大眾一齊起嚟解耶穌到彼拉多面前。
就告佢話，我地見呢個人蠱惑民心，禁人納稅過該撒皇帝，自稱為基督，係個王。
彼拉多問耶穌話，你係猶太人嘅王咩。耶穌答佢話，你講嘅着咯。
彼拉多對大眾祭司長，共眾人話，我見呢個人無罪呀。
眾人越發出力話，佢攪亂百姓，喺猶太省地方周圍傳教，由加利利起，至到呢處。
彼拉多一聞得加利利，就問話，呢個係加利利人咩。
知到耶穌係屬希律管轄，就打發佢去希律個處，個陣時，希律亦在耶路撒冷。
希律一見耶穌，就好歡喜，好耐想見佢，因為好多回聽聞佢嘅事，而且想睇佢行異蹟。
所以好多說話問佢，但耶穌一句都唔答。
大眾祭司長共讀書人企起嚟，好落力告佢。
希律共佢嘅兵丁藐視耶穌，戲弄佢，擰件華美衣服佢着，打發佢番去彼拉多個處。
彼拉多共希律，平素係仇敵嚟，到個日，做番朋友咯。
彼拉多叫埋大眾祭司長，各官及百姓嚟，對佢地話。
你地𢬿呢個人解過我，話佢謆惑民心，我也曾將你地告佢嘅事，喺你地面前審過，唔查得出佢有罪噃。
希律都係噉樣，因為我打發你地去見希律，佢亦見耶穌冇做過一件應死嘅罪。
故此我要打過佢，就釋放佢嚹。
因為當節期之時，總督必要釋放一個犯人俾佢地。
大眾齊聲叫話，丟棄呢個人，釋放巴拉巴過我地喇。
個巴拉巴在城中作亂殺人，故此困佢入監嘅。
彼拉多想放耶穌，所以再勸解眾人。
眾人大聲叫話，釘佢喺十字架喇，釘佢喺十字架喇。
彼拉多第三次對佢地話，佢行乜野惡呢，我唔查得出佢有應死嘅罪，故此我要打過佢，就釋放佢咯。
眾人急切，越發大聲，求佢釘耶穌喺十字架，噉就百姓共大眾祭司長嘅聲贏嘵。
彼拉多就依佢地所求嘅嚟定案。
放嘵作亂殺人，困入監個個，即係百姓所求嘅，就交耶穌過百姓，順從佢地嘅意思。
拉耶穌去個時，有個古利奈人西門，喺田番嚟，眾人捉住佢，令佢托起十字架，跟隨耶穌。
大眾百姓跟住佢，又有好多女人，為佢哭得好悲哀。
耶穌回頭向住佢地話，耶路撒冷嘅女呢，唔使為我啼哭，應當為你自己共你子女啼哭呀 。
因為日子將到，個時人地必話，唔成得孕嘅，總未懷胎嘅，總未喂奶嘅，有福咯。
個陣時，人將對高山話，磧住我地喇，對小山話，遮住我地喇。
因為青綠嘅樹木，佢地尚且噉樣做，乾枯嘅樹木，將點樣做呢。
佢地又拉兩個犯法嘅人嚟，同埋耶穌受死。
去到一處地方，叫做枯顱頭處，就喺個處，釘耶穌落十字架，與及釘個兩個犯法嘅人，一個在左便，一個在右便。
耶穌話，父呀，求你赦免佢地，因為佢唔知到佢所做嘅事呀，個的人就執籌分開耶穌嘅衣服。
百姓企倒處睇，個的官共眾人，譏誚佢話，佢救過別人，倘若佢係基督，上帝所揀擇嘅，就要救自己嚹。
兵丁都戲弄佢，行埋去俾的醋佢飲話，
你若係猶太人嘅王，就當救自己嚹。
佢上頭有一條標，係用希利尼羅馬希伯來文字寫嘅，話，呢個係猶太人嘅王。
同埋吊起嘅，個兩個犯法嘅人，有一個譏誚耶穌話，你若係基督，就救自己共我地哩。
第二個責成佢就答話，你同埋受死，你都重唔怕上帝咩。
我地係應該嘅，因為我地所受嘅刑，係合我地所做嘅事，但呢個人，冇做過的唔着嘅呀。
就對耶穌話，主，去到你國個時，記念我呀。
耶穌對佢話，我實在話你知，今日你必同我在樂園咯。
個陣大約係正午時，至到未時尾，周圍地方都陰黑。
熱頭變為昏暗，殿裏嘅布帳，喺中間裂開。
耶穌大聲叫話，父呀，我嘅靈魂交托你手咯，講完，氣就斷。
有個把總睇見呢的事，就歸榮上帝話，呢個真係義人咯。
聚埋喺處睇嘅眾人，見嘵呢的各樣事，就拍吓腦膛番去。
所有共耶穌相識嘅，及喺加利利跟隨耶穌嘅女人，遠遠企處，都睇見呢的事。
有個人名叫約瑟，佢做議事官，係良善而且公義嘅。
個時，佢冇依從個的人所謀所做，佢係猶太亞利馬太城嘅人，平日仰慕上帝國嘅。
呢個人入去見彼拉多，求耶穌嘅屍。
佢就攞嘵屍落嚟，𢬿幼細麻布包好，擠倒磐石鑿成嘅墳墓，唔曾有人葬過嘅。
個日係預備嘅日子，又安息日將近咯。
由加利利同耶穌嚟嘅個的女人，亦跟住，睇個墳墓，及點樣安置佢嘅屍。
佢地去歸，就整定的香料香油，到安息日，遵依誡命嚟歇息。