大眾擁進，想聽上帝道理，耶穌企倒革尼撒勒湖邊。
睇見兩隻船喺湖邊；個的攞魚佬離嘵船去洗網。
一隻船係西門嘅，耶穌落去，請佢撐開隻船，離岸的咁遠，就坐倒喺船處，教訓大眾。
講完就對西門話：撐到深水個處，拋網攞魚喇。
西門答佢，話：先生我地成夜做工夫，都冇攞得倒，而家聽你話，我就去拋網。
佢做個的，就拋倒好多魚，個網都上下裂開添。
就噏第二隻船嘅伙記嚟幫佢拉，𢬿個的魚裝滿兩船，上下沉添。
西門彼得睇見個的，就跪倒耶穌腳下，話：主，請你離開我，我係罪人。
佢共同埋佢嘅人好驚慌呀，因為攞倒嘅魚。
西門嘅伙記，西比太嘅仔雅各、約翰都係噉樣。耶穌對西門話：唔使怕，從今以後你將攞個人咯。
西門同個的伙記拉船上岸，舍去各樣嘅物件，就跟從耶穌。
耶穌喺一個城，有個人一身都係痲瘋，佢睇見耶穌，就跪倒處，求耶穌，話：若且你肯，就醫得我潔淨咯。
耶穌伸手摩吓佢，話：我肯，你可以得乾淨。個痲瘋即時就除嘵。
耶穌吩咐佢，唔好話俾人知，但去俾祭司睇，都因為你曾得乾淨，按照摩西嘅吩咐，去獻禮物，為佢做證據啊。
耶穌嘅名聲越發傳揚，大眾齊集嚟聽道理，又想佢醫病。
耶穌避身去到荒野，祈禱。
有一日，耶穌教訓個時，有𠵽唎㘔人共埋教律法嘅先生，喺加利利與及猶太省各村鄉，又喺耶路撒冷嚟，坐倒處；主顯出佢嘅權能，醫個病人。
有人𢬿抬個瘋癱佬，搵路想抬佢入去，擠倒耶穌面前，
因為人多，唔得倒入去，就上屋背，喺瓦中間𢬿吊落去，擠落耶穌面前。
耶穌見佢地信，就對個瘋癱佬話：人呀，你嘅罪得赦咯。
個的讀書人，𠵽唎㘔人，私下議論話：呢個咁褻瀆嘅係乜誰呢？上帝之外 邊個赦得人嘅罪呢？
耶穌知到佢地嘅意思，就答佢話：你地偷偷議論乜野呢 ？
話：你嘅罪得赦，抑或話：起身行，邊件係容易呢？
但係俾你知道，人嘅仔喺世上都有權赦人嘅罪呮；就對個瘋癱佬話：我吩咐你，起身，擰個張床嚟去歸。
嗰個人，喺大眾面前，即時企起身，拎佢瞓嘅傢伙，番去，稱讚上帝。
眾人見出奇，都稱讚上帝，兼且慌起嚟，話：今日睇見出奇嘅事咯 。
後來，耶穌出去，睇見一個收稅嘅官，名叫利未，坐倒稅館，就對佢話：跟從我喇。
佢就舍去各樣嘅物件，起身，跟從耶穌。
利未喺屋企，大擺排筵席請耶穌，有好多收稅嘅官，共別二的人，都同席添。
個處嘅讀書人，𠵽唎㘔人，彈耶穌嘅學生，話：做乜同個的收稅嘅官，罪惡嘅人，同埋飲食呢？
耶穌答佢話：個的壯健嘅人唔使醫生，有病嘅人致要呮。
我嚟唔係叫個的善義嘅人，係叫個的罪人悔改呮。
眾人對佢話：約翰嘅學生屢屢禁食，祈禱，𠵽唎㘔人嘅學生都係噉樣，但你嘅學生又飲又食，為乜野呢？
耶穌同佢話：新郎重喺處，點能叫個的賀喜嘅人戒食呢？
但後來新郎離別佢地去嘵，個時佢地就要戒食呮。
就使比喻對佢講：冇人使新衫嘅布嚟補喺舊衫𡃉，若唔係，就個新嘅裂喇；都補落去，個的新嘅同個的舊嘅唔合噃。
冇人使舊皮袋嚟裝新酒，若唔係，就個新酒逼裂個袋，個酒漏出嚟，袋又爛嘵。
但俾新袋裝新酒，就兩件都保存咯。
冇人飲舊酒，想飲新嘅，因為佢話，舊嘅越發好呀。