個陣時、門生嚟到耶穌處話、喺天國、乜誰係至大呢。
耶穌叫一個細伩仔企倒佢哋之中、
話、我實在話你知、若係你唔改變、做番細伩仔噉樣、就唔入得天國。
所以但凡自己謙卑好似呢個細伩仔噉、佢在天國係至大。
又但凡因我嘅名、招接一個噉樣嘅細伩仔、即係招接我。
但凡令一個信我之小子陷罪嘅、佢寧可被大石磨、掛住頸、沈落深海處。
呢的世界有禍咯、因為佢陷人落罪呀、陷人落罪、必不免之事、但係陷人落罪嘅個個人有禍咯。
倘若你一隻手、或一隻腳、陷你落罪、就斬斷𢫕佢、你跛與及殘鈌入永生處、重好過有兩隻手兩隻腳、被𢫕落永火處。
倘若你一隻眼陷你落罪、就挖嘵𢫕佢、你單眼入永生處、重好過有兩隻眼、打落地獄嘅火處。○
你要謹愼、咪睇輕呢的小子之中一個、我話你哋知、佢嘅使者喺天上、常時見我天父面呀。
（因為人子嚟拯救喪亡嘅。）
倘若一個人、有一百隻羊、蕩失嘵一隻、你意思點呢、佢豈唔留下九十九隻喺山處、去搵個隻蕩失嘅咩。
倘若係搵倒佢、我實在話你知、就為佢歡喜、勝過九十九隻冇蕩失嘅咯。
噉樣、你天父嘅旨意、唔想呢的小子之中、有一個喪亡呀。○
倘若你兄弟得罪你、你去見佢、單獨你共佢喺處個時、執責佢、若然佢聽從、就得番你兄弟咯。
倘若佢唔聽從、就帶一兩個人共你、等有兩三個口證明佢、句句說話係實。
倘若唔聽從佢哋、就話過教會知、倘若又唔聽從教會、你就當佢係異邦人、與及稅吏嚹。
我實在話你哋知、但凡你哋在地上綁住嘅、在天上亦必被綁住、但凡你哋在地上釋放嘅、在天上亦必被釋放。
我又話你知、倘若你哋有兩個人、喺地上相合、嚟求乜野嘅事我天父必為佢做成、
因為唔論邊處、有兩三個人、為我名聚集嘅、我亦在佢哋之中呀。○
個陣時、彼得嚟到話、主呀、兄弟得罪我、我要赦佢幾多次呢、係至到七次唔係呢。
耶穌對佢話、我話過你知、唔係至到七次呮、係至到七十個七次呀。
故此天國好比人君、想共佢的臣僕計數。
佢起首計個時、有拉住一個欠一千萬銀嘅嚟佢處。
因佢冇得還、佢主人吩咐要賣佢身、同埋妻及仔女、共所有嘅野𢬿嚟還番。
個個臣僕就𡂈倒處拜佢話、主、請寛恕我、我將來必定還清。
個個臣僕嘅主憐恤佢、釋放佢、而且免嘵佢的債。
但係個臣僕出去、遇著一個同班嘅人、欠佢銀十個、就執住佢、揸佢喉朧話、你𢬿所欠嘅還番我。
個同班嘅人、𡂈倒處求佢話、請寬寬恕我、我將來必定還過你。
佢唔肯、反去押佢落監、等佢還番所欠嘅。
眾同班嘅、見佢所為、就好憂心、將佢嘅事、稟嘥過佢哋嘅主知。
於是佢主人叫佢嚟話、好惡嘅臣僕呀、你所欠嘅、因為你求我、我盡哋免嘵咯。
你唔應該憐恤你同班嘅人、好似我憐恤你噉咩。
主人就惱怒起嚟、交佢過皂班、等佢還清所有欠嘅。
若係你各人、唔由心赦免兄弟嘅、我天父亦必噉樣待你哋呀。