逾越節後第二日，第一個安息日，耶穌喺禾田通行，學生摘的禾穗，使手搓甩嚟食。
有幾個𠵽唎㘔人對佢話：安息日唔當做嘅事，做乜你又做呢？
耶穌答佢話：大闢共跟隨佢嘅人，肚餓個時做嘅事，你唔曾讀過咩?
入上帝嘅宮殿，擰擺設嘅餅嚟食，又俾過跟隨佢嘅人食；但個的餅獨係祭司可以食得嘅呮。
又對佢話：人嘅仔都係安息日嘅主呀。
又一個安息日，耶穌入會堂教訓，喺嗰處有個人，右手枯嘵嘅。
個的讀書人，𠵽唎㘔人，試睇耶穌喺安息日醫人唔醫，想籍故告佢。
耶穌知道佢地嘅意思，就吩咐個手枯嘅人，話：起身，企倒中間！佢就起身企倒處
耶穌對大眾話：我問你一句：喺安息日行善，行惡，救人嘅生命，殺人嘅生命，邊樣係着呢？
周圍睇吓眾人，就對嗰個人話：伸你嘅手喇！佢一伸，個手即時就好嘵，好似第二隻手一樣。
眾人十分嬲，大家斟酌點樣處置耶穌。
個時，耶穌上山祈禱，成夜求上帝。
天光，叫埋個的學生嚟，喺佢地內中揀擇十二個，又叫佢做使徒。
即係西門，又叫做彼得嗰個，共佢嘅兄弟安得烈，雅各，約翰，腓力，巴多羅買。
馬太，多馬，亞勒腓嘅仔雅各，叫做熱心嗰個西門。
雅各嘅兄弟猶太，共埋賣先生嗰個加略人猶大添。
耶穌共使徒落嘵山，企倒平地；有好多學生共眾人喺猶太四方，耶路撒冷，推羅、西頓，海邊嚟，想聽佢講，又望耶穌醫佢嘅病。
又有被污糟鬼難為嘅，喊唪唥都得醫好。
大眾都想摩吓耶穌，因為有權能由佢出，醫好眾人。
耶穌睜開眼，睇吓的學生，話：你地貧窮嘅有福咯！因為上帝嘅國係你地嘅呀。
你地而家肚餓嘅有福咯！因為你將得飽。你地而家啼哭嘅有福咯！因為你地將得笑呀。
因為人嘅仔，人地憎惡你，棄絕你，辱罵你，厭恨你嘅名，算係惡嘅，就有福咯！
就歡喜到跳高！因為喺天你得大嘅(報賞)；佢嘅祖宗款待先知都係噉樣。
但你地財主佬有禍咯！因為你曾得你嘅安樂。
你地食飽嘅有禍咯！因為你將受肚餓。你地而家笑嘅有禍咯！因為你地將悲哀啼哭呀。
眾人稱讚你，就有禍咯！佢嘅祖宗款待嗰的冒認先知嘅人， 都係噉樣呀。
但我話你地聽嘅知：共你做對頭嘅，愛佢；恨怒你嘅，好好款待佢；
咒詛你嘅，祝福佢；難為你嘅，代佢祈禱。
有人摑你呢邊面珠，就[口佞]轉嗰邊俾佢；搶你外面嘅衫，就連裡頭嘅衫都唔好阻住佢。
求你嘅，就俾過佢，擰你嘅物件，你唔好共佢攞番。
你想人地噉樣待你，你亦噉樣待人喇。
你若愛個的待你嘅，有乜恩惠呢？因罪人亦係咁樣呀都愛所愛佢嘅。
你若好的款待個的好款待你嘅人，有乜野恩惠呢？因為的罪惡嘅人都係噉樣呮。
借俾人，望人還番，有乜野恩惠呢？因為個的罪惡嘅人借俾罪惡嘅人都要佢照數還番。
但共你做對頭嘅，你愛佢，行善，借人唔望還番；就你得大嘅報賞咯，你將做至上者嘅仔；因為佢慈愛個的負恩嘅，與及惡人。
所以應該慈悲，如同你嘅天父噉樣。
「唔好論人，就唔議論你；唔好定人嘅罪，就唔定你嘅罪；你寬恕人，就寬恕你。
你俾過人，就俾過你；人將𢬿大嘅器具，㩒實，嗷實，滿到漏出嚟，擠落你衫披；因為你噉樣量度人，就人又噉樣量度你咯。
耶穌又講比喻：盲佬點拖得盲佬呮？唔係兩個都跌落坑咩？
學生唔勝得過先生，德行全備嘅，可以同先生一樣呮。
你兄弟眼裡頭條刺，你就睇見，你自己眼裡頭有條杉，你自己唔覺得，點解呢？
點好對兄弟話：兄弟，你眼裡頭有條刺，等我共你擝出嚟喇，但自己眼裡頭有條杉，都唔覺得咩？嘿！偽善嘅人呀，先先掹出自己眼裡頭個條杉，後來至睇見掹出兄弟眼裡頭個條刺(欸)。
冇好嘅樹結壞嘅果，冇壞嘅樹結好嘅果。
但凡樹木睇個果，就識得出佢咯；因為喺荊棘裡頭唔摘得無花果倒，喺(勒林)裡頭唔摘得葡提子倒。
善人由心積嘅善，發出善；惡人由心積嘅惡，發出惡。因為心滿噉樣嘅，口都講噉樣嘅呀。
你做乜叫我做主阿！主阿！，又唔行照我嘅吩咐呢 ？
我話你知，凡喺就近我，聽我教，去做事嘅，好比乜野呢？
好比有人起屋，掘到深處，安個基址喺大石上高；就喺大水沖嚟，流水就橫撞着個間屋，都唔怕搖動咯，因為個基址喺大石上高呢。
但聽見唔去做嘅，好比起間屋喺泥土上高，都冇基址，流水就橫一沖，就冧嘵，個間屋就爛得大喇。