似細嘅、做頭人嘅、應該好似做使喚嘅噉。
邊個係大呢、係坐席上嘅、抑或係使喚嘅呢、豈唔係坐席嘅大咩、但我喺你哋之中、好似使喚嘅人噉呀。
你哋常時同我、喺我嘅患難之中。
我𢬿國封你哋、好似我父封我噉。
等你哋喺我嘅國、坐倒我席上飲食、而且坐倒高位、審判以色列族十二支派。○
主又話西門呀、西門呀、撒但也曾想得你哋嚟篩、好似篩麥噉。
但我已經為你祈禱、等你嘅信德唔失嘥、你歸正之後、要堅固你嘅兄弟。
彼得對佢話、主呀、我肯同你去坐監、又同埋你死。
耶穌話、彼得呀、我話你知、今日雞啼之先、你將三次話唔識我。○
耶穌對門生話、我打發你、唔使帶荷包、唔使帶細袋、唔使帶鞋嘅時候、你哋有缺乏冇呢、答話、冇呀。
就對佢哋話、如今有荷包嘅要帶去、有細袋嘅都係噉、冇刀嘅、就要賣嘵衫嚟買一把嚹。
我話你哋知、聖經所寫、人哋算佢係犯罪嘅人、個句說話、是必應在我身上、因為所指著我嘅事、必要成就嘅。
門生話、主呀、有兩把刀喺呢處咯。耶穌對佢哋話、夠咯。○
耶穌出嚟、仍舊去橄欖山、門生亦跟從佢。
到嘵個處、就對門生話、你哋祈禱喇、免致入誘惑呀。
就離開佢哋、大約(扌劈)一嚿石咁遠、跪倒處祈禱。
話、父呀、你若係肯、就𢬿呢隻杯離開我、但唔係成就我嘅旨意、乃係成就你嘅旨意呀。
有一位天使、從天上顯現、壯健耶穌。
耶穌好傷心、越發懇切祈禱、所出嘅汗、好似大滴血噉、跌落地下。
祈禱完、就起身、嚟到佢嘅門生處、見佢哋因為憂悶瞓嘵。
就對佢哋話、做乜瞓覺呢、起身祈禱喇、免致入誘惑呀。○
佢講緊個時、有群眾嚟到、十二門生之中、有一個叫做猶大、佢先頭行、埋到耶穌面前想親嘴。
耶穌對佢話、猶大呀、你用親嘴做暗號、嚟賣人子咩。
左右嘅人、見事將近、就話、主呀、我𢬿刀斬佢哋好唔好呢。
其中有一人、斬大祭司長嘅僕、削甩佢嘅右耳。
耶穌答話、事幹已經至到噉、由得佢喇、就摩吓個人嘅耳、醫好佢。
耶穌對嚟到嘅祭司長殿堂官、及長老話、你哋擰刀共棍嚟、好似捉賊噉咩。
我日日同埋你哋喺殿堂、你唔下手捉我、但如今係你哋嘅時候、黑暗嘅權勢咯。○
眾人捉住耶穌、拉佢去大祭司長嘅屋𨀣、彼得遠遠跟從。
喺兩廊處、有人透著火、同埋坐處、彼得亦坐在佢哋之中。
有一個妹仔、見佢對住火坐處、就定眼睇佢話、呢個人也曾同耶穌一處𡃉。
彼得唔認就話、女子呀、我唔識佢。
歇一陣、第二個人睇見佢話、你都係佢哋一黨(口扐)。彼得話、朋友呀、我唔係𡃓。
再歇一點鐘咁耐、又第二個人指實佢話、呢個人真係同埋佢𡃉、因為佢係加利利人。
彼得話、朋友呀、我唔知你講乜野、講緊個時、雞就啼咯。
主回頭睇住彼得、彼得記起主對佢所講、話、雞啼之先、你將三次話唔識我。
噉就出去、哭得好深傷。○
揸住耶穌嘅人、戲弄佢打佢。
揞住佢嘅眼問佢話、你係先知、就話明乜誰打你吖。
又講好多說話添、嚟褻凟耶穌。○
到天光、民間嘅長老、大眾祭司長、及讀書人、聚埋一處、拉耶穌嚟到佢哋嘅公所。
話、你真係基督、就話我哋知。
耶穌對佢話、我若話你哋知、你哋唔信我、若問你、你都唔答我、又唔肯放我。
自後、人子將坐倒全能上帝嘅右邊咯。
眾人話、噉你係上帝之子咩。耶穌對佢哋話、你哋話得著咯、我真係𡃉。
大眾就話、我哋重要搵乜野證據呢、因為我哋自己聽見佢親口講嘅咯。