耶穌噉就落船、過嘵海、番歸自己個城。有人擡一個瘋癱嘅、瞓倒床、嚟到佢處。
耶穌見佢哋咁深信、對瘋癱嘅話、小子呀、放心囉、你嘅罪得赦咯。
誰知讀書人中、有幾個心內話、呢個人、係褻凟呀。
耶穌知到佢意思、話、你哋因何心中懷惡念呢。
話你嘅罪得救、抑或話你起身行、邊樣易呢。
但係令你哋知到、人子喺地上、有赦罪嘅權柄。就對個瘋癱人話、起身、拈你個張床去歸。
佢就起身番去屋𨀣。
眾人睇見、驚奇起嚟、就歸榮上帝、𢬿噉樣嘅權柄賜過人呀。○
耶穌喺個處前去、睇見一個人、名叫做馬太、坐在稅關、耶穌對佢話、跟從我、佢就起身、跟從。
耶穌喺佢屋裏坐席、有好多收稅嘅、共有罪嘅人、連埋耶穌、及佢門生同席。
法利賽人睇見、對佢門生話、你老師因何共收稅嘅、及罪人同食呢。
耶穌聞得、就話、壯健嘅、唔使要醫生、惟係有病嘅致要呮。
但你哋去學我愛矜恤、唔愛祭祀個句、係乜野意思呢、因為我嚟、唔係叫義人悔改、係叫罪人悔改呮。○
個陣時、約翰嘅門生嚟耶穌處話、我哋共法利賽人常時禁食、做乜你門生唔禁食呢。
耶穌對佢哋話、新郎重喺處、賀新郎嘅、豈有悲哀咩、惟係將來新郎離別佢哋去嘵、個陣時、就必禁食咯。
冇人𢬿新布嚟補舊衣服、因為補落去、反擘爛個件衣服、致令破綻重關係。
冇人將新酒載落舊皮袋、怕個皮袋裂爛、酒漏出嚟、皮袋亦壞嘵、但係新酒必載落新皮袋、噉就兩樣都保全咯。○
耶穌對佢哋講緊個時、有一個官嚟拜佢話、我女如今死嘵、但係你嚟俾手按吓佢身上、就必定生咯。
耶穌就起身跟住佢、門生都係。
有個女人、有血漏十二年咁耐、嚟到佢後便、摩佢嘅衫邊。
因為佢心裏話、我但摩吓佢衫、就必定得好。
耶穌回頭見佢話、女呀、你放心、你嘅信德已經救你咯、女人從個時候就好番嘥。
耶穌入到個官嘅家中、睇見有的吹簫嘅、與及眾人嘈雜。
就話、行開喇、女仔唔係死、不過瞓著呮、眾人笑佢、
已經使眾人出去、就入去、執住佢手、個女仔即時起身。
於是呢件事嘅風聲、周圍傳開個處咯。○
耶穌由個處前去、有兩個盲眼人跟住佢、喓話、大闢嘅子孫、可憐我哋呀。
佢入嘵屋、個的盲眼人嚟到佢處。耶穌對佢哋話、你信我做得呢的事唔信呢。佢哋話、主、係咯。
耶穌就摩吓佢眼、話、照依你哋嘅信德、你嘅事必做成咯。
佢的眼就開番、耶穌嚴戒佢哋話、你小心咪俾人知到。
佢哋出、去、周圍喺個處、傳揚佢嘅名聲。○
當佢哋出去個陣、有帶一個啞人、係俾鬼迷嘅、嚟到佢處。
耶穌將鬼趕出、啞嘅就講、眾人以為出奇、話、以色列個處、未曾見噉樣嘅呀。
但係個的法利賽人話、佢倚賴鬼王嚟趕鬼呮。○
耶穌周圍去各城各鄉、在佢哋會堂教誨、傳講天國福音、醫各樣疾病。
睇見眾人、就可憐佢、因為個的人困苦流離、好似羊冇牧人呀。
噉就對佢門生話、要收割係多、但工人少。
所以你要求田主、打發工人、去佢收割個處呀。