馬太福音 6 · 1882《馬太福音傳》（粵語聯合譯本修訂本，香港理工大學）

至緊咪喺人面前行善令人睇見、若係噉就唔得你天父嘅賞賜咯。

所以你施捨個時、咪吹響角喺你面前、好似偽善嘅人、喺會堂與及街巷所做、等人俾體面佢、我實在話你知、佢已經得倒佢嘅賞賜咯。

但係你施捨個時、咪俾左手知到右手所做。

令你施捨嘅事在暗中嚟做、你父就在暗中處鑒察、必定報答你。○

你祈禱個時、咪似偽善嘅人、因佢好企倒會堂、及大街嘅路口祈禱、令人睇見、我實在話你知、佢已經得倒佢嘅賞賜咯。

但你哋祈禱個時、入你密室之中、閂理門、祈禱你暗中嘅父、你父在暗中處鑒察、必定報答你。

你哋祈禱個時、說話咪贅累、好似異邦人噉樣、因為佢哋以為說話多、至得聽聞呀。

所以你哋唔好學佢哋、因為你未求佢之先、你父知到你需用嘅咯。

故此你哋祈禱、當要噉樣話、我哋嘅父在天、願你嘅名係聖。

你嘅國降臨、你嘅旨意得成就、在地好似在天一樣。

我哋需用嘅糧、今日賜我。

又免我哋嘅欠負、好似我哋免嘵人欠負我嘅。

咪引我哋入試惑、拯救我哋出罪惡、（因為國呀權呀榮呀皆係你有至到世世誠心所願）。

你哋若係免人哋嘅罪過、你天父都免你嘅罪過。

倘若你哋唔免人哋嘅罪過、你父亦唔免你嘅罪過。○

你哋禁食個時、咪似偽善嘅人、作憂愁樣子、因為佢變嘵面貌、令人睇見佢禁食、我實在話你知、佢已經得倒佢嘅賞賜咯。

惟係你禁食個時、搽你頭、洗你面、

至到你禁食唔現出過人見、但係現出過你暗中嘅父見、噉你父在暗中處鑒察、必定報答你。○

咪積埋財帛喺地上、即係蟲噲食、銹噲壞、與及盜賊可以開竉嚟偷個處。

但要為自己積埋財帛喺天上、冇蟲食、冇銹壞、與及盜賊唔開寵嚟偷個處。

因為你財帛所在、你心亦在個處呀。○

眼就係身嘅燈哩、你眼睛若係明、就你一身都光。

你眼睛若係矇、就你一身都暗、故此你嘅光若係暗、個的暗就好大咯。○

冇人能服事得兩個主人、因為佢必定憎呢個、愛個個、或睇重呢個、睇輕個個、你不能服事上帝、又服事財帛呀。

故此我話你哋知、你唔使憂慮你生命食乜野、或飲乜野、你身體著乜野、生命唔係貴重過食物咩、身體唔係貴重過衣服咩。

試睇吓天上嘅雀鳥吖、佢唔耕種、唔收割、唔積蓄上倉廩、你天父尚且養佢、你唔係貴重過雀鳥咩。

你哋乜誰因憂慮能長多一刻生命呢。

你使乜為衣服憂慮呢、試想吓荒野個的百合花、點樣生長、佢唔勞力、唔紡織。

但係我話你知、即使所羅門極榮華之時、佢所著、都唔似得呢的花一朶。

至於野外嘅草、今日尚在、明日就𢫕落爐、上帝尚且噉樣裝飾佢、何况你哋小信嘅人呢。

故此唔使憂慮話、我哋食乜野、或飲乜野、或著乜野、

因為呢的、都係異邦人所求嘅、惟係天父知到呢的野、都係你哋要用嘅。

但你哋先求上帝國、與及佢公義、噉佢必定將呢的另外俾過你咯。

故此咪為明日憂慮、因為明日嘅事、明日致憂慮、一日嘅勞苦、一日就夠咯。