踰越節第二日後，第一個安息日，耶穌經過禾田，門生摘的禾穗，使手搓甩嚟食。
有幾個𠵽唎㘔人對佢地話，安息日唔當做嘅事，為乜你又做呢。
耶穌答佢地話，大闢共跟隨佢嘅人，肚餓個時，所做嘅事，你唔曾讀過咩。
即係入上帝殿，擰擺設嘅餅嚟食，又俾過跟隨佢嘅人食，但個的餅，獨係祭司致食得嘅呮。
又對佢地話，人子亦係安息日嘅主呀。
又一個安息日，耶穌入會堂教訓，喺嗰處，有一人，佢隻右手乾枯嘅。
個的讀書人𠵽唎㘔人，𥅾耶穌安息日醫人唔醫，想揾的事嚟告佢。
耶穌知到佢地嘅意思，就對個手枯嘅人話，起身，企倒中間，個人就起身企處。
耶穌對大眾話，我問你一句，喺安息日，行善事，行惡事，救生命，殺生命，邊樣係着呢。
就周圍睇住眾人嚟對個人話，伸開你手喇，佢一伸開，個隻手就好嘵，好似第二隻一樣。
眾人十分嬲，彼此斟酌，點樣處置耶穌。
個時耶穌上山祈禱，成夜求上帝。
到第二朝叫埋佢嘅門生嚟，喺佢地之中，揀擇十二個，又稱佢做使徒。
即係西門又叫做彼得，共佢嘅兄弟安得烈，亦有雅各，約翰，腓力，巴多羅買，
馬太，多馬，共亞勒腓子雅各，及叫做熱心嘅西門。
更有雅各嘅兄弟猶太，共賣主嘅加畧人猶大。
耶穌同使徒落嘵山，企倒平地，有好多門生共眾人，喺猶太四方，耶路撒冷，推羅西頓嘅海邊嚟，想聽佢講，又望耶穌醫佢嘅病。
又有被邪鬼難為嘅，俱醫得好。
羣眾都想摩吓耶穌，因為有權能由佢出，醫好眾人。
耶穌擔高頭睇住門生話，你地貧窮嘅有福咯，因為上帝國係你地嘅。
你地如今肚餓嘅有福咯，因為你將來得飽。你地如今啼哭嘅有福咯，因為你將來必得笑呀。
為人子嘅名，人地憎惡你，棄絕你，怒罵你，厭恨你嘅名，當你係惡嘅，就有福咯。
當個日，歡喜到跳，因為你地喺天所得嘅賞賜係大，佢嘅祖宗看待先知，都係噉樣。
但係你地財主嘅有禍咯，因為你已經得你嘅安慰。
你地飽足嘅有禍咯，因為你將要飢餓。你地如今喜笑嘅有禍咯，因為你將要悲哀啼哭呀。
你地被眾人稱讚嘅有禍咯，因為佢嘅祖宗，看待個的假冒先知嘅， 都係噉樣呀，
聽道嘅人呀，我話你地知，共你做仇敵嘅，要愛佢，憎惡你嘅，要待好佢。
咒詛你嘅，要祝福佢，難為你嘅，要代佢祈禱。
有人摑你呢便面，又[口佞]轉個便俾佢摑，搶你外面嘅衫，你就連裡頭個件，都唔禁佢搶。
但凡求你嘅，就俾過佢，擰你嘅物件，唔好共佢攞番。
你想人地噉樣待你，你亦要噉樣待人。
你若愛個的愛你嘅人，有乜恩惠呢，因罪人亦愛個的愛佢嘅。
你若好看待個的好看待你嘅人，有乜恩惠呢，因罪人亦係噉樣呀。
你若借過人嘅，望人還番，有乜恩惠呢，因罪人借過罪人，亦要佢照數還番呀。
但共你做仇敵嘅，要愛佢，又要行善，而且借嘅，亦唔望佢還番，你就得大嘅賞賜咯，你可以做至上者之子，因為佢善待個的忘恩嘅，與及惡人。
所以你地應該憐憫，好似你天父咁憐憫。
唔議論人，你就唔被人議論，唔定人罪，就唔被人定你罪，你恕免人，就被人恕免你。
你俾過人，人就俾過你，人將𢬿個大斗㩒落去，𢳆到實，而且滿到流出嚟，擠落你懷抱，因為你用點樣斗量過人，人亦用噉樣斗量番你。
耶穌又講譬喻對佢話，盲眼嘅，點拖得盲眼嘅呢，唔係兩個都跌落坑咩。
門生唔勝得過佢先生，但係學得齊全嘅，必同佢先生一樣。
你兄弟眼裏有條刺，你就睇見，你自己眼裏有條杉，你自己都唔見覺，為乜呢。
點能對兄弟話，兄弟呀，你眼裏有條刺，等我共你擝出嚟。但自己眼裏有條杉，都唔見覺咩。偽善嘅人呀，先要擝出自己眼裏嘅杉，後來致睇得明白，擝出兄弟眼裏嘅刺呀。
因為好樹，冇結唔好嘅果，唔好樹，冇結好嘅果。
但凡樹木，睇佢嘅果就識得佢出咯，因為在荊棘中，唔摘得倒無花果，在蒺藜中，唔摘得倒菩提子。
善人由心積埋的善，所發係善，惡人由心積埋的惡，所發係惡，因為由心所滿嘅，個口就講出嚟。
你為乜稱我做主呀主呀，又唔照依我嘅話嚟行呢 。
我話你知，但凡親近我，聽我話嚟做嘅，佢好比乜野人呢。
好比一個人起屋，掘到深處，落墻脚在大石之上，就係大水漲滿起嚟，橫衝個間屋，都不能搖動佢咯，因為個牆脚喺大石之上呀。
但聽嘵唔去做嘅，好比起間屋喺泥土之上，冇好地脚，流水掉橫一衝，就跌嘵個間屋就爛得大嚹。