耶穌叫十二個學生，嚟，俾佢有權勢可以制鬼醫病。
打發佢傳揚上帝嘅國，醫有病嘅人；
又對佢話：唔使帶盤費，冇枴杖，冇袋，冇口糧，冇銀，又唔好帶兩套衣裳呀。
入人地屋企處，就住到去。
有人唔接你嘅，就出嗰個城，拍乾淨腳底塵，俾眾人做見證。
學生出去，周遊村鄉處處講福音道理，醫人地嘅病。
受封做分國嘅王，嗰個希律聽見耶穌所做各樣嘅事，實在思疑，因為有人話：約翰由死翻生；
有人話：以利亞顯現；有人話：古時先知者內中一個番生。
希律話：約翰我已經殺嘵佢咯，而家又聽見呢件事，呢個實在係乜誰呢？就想睇見佢。
使徒番嚟，𢬿所做嘅事回覆耶穌；耶穌就帶佢靜靜去到荒野，近伯賽大城個處。
眾人知到，就跟住佢；耶穌接落眾人，共佢講論上帝嘅國，凡有人需用醫嘅，就醫好佢。
熱頭曬側，十二個學生來，對佢話：請你，散開眾人，俾佢去周圍村鄉歇宿，與及搵嘢食喇，因為呢處係荒野呀。
但耶穌對佢話：你俾佢食喇。學生話：我地獨係有五個餅，兩條魚呮，唔通去買食物，俾佢地大家食咩？
因為上下有五千人呀，但耶穌對學生話：叫大眾排開，坐倒處，五十人一堆。
佢按照噉做，俾大眾坐倒處。
耶穌擰起個五個餅，兩條魚，望著天祝福，多謝，擘開，交俾學生，叫佢派開喺眾人面前。
都食到飽；執埋剩倒個的碎嘅，裝滿十二籃咁多。
耶穌自己喺處祈禱個時，學生同埋佢在，耶穌問個的學生，噉話：眾人話我係乜誰呢？
學生答佢話：有人話，施洗禮嘅約翰；有人話，以利亞；有人話，古時先知者內中一個翻生。
耶穌對佢話：但你地話，我係乜誰呢？彼得就答話：你係上帝嘅基督。
耶穌禁止佢，吩咐，咪話俾人知。
又話：人嘅仔是必好多受害，受個的長老、列位祭司頭目，讀書人，丟棄，而且俾人殺嘵,第三日又番生。
又對大眾話：想跟隨我嘅，就應該日日孭十字架嚟，跟隨我喇。
因為凡想救佢嘅生命嘅，反轉頭失嘵；因為我嘅事失去生命嘅，必定救佢嘅生命咯。
人得全普天下嘅利益，但失去自己，或損害自己，就有乜野益處呢？
但凡有人算我共我嘅道理係羞恥嘅，到人嘅仔使自己共天父聖天使嘅榮光降臨個陣時，又必定算嗰個人係羞恥嘅咯 。
我老實話你知：企倒呢處嘅，有人喺唔曾死之先，睇得見上帝嘅國。
講個的說話之後，大約八日，耶穌帶彼得、約翰、雅各，上山，祈禱。
祈禱個時，容貌比平日唔同，佢嘅衫好白好光。
有兩個人共耶穌講，即係摩西及以利亞。
𢬿榮光顯出嚟，講論耶穌嘅結局，喺耶路撒冷是必成就嘅。
彼得共同在嘅人， 因為好癐，就瞓落覺；到醒，睇見耶穌嘅榮光，有兩個人共佢企倒處。
佢離別個時，彼得對耶穌話：先生，我地喺呢處真係好咯，寬容我搭三間茅屋，一間俾你，一間俾摩西，一間俾以利亞；但自己唔知講乜野。
講緊個時，有雲遮住佢，入雲裡頭個時，就慌起嚟。
有聲喺雲裡頭出嚟，話：呢個係我嘅愛仔，你應該聽佢話呀。
聲音過嘵，睇見耶穌獨自企喺處。學生就肅靜，個時唔𢬿睇見嘅事，話俾人知。
第二日，落山個時，眾人迎接佢。
內中有一個人，大聲叫，話：先生，求你照顧我嘅仔，因為我獨係喺生倒佢呮。
個神捉倒佢，忽然叫喊，拉拉扯扯佢，又流口水白泡，十分難為，想趕佢去，實在係難呀。
也曾求你嘅學生趕佢咯，但唔做得噃。
耶穌答話：唉！不信，背逆嘅世界，我同埋你忍耐你到幾久呢？帶你嘅仔來呢處喇。
啱啱嚟個時，個隻鬼推倒佢，又拉佢，扯佢。耶穌責罰個隻神，醫好個後生仔，交番俾佢老竇。
眾人，因為上帝大嘅權能都見驚奇，眾人出奇佢喊唪唥所做嘅事，個時，耶穌對佢嘅學生話：
你應該𢬿呢句說話，藏埋喺耳朵裡頭呀，因為人嘅仔將賣俾人嘅手呢。
學生唔通達，因為個句說話係隱密𡃉，唔明白，又唔敢問佢論及呢句說話。
學生私下議論邊個做大。
耶穌知道佢地心內嘅意思，就帶個細蚊仔嚟，放倒佢側邊，
對學生話：但凡，因我嘅名接呢個細蚊仔，即係接我，接我，即係接打發我嘅呀。喺你地中間至細嘅，將來做至大駕。
就約翰答話：先生，我地睇見一個人，借你嘅名，趕鬼；因為佢唔跟隨我地，所以就阻止佢哩。
耶穌對佢話：唔好阻止佢，因為唔抗拒我嘅，就係幫助我嘅咯。
耶穌升天嘅日子將近到，就打定主意行向耶路撒冷。
打發差人先去。佢地去到撒馬利亞地方，入一條村鄉，預備地方接佢。
個條村嘅人唔肯接納，因為佢係望向耶路撒冷行駕。
但佢嘅學生，雅各、約翰，睇見噉樣，就話：主，若肯，就我叫個火喺天落嚟，燒滅佢，同以利亞所做嘅噉樣。
耶穌[口佞]轉頭責罰佢，話：你自己唔知你係喺乜野神嘅咩？
人嘅仔嚟唔係滅人嘅靈魂，係救佢呮。就去第二條村鄉。
行路個時，有個人對耶穌話：主，唔論你去邊處，我想跟隨你。
耶穌答佢話：狐狸都有個巢穴，飛鳥都有個巢竇，但人嘅仔連枕頭嘅地方都冇呀。
又對第二個人話：跟隨我喇！但佢話：主，寬容我先番去歸埋葬我嘅老竇誒。
但耶穌對佢話：由得個的死人葬佢嘅死人，你去傳揚上帝嘅國喇。
又有一個人話：主，我要跟隨你；但寬容我先去歸，共我家內嘅人辭別噃。
但耶穌對佢話：手執犁耙，又[口佞]轉頭去，睇後便嘅，唔當得上帝嘅國呀。