耶穌講完呢的咁多說話、對佢門生話、
過兩日係逾越節、你知到喇、人子將近被解、釘十字架咯。○
個陣時、眾祭司長、共埋百姓嘅長老、聚集喺大祭司長名叫該亞法嘅衙門。
大家商量、用詭計捉耶穌嚟殺、
但係佢哋話、唔好喺節期個時、怕百姓生亂。○
耶穌喺伯大尼痲瘋人西門嘅家。
有一個婦人嚟到、𢬿玉盒裝住至貴重嘅香油、當耶穌坐席之時、斟落佢頭。
門生睇見、就唔中意、話、使乜咁花費呢、
因為個的香油、可以賣得好多銀、𢬿嚟施捨窮人吖。
耶穌知到就對佢哋話、你為乜事攪擾個婦人呢、佢向我做一件好事呀。
因為個的窮人、常時同你哋喺處、但我唔係常時同你哋喺處。
佢倒呢的香油落我身處、係因我埋葬嚟做嘅。
我實在話你知、通天下唔論喺邊處、傳呢的福音都要講起呢個婦人所做嘅、嚟記念佢。○
個陣時、十二門生之中、有一個名叫加略人猶大、去見眾祭司長、
話你哋肯俾幾多銀過我、我𢬿佢嚟交過你哋、眾人就共佢約定銀三十員。
自個陣時、佢搵機會嚟交出耶穌。○
當除酵節第一日、佢門生嚟耶穌處、話、想我哋喺邊處、為你預備食逾越節嘅筵席呢。
佢話、你入城去到某人處對佢噉話、老師話、我嘅時候將近到咯、我共我門生喺你處做逾越節。
個的門生、依住耶穌所吩咐、嚟預備逾越節嘅筵席。○
將近夜、耶穌同埋十二門生坐倒席處。
眾人食開個時、耶穌話、我實在話你知、你哋之中、有一個噲賣我嘅。
門生就好閉翳、逐個問佢話、主呀、係我咩。
耶穌答話、共我擠手落碟嘅、個個就係賣我嘅咯。
人子將過世、係照聖經所指著佢嘅、但係賣人子個人有禍咯、個個人唔生出嚟重好。
賣耶穌嘅猶大問佢話、夫子、係我咩、耶穌話、你講得著咯。
佢哋食開個時、耶穌拈餅祝謝、就擘開俾過門生話拈嚟食喇、呢的係我嘅身呀。
又拈隻杯感謝、𢬿嚟俾過門生話、你哋大家飲喇。
因為呢的係我嘅血、即係新約嘅血、為眾人流出、致赦得罪嘅。
我話你知、自今以後、我唔再飲菩提樹所生嘅、等到個日、我同埋你喺我父嘅國、致飲新嘅咯。○
佢哋唱嘵詩、就出去橄欖山、
個陣時耶穌對佢哋話、今晚你哋眾人必見阻礙、因為聖經有話、我將打個牧人、個群羊就散嘥咯。
但係我復生之後、必先過你哋去到加利利。
彼得答佢話、眾人雖然見阻礙、我總唔見阻礙。
耶穌對佢話、我實在話你知、今晚雞未啼之前、你必定三次唔認我咯。
彼得對佢話、即使共你同埋死、我斷唔話唔認識你、大眾門生都係噉話。○
個陣時、耶穌同埋門生到一處地方、叫做客西馬尼、就對佢哋話、你哋坐倒呢處、等我去個處祈禱。
就帶住彼得、與及西比太兩個仔、好憂愁、好悲切。
於是對佢哋話、我心閉翳到死咯、你哋喺呢處等吓、同埋我儆醒喇。
就行前的、𡂈倒地處祈禱、話、我父呀、若係可以做得、就𢬿呢隻杯離開我、但唔係從我所想、實係從你所想呮
