耶穌喺個山落嚟、群眾跟從佢。
有個痲瘋嘅嚟拜佢、話、主、你若係肯、就能潔淨我咯。
耶穌伸手摩吓佢話、我肯、你得潔淨咯、佢嘅痳瘋即時潔淨。
耶穌就對佢話、至緊咪話過人知、但去俾自己過祭司睇、而且獻摩西所吩咐嘅禮物、俾過眾人做見證、○
耶穌入去迦百農時、有個百把總嚟求耶穌話。
主呀、我有個僕瘋癱、瞓倒屋裏、辛苦之極呀。
耶穌對佢話、我去醫佢喇。
百把總答話、主到我舍下、我唔敢當、但講一句說話、我僕必定好番。
因為我屬人權下、亦有兵屬我權下、吩咐呢個去就去、吩咐個個嚟就嚟、吩咐我僕做呢的佢就做。
耶穌聽見以為出奇、就對個的跟隨嘅話、我實在話你哋知、在以色列人之中、唔曾見過咁大信德呀。
我話你哋知、將來有好多人、從東方及西方嚟、共亞伯拉罕以撒雅各、同埋坐在天國呀。
但係個國嘅子民、就被趕出外便黑暗、喺個處、必定哀哭、及咬住牙齒咯。
耶穌對個百把總話、去囉、照你所信、事必做成咯、個時候佢僕就好番。○
耶穌嚟到彼得家中、見佢外母發熱病、瞓倒處。
就摩吓佢手、熱即退嘵、佢就起身嚟服事佢。
至到挨晚、有的帶好多俾鬼迷嘅嚟佢處、佢𢬿說話、就趕鬼去、而且醫好所有病人。
噉就應嘵先知以賽亞所講、話、佢承受我的軟弱、擔當我的病症。○
耶穌見群眾圍住自己、就吩咐過去對岸、
有一個讀書人嚟對佢話、老師呀、你唔論去邊處、我都跟從你。
耶穌對佢話、狐狸有穴、空中嘅雀鳥有巢、但人子連枕頭嘅地方都冇呀。
又有一個門生對佢話、主呀、容我先去葬我父親吖。
但耶穌對佢話、你跟從我、任從死人、葬佢嘅死人喇。○
耶穌落船、佢門生就跟從佢。
忽然在海上、打起大風颶、至到船都被浪遮蔽、但係耶穌瞓著曉。
門生埋去叫醒佢、話、主呀、救我哋喇、我哋死咯。
耶穌對佢哋話、小信嘅人呀、你哋使乜咁慌呢、就起身、喝個的風共海、於是大平靜。
個的人見出奇、就話、呢個係乜野人呢、風共海、亦順從佢呀。○
已經到個便岸、到加大拉嘅地方、有兩個俾鬼迷嘅人、甚兇猛、至到冇人行得過個條路嘅、佢喺墳墓出嚟、遇著耶穌。
忽然喓話、上帝之子呀、我哋與你何干呢、期未到、你嚟呢處難為我哋咩。
共佢哋隔好遠、有一大隊豬食緊野、
個的鬼就求佢話、倘若要趕我哋、就打發我入個隊豬處。
耶穌對佢哋話、去囉、個的鬼就離開、入去豬處、忽然間成隊走落山坡、投海死在水中。
看豬嘅人、走番入城、就𢬿所有事情、與及俾鬼害嘅情由嚟講。
通城嘅人出嚟、遇著耶穌、見佢、就求離開佢哋嘅境界。