耶穌講完咁多說話過百姓聽，就入迦伯農，
有個把總，佢所愛嘅僕，病到將近死。
聽聞耶穌所行嘅事，就打發猶太人嘅長老，去求耶穌，嚟醫佢嘅僕。
長老見耶穌，就懇切求話，佢係好人，替佢做呢件事亦着嘅。
因為佢愛我地百姓，而且為我地起間會堂。
耶穌同埋個的人去，離屋冇幾遠個時，個把總打發佢嘅朋友嚟見耶穌話，主，唔使勞動咯，因為你到我屋舍，我唔敢當。
故此我以為自己亦唔稱嚟見你，但求你講一句話，我嘅家人就必得好咯。
因為我都屬大官權下，亦有兵屬我權下，吩咐呢個去就去，吩咐個個嚟就嚟，叫我嘅僕做呢件事，就做呢件事咯。
耶穌聽聞呢的說話，就見出奇，回頭睇吓跟佢嘅眾人話，我話你知，喺以色列人之中，唔曾見過咁大嘅信德呀。
受打發嘅人去歸個時，睇見有病嘅僕，已經好番咯。
第二日，耶穌入到一個城，名叫拿因，有好多門生共眾人同行。
將近城門口，有人擡個死人出嚟，佢母親獨係生倒個個仔呮，而且佢係寡婦，城裏嘅人，好多嚟相送。
主睇見個寡婦，就憐憫佢話，唔使啼哭。
就行前去㩒住個死人嘅架，個的擡死人嘅就歇住，耶穌話，少年人呀，我吩咐你起身。
個死者就起身，坐倒處講說話，耶穌𢬿佢交番佢母親。
眾人就慌起嚟，稱讚上帝話，有大嘅先知，興起在我地之中，上帝照顧佢嘅百姓咯。
噉就個個風聲傳揚通猶太，與及周圍地方。
約翰嘅門生，𢬿呢的事，話嘥過佢先生知。
約翰就叫兩個門生嚟，打發去見耶穌話，應當嚟嘅，就係你唎咩，抑或重要望第二個人呢。
個兩個人，到耶穌處就話，施洗禮嘅約翰，打發我嚟見你，問你應當嚟嘅，即係你，抑或重要望第二個人呢。
個陣時，耶穌醫好多人嘅病症，及被惡鬼迷嘅，又令好多盲眼人睇得見。
耶穌就答佢地話，𢬿你所見所聞嘅，去話過約翰知，即係盲嘅睇得見，跛嘅噲行，發瘋嘅得潔淨，聾嘅聽得聞，死嘅番生，窮嘅得聽福音。
凡係唔厭棄我嘅，就有福咯。
約翰打發嘅人，已經番去，耶穌就講起約翰對眾人話，你出曠野，睇乜野呢，想睇風吹蘆荻草咩。
你出去睇乜野呢，想睇一個，着好衣服嘅人咩，但個的着華美衣服，安安樂樂度日嘅，係在王宮嘅呀。
到底你出去想睇乜野呢，先知者咩，我話你知，佢係大過先知者多呀。
聖經有寫，我打發我嘅使者，喺你面前，在先預備你嘅路，即係指着呢個人咯。
我話你地知，婦人所生嘅，未有一個先知，大得過施洗禮嘅約翰呀，但喺上帝國至細嘅，都大過佢。
眾百姓及收稅嘅，已經受約翰洗禮，如今聽聞呢的話，就稱上帝為公義。
但𠵽唎㘔人，及教法師，唔受約翰洗禮，棄絕上帝嘅旨意，嚟損害自己。
主又話，我將乜野，嚟比較呢個世代嘅人呢，佢地好比乜野呢。
好比細蚊仔，坐倒市上，彼此相叫話，我地替你吹簫，你唔跳舞，我地替你唱悲歌，你唔啼哭。
施洗禮嘅約翰嚟，佢唔食餅，唔飲酒，你地就話，佢係被鬼迷。
人子嚟，又飲又食，你地就話，嚡，佢好飲好食嘅人，係稅吏及罪人嘅朋友。
但係智慧嘅仔，個個都明智慧嘅義呀。
有個𠵽唎㘔人，請耶穌食飯，耶穌入佢屋企坐席。
城裏有個女人，平日有惡行嘅，知到耶穌坐倒𠵽唎㘔人屋企，就擰個玉盒，載住香膏，
企在耶穌後便啼哭，眼淚流濕耶穌嘅脚，𢬿自己頭髮嚟抹，又俾嘴親耶穌嘅脚，將香膏搽落去。
請耶穌食飯嘅𠵽唎㘔人，睇見呢的事，心裏就噉話，呢個人若係先知，就是必知摩佢嘅係乜誰，亦知係點樣嘅人咯，因為佢係行惡嘅呀。
耶穌對佢話，西門，我有的事話你知，西門話，先生，請講喇。
耶穌話，一個債主，有兩個債仔，一個欠銀五十兩，一個欠銀五兩。
因為兩個都冇得還，債主就免嘵佢地嘅，你試話佢兩個人邊個愛債主多呢。
西門答話，我估個個免得多嘅，耶穌對佢話，你估得着咯。
就回頭睇住個女人，對西門話，你睇見呢個女人喇，我入你屋企，你唔曾𢬿水洗我脚，惟佢俾眼淚洗濕我脚，俾佢頭髮抹番乾。
你唔曾親我嘴，惟佢自從我入嚟，就不歇親我脚。
你唔曾𢬿膏搽我頭，惟佢𢬿香膏搽我脚。
所以我話你知，個女人罪惡多，我赦嘵佢嘅，因為佢愛係多，但個的赦得少嘅，佢愛亦係少呀。
就對個女人話，你嘅罪赦嘵咯。
同席嘅人，私下講話，呢個係乜野人，噲赦得人罪呢。
耶穌對個女人話，你嘅信德救嘵你，可以安樂去歸咯。