大眾一齊起嚟、解耶穌到彼拉多面前。
就告佢話、我哋見呢個人蠱惑民心、禁人納稅過該撒、又自稱為基督為王。
彼拉多問耶穌話、你係猶太人嘅王咩。耶穌答佢話、你講嘅著咯。
彼拉多對眾祭司長、共眾人話、我見呢個人無罪呀。
眾人越發出力話、佢攪亂百姓、喺猶太省地方周圍傳教、由加利利起、至到呢處。
彼拉多一聞得呢的、就問話、呢個係加利利人咩。
知到耶穌係屬希律管轄、就打發佢去希律個處、個陣時、希律亦在耶路撒冷。○
希律一見耶穌、就好歡喜、好耐想見佢、因為也曾聽聞佢嘅事、而且想睇佢行異蹟。
所以好多說話問佢、但耶穌一句都唔答。
眾祭司長共讀書人企起嚟、好落力告佢。
希律共佢嘅兵丁藐視耶穌、戲弄佢、擰件華美衣服共佢著、打發佢番去彼拉多處。
希律共彼拉多平素係仇敵嚟、到個日、就做朋友咯。○
彼拉多叫埋眾祭司長、各官及百姓嚟、對佢哋話。
你哋解呢個人過我、話佢謆惑民心、我也曾將你哋告佢嘅事、喺你哋面前審過、唔查得出佢有罪𡃓。
希律都係噉樣、因為佢打發耶穌番嚟我處、佢亦見耶穌冇做過一件應死嘅罪。
故此我要打過佢、就釋放佢嚹。
因為當節期之時、總督必要放一個犯人俾佢哋、
大眾齊聲叫話、丟棄呢個人、放巴拉巴過我哋喇。
個巴拉巴在城中作亂殺人、故此困佢入監嘅。
彼拉多想放耶穌、所以再勸解眾人。
眾人大聲叫話、釘佢落十字架喇、釘佢落十字架喇。
彼拉多第三次對佢哋話、佢行乜野惡呢、我唔查得出佢有應死嘅罪、故此我要打過佢、就釋放佢咯。
眾人急切、越發大聲、求佢釘耶穌落十字架、噉就眾人嘅聲贏嘵。
彼拉多就依佢哋所求嘅嚟定案、
放嘵作亂殺人、困入監個個、即係百姓所求嘅、就交耶穌過百姓、順從佢哋嘅意思。○
拉耶穌去個時、有個古利柰人西門喺田番嚟、眾人捉住佢、令佢孭起十字架、跟從耶穌。
大眾百姓跟從佢、又有好多女人、為佢哭得好悲哀。
耶穌回頭向住佢哋話、耶路撒冷嘅女呀、唔使為我啼哭、應當為你自己共你仔女啼哭呀。
因為日子將到、個時人哋必話、唔成得孕嘅、總未懷胎嘅、總未餵奶嘅、有福咯。
個陣時、人將對高山話、磧住我哋喇、對小山話、遮住我哋喇。
因為青綠嘅樹木、佢哋尚且噉樣做、乾枯嘅樹木、將點樣做呢。○
佢哋又拉兩個犯人嚟、同埋耶穌受死。
去到一處地方、叫做枯顱頭處、就喺個處、釘耶穌落十字架、與及釘個兩個犯法嘅人、一個在左便、一個在右便。
耶穌話、父呀、求你赦免佢哋、因為佢唔知到佢所做嘅事呀、個的人就執籌分開耶穌嘅衣服。
百姓企倒處睇、個的官共眾人、譏誚佢話、佢救過別人、倘若佢係基督、上帝所揀選嘅、就要救自己嚹。
兵丁都戲弄佢、行埋去俾醋佢飲、話、
你若係猶太人嘅王、就當救自己嚹。
佢上頭有一條標、話、呢個係猶太人嘅王。○
同埋吊起嘅、個兩個犯人、有一個譏誚耶穌話、你若係基督、就救自己共我哋哩。
第二個責成佢答話、你同埋受死、你都重唔怕上帝咩。
我哋係應該嘅、因為我哋所受嘅刑、係合我哋所做嘅事、但呢個人、冇做過的唔著嘅呀、
就對耶穌話、去到你國個時、記念我呀。
耶穌對佢話、我實在話你知、今日你必同我在樂園咯。○
個陣大約係正午時、至到未時尾、周圍地方都陰黑。
熱頭變為昏暗、殿裏嘅布帳、喺中間裂開。
耶穌大聲叫話、父呀、我嘅靈魂交托你手咯、講完、氣就斷。
個百把總睇見呢的事、就歸榮上帝話、呢個真係義人咯。
眾人聚埋喺處睇嘅、見嘵呢的各樣事、就泵胸番去。
所有共耶穌相識嘅、及喺加利利跟從耶穌嘅女人、遠遠企處、都睇見呢的事。○
有個人名約瑟、佢做議事官、係良善而且公義嘅。
個時、佢冇依從個的人所謀所做、佢係猶太亞利馬太城嘅人、平日仰慕神國嘅。
呢個人入去見彼拉多、求耶穌嘅屍。
佢就攞嘵屍落嚟、𢬿幼細麻布包好、擠倒磐石鑿成嘅墳墓、唔曾有人葬過嘅。
個日係預偹嘅日子、又安息日將近咯。
由加利利同耶穌嚟嘅個的女人、亦跟住、睇個墳墓、及點樣安置佢嘅屍。
佢哋去歸、就整定香料香油、到安息日、遵依誡命嚟歇息。