自後，耶穌周圍遊行，去各城各鄉傳上帝國嘅福音，十二個門生同埋佢去。
又有幾個婦人，平日被鬼迷及染病嘅，已經醫好；一個係抹大拉嘅馬利亞，耶穌也曾啄呢個婦人趕過七隻鬼出嚟嘅咯。
又有希律個管家苦撒嘅妻約亞拿，又有蘇撒拿，另外好多婦人，都掝佢所有嘅嚟供奉耶穌。
羣衆喺各城出嚟，聚埋耶穌處，耶穌用譬喩嚟講，話：
「有個撒種嘅人出去撒種，撒個時，有的種跌落路邊，被人端曉，空中嘅雀鳥嚟食嘅。
有的跌落石上嘅，生出嚟就枯曉，因爲冇也滋潤。
有的跌落荆棘裏頭，個的荆棘同埋生，就偪死佢。
有的跌落肥地嘅，生出嚟結實，有一百倍。」耶穌講完呢的，就大聲話：「有耳可聽嘅，就要聽嚟！」
門生嚟問耶穌話：「呢個譬喩係乜野意思呢？」
耶穌話：「上帝國嘅奥妙俾你知呮；若係別人，就講譬喩，令佢睇亦唔見，聽亦唔明。
呢的譬喩係嘅樣：個的種卽係上帝之道。
喺路邊嘅，卽係人聽道，魔鬼就嚟將佢心中嘅道搶去，恐怕佢信就得救呀。
喺石上嘅，係人聽道就歡喜接受，但裏頭冇根，不過暫時信呬，遇着試煉就違背咯。
跌落荊棘中間嘅，係人聽過道去咗，就被今世嘅掛慮、財帛、快樂偪住個的道，所以唔結得實。
喺肥地嘅，係人摵善良嘅心嚟聽道，謹守忍耐，噉就結實咯。
冇人點燈，俾器皿搇住佢，或擠倒床底；必係擠倒燈臺上，俾入嚟嘅人就見光。
因爲總冇隱密嘅事將來唔顯明、藏埋嘅事將來唔露出呀。
所以謹慎點樣聽道理，因爲有嘅就加俾佢添；冇嘅就連佢自己以爲有嘅都要搶埋。」
耶穌嘅母親與及兄弟嚟，因爲人多，不能近得佢。
有人對耶穌話：「你母親共你兄弟企倒外出，想見你呀。」
耶穌答佢哋話：「聽上帝道理，又照依嘅樣行嘅，就係我母親共我兄弟咯。」
一日，耶穌共門生落船，對佢哋話：「我哋過湖嚹。」噉就開身。
行緊船個時，耶穌瞓着；啄湖中間忽然翻起大風，打得滿船水，十分危險。
門生行埋去，呌醒耶穌，話：「夫子！夫子！我哋死咯！」耶穌就起身，喝個的風共浪，卽時就風平浪淨。
耶穌對門生話：「你嘅信德啄邊處呢？」大衆慌起嚟，見出奇，相講話：「呢個係乜野人呢？吩咐個的風共水，亦聽從佢呢？」
個隻船行到加利利對面加大拉嘅地方。
耶穌上岸，遇着一個人，係在城裏出嚟，被鬼迷嘅，好耐唔着衣服，又唔啄屋住，住在墳墓裏頭。
一見耶穌，就跪倒面前，大聲呌話：「至高上帝之子耶穌，我於你何干呢？求你唔好合我受苦呀！」
因耶穌也曾吩咐邪鬼離開個人，個人已經被鬼强搶佢好多賬咯；雖俾鎖鍊鎖住，俾腳鐐鐐住，佢都抵鎖鍊腳鐐嚟整斷，被鬼趕去到曠野。
耶穌問佢話：「你叫做乜名呢？」佢話：「我叫做軍。」因爲迷佢嘅鬼有好多。
就求耶穌唔好吩咐佢落陰府。
個處有一大隊猪啄山上食野，個的鬼求耶穌准佢入個隊猪處，耶穌就准佢。
個的鬼卽時離開個人，入去猪處；忽然個一隊猪走落山坡，入湖浸死。
看猪嘅人睇見個的事情，就走入城裏，走落鄉下，話過人知。
衆人出嚟，想睇個的事情，嚟到耶穌處，睇見先頭被鬼迷嘅人着番衣服，自自在在坐倒耶穌腳下，衆人就慌起嚟。
親眼睇見嘅人，就話過佢哋知，被鬼迷嘅點樣得醫好。
加大拉周圍地方嘅人求耶穌離開個處，因爲佢哋十分驚慌；耶穌就落船番去。
先頭被鬼迷個人嚟求跟隨耶穌，但耶穌打發佢去，話：
「你去歸屋裏喇，將上帝爲你所做咁大嘅事話過人知。」個人就去城裏，周圍講耶穌爲佢做咁大嘅事。
耶穌番嚟，衆人迎接佢，因爲衆人等候佢。
有一個管理會堂嘅人，名呌睚魯，嚟跪倒耶穌脚下，求耶穌去佢屋裏，
因佢有個孤獨女，大約十二歲，將近死咯。耶穌行去個時，衆人擠擁住佢。
有個婦人，染血漏嘅病已經十二年咯，請醫生嚟醫，使盡家業，都冇一個醫得佢好。
就跟住耶穌背後，摩佢嘅衫邊，血漏卽時止咗。
耶穌就話：「邊個摩我呢？」大家都唔認。彼得與及同埋嘅人話：「夫子，衆人咁擠擁逼住你呀。」
耶穌話：「有人摩我，因爲覺得有異能啄我身出呀。」
個婦人知到唔瞞得過，就震起嚟，前去跪倒耶穌腳下，嚟衆人面前，自認摩佢嘅緣故共埋卽時得好嘅情形。
耶穌對佢話：「女呀，你嘅信德拯救你，平安去歸喇。」
講緊個時，有個人從管理會堂嘅家中嚟，對佢話：「你嘅女已經死曉咯，唔使勞動老師咯。」
但耶穌聽見，就答佢話：「唔使懣，獨係要立信心，你嘅女就必得救咯。」
耶穌入屋個時，除曉彼得、約翰、雅各共個女仔嘅父母之外，唔俾別人入去。
衆人爲呢個女仔哭得好哀痛，但耶穌話：「唔使啼哭，因佢唔係死，不過瞓着呬。」
衆人知到佢已經死，噉就笑佢。
但耶穌撿住女仔嘅手，呌佢話：「女仔，起身喇！」
佢嘅靈魂番嚟，佢卽時起身；耶穌吩咐俾野過佢食。
佢父母好驚奇，耶穌禁止佢唔好械所做嘅事話過人知。