因為天國好比一個人做家主、朝早出去、請工人入佢菩提園。
共的工人講定、每日銀一錢、打發佢哋入菩提園。
辰時尾又出去、睇見又有的得閒嘅企倒市頭處、
就對佢哋話、你都入菩提園囉、我必𢬿公道嘅俾過你、個的人就入去。
晏晝與及未時尾又出去、都係噉樣做。
約莫申時尾又出去、睇見重有的企處、亦對佢話、你哋因何成日喺呢處閒企呢。
佢哋話、因為冇人請我呀。家主對佢話、你哋都入菩提園囉。
到挨晚菩提園主對個管家話、叫個的工人嚟、從後到嘅、至於先到嘅、都支人工過佢。
申時尾嘅嚟到、各得銀一錢、
個的先頭嘅嚟到、估自己所得、必定加多、誰知得銀亦係一錢。
受嘵就埋怨家主話、
我哋成日辛苦受熱、個的後到嘅、工夫不過半個時辰呮、你竟然令佢哋同我哋一樣咩。
園主對佢哋之中一個人話、朋友、我冇唔公道待你、你、唔係共我講定銀一錢咩。
係你嘅就擰去喇、我想俾過呢個後到嘅、好似俾你一樣。
𢬿我嘅物、照我所想嚟做、唔著嘅咩、因我係善嘅、你就俾眼矋住我咩。
噉樣、尾後嘅、將在先頭、先頭嘅、將在尾後咯。○
耶穌上耶路撒冷、喺路上帶住十二門生、靜中對佢哋話、
我哋上耶路撒冷、人子必被人交過眾祭司長、與及讀書人、佢哋將定佢死罪、
解過異邦人、凌辱鞭打、釘落十字架、第三日佢就復生咯。○
個陣時、西比太仔嘅老母、共佢两個仔嚟拜耶穌、求佢一件事。
耶穌對佢話、你想乜野呢。佢話、想你准我呢兩個仔、喺你嘅國處、一個坐你右便、一個坐你左便。
耶穌答話、你哋唔嘵得你所求嘅、我將飲嘅杯、你飲得唔呢。佢哋話、我哋做得。
耶穌對佢話、我將飲嘅杯、你哋是必飲、但係坐我左便右便、唔係我賜得、獨係我父預備賜過乜誰、就賜過佢呮。
十個門生聽聞、就怨恨個兩個兄弟。
耶穌叫佢哋嚟話、你知到異邦人嘅君王、主治佢哋、大臣管理佢哋。
你哋唔好噉樣、你哋之中、乜誰想做大嘅、就要做你哋嘅使喚人。
乜誰想做頭目嘅、必要做你哋奴僕呀。
好似人子嚟、唔係要人服事佢、實係佢服事人、而且捨自己生命、替眾人贖罪呀。○
出去耶利哥個陣時、群眾跟從佢、
有兩個盲眼人、坐倒路邊、聞得耶穌經過、就叫話、主呀、大闢嘅子孫、可憐我哋呀。
眾人執責佢哋、令佢咪出聲、佢越發大聲叫話、主呀大闢嘅子孫、可憐我哋呀。
耶穌歇住腳、叫佢哋嚟話、你想我共你做乜野呢。
佢哋話、主呀、想我對眼開番呀。耶穌憐憫佢、摩吓佢對眼、佢哋即時睇見、就跟從耶穌。