噉就番嚟門生處、見佢哋瞓著、就對彼得話、噉樣、你哋不能同我儆醒半個時辰咩。
儆醒呀、祈禱呀、免至入迷惑呀、你心果係情願、但身體軟弱咯。
第二次、再去祈禱、話、我父呀、若係呢隻杯不能離開我、我不得不飲、噉就你嘅旨旨意得成就咯。
再番嚟、見佢哋瞓著、因為佢眼倦呀。
又離開佢哋再去、第三次祈禱、亦係講番個的說話。
在後番嚟門生處、對佢哋話、如今可以瞓得安樂咯、時候近嚹、人子賣過罪人嘅手嚹。
起身喇、我哋去咯、賣我嘅人嚟近咯。○
佢講開個陣時、十二門生之中、一個猶大、同埋群眾、揸刀共棍、從眾祭司長共民間長老處嚟。
賣耶穌嘅、也曾俾個記號佢哋話、我所親嘴嘅、就係佢咯、你哋捉住佢囉。
就即刻到耶穌處話、夫子、平安就同佢親嘴。
耶穌對佢話、朋友呀、你嚟做乜呢、眾人就行前落手捉住耶穌。
同埋耶穌嘅、有一個人、伸手拔出把劍、斬大祭司長嘅僕、削甩個隻耳。
耶穌對佢話、入番你把劍落殼處喇、因為但凡使劍嘅、必因劍亡呀。
你估我唔求得我父、就為我使十二營有多嘅天使嚟咩。
若係噉樣、就聖經所話、呢的事是必有、點得應驗呢。○
當個陣時、耶穌對眾人話、你哋揸刀共棍、好似捉賊噉嚟捉我咩、我日日坐在殿處教誨、你哋唔捉我。
但係呢的做成嘥、致應驗先知書所冩嘅。個陣時、門生個個都離開佢走去。○
捉耶穌嘅、拉佢去到大祭司長該亞法處、個的讀書人共長老、已經喺個處聚集。
彼得離遠跟住耶穌、去到大祭司長處嘅院、行入裏頭、同差役坐、想睇吓到底點樣。
眾祭司長、與及全公會嘅人、搵假見證嚟告耶穌、想整死佢。
雖然好多做假見證嘅人嚟、亦唔搵得相合嘅。後來有兩個嚟話、
呢個人也曾話、我噲拆上帝嘅殿、三日內又起番。
個大祭司長就起身、對耶穌話、你冇得答咩、呢的人證你嘅、係乜野呢。
但係耶穌唔出聲、大祭司長對佢話、我要你對住永生嘅上帝嚟發誓、話過我哋知、你係上帝之子基督唔係。
耶穌答佢話、你講得著咯、但係我話你哋知、自此以後、你哋將見人子、坐倒大能者嘅右便、而且乘住天雲落嚟、
大祭司長就擘爛自己衣服話、佢已經褻凟咯、我哋重要搵乜野見證呢、你哋如今聽聞佢褻凟哩、你哋意思點樣呢。
佢哋答話、佢犯死罪咯。
眾人唾佢面、又俾拳頭打佢、亦有俾手摑佢嘅。
話基督呀、你係先知、試話我知吖、打你嘅係乜誰呢○
彼得坐倒院外頭、有一個妹仔嚟佢處話、你都也曾同埋加利利耶穌嘅。
但係佢在眾人面前唔認、話、我唔知你講乜野。
已經行出到門庭、又有一個妹仔見佢、對喺個處嘅人話、呢個平素都係同埋拿撒勒耶穌嘅。
佢誓願再唔認、話、我唔識個人。
歇一陣、旁邊企處嘅、行前對彼得話、你真係同佢一黨嘅咯、因你嘅土談、就顯出你喇。
彼得就咒詛起嚟、而且發誓話、我唔識個人呀、即時雞就啼。
彼得記起耶穌所講嘅、話、雞啼之先、你將三次唔認我、佢就行出去、哭得好深傷、