當希律王個時、耶穌既喺猶太伯利恆出世、有幾位博士、喺東便嚟到耶路撒冷、
話生出嚟做猶太人王嘅、喺邊處呢、因我哋喺東便、望見佢粒星、故此嚟拜佢。
希律王聼聞、就慌起嚟、通耶路撒冷都係。
噉就叫齊眾祭司長、同民間讀書人嚟問、話、基督應該喺邊處出世呢。
眾人對佢話、喺猶太伯利恆、因為先知有寫落噉話、
猶太地伯利恆呀、你喺猶太府縣中、唔係至小嘅、因為將來有個君王、喺你處出、嚟保養我以色列百姓嘅。
於是、希律靜靜叫個的博士嚟、細問個粒星、係幾時現出。
就打發佢哋去伯利恆、話、你去落力查問個細伩仔、搵著、就話過我知、等我亦去拜佢。
博士聽見王所講、就起行去咯、忽然在東便、所見個粒星、喺前頭引佢哋、引到個細伩仔所住個處、就止在佢上頭。
博士睇見個粒星、歡喜到了不得。
入到屋裏、見細伩仔、同埋佢母親馬利亞、就跪倒拜個細伩仔、打開佢嘅寶盒、𢬿禮物獻上、即係黄金乳香沒藥。
博士喺夢中得默示、叫咪番去希律處、就喺別條路番歸本土。○
佢哋去之後、主嘅使者、在夢中顯現過約瑟、話、起身、帶個細伩仔、同埋佢母親、走去埃及、喺個處等我指點你、因為希律將要找尋個細伩仔嚟殺佢。
約瑟即時起身、帶個細伩仔、同佢母親、漏夜走去埃及。
喺個處、至到希律死嘵、噉就應嘵主託先知所講、話、已經叫我子出埃及咯。
個陣、希律既知到被博士欺騙倒、就極惱、使人將伯利恆、與及個處附近嘅地方、所有細伩仔、依住細問博士個時、但凡自兩歲以下嘅、盡哋殺嘥。
噉就、應嘵先知耶利米所講、
話喺拉馬地方、聽聞叫喊深傷嘅聲、拉結氏喊佢仔、因冇得留存、所以唔受安慰。
希律死嘵、主嘅使者、喺埃及處、在夢中顯現過約瑟、
話、起身、帶個細伩仔、同佢母親、去以色列地方、因個的找尋細伩仔性命嘅、已經死咯、
佢就起身、帶個細伩仔、同佢母親、嚟到以色列地方。
但係聞得亞基老、喺猶太繼住父親希律做王、就怕去個處、惟係在夢中得默示、故此番去加利利境地。
到一個城、名叫拿撒勒、就喺處居住、噉就應嘵眾先知所講、人哋將要叫佢做拿撒勒人咯。