上帝子耶穌基督、福音嘅起首。
照先知以賽亞書所載話、我打發我嘅使者、在你面前、預備你嘅路。
喺曠野有人聲呼叫話、預備主嘅大路、整直佢嘅小路。
約翰喺曠野施洗、宣傳悔改嘅洗禮致罪得赦。
通猶太地方、與及耶路撒冷嘅人、都出去佢處、俱認自己罪、喺約但河、受約翰施洗。
約翰著駱駝毛嘅衫、腰朿皮帶、所食嘅係蝗虫野蜜。
佢傳道話、有一個後過我嚟嘅、佢能力勝過我、我屈身解佢鞋帶都唔相稱。
我用水嚟施洗你哋、但佢將用聖神施洗你哋嘅。○
當時耶穌自加利利嘅拿撒勒嚟、喺約但河、受約翰施洗。
喺水番上嚟、佢就見天開、有聖神好似白鴿、降臨佢身上。
又自天有聲話、你係我嘅愛子、我所歡喜嘅。○
聖神即時催耶穌去曠野、
佢喺曠野四十日、受撒但試惑、共野獸同住、又有天使嚟服事佢。○
約翰坐監之後耶穌嚟到加利利傳講上帝嘅福音噉話、
日期滿咯、上帝國近咯、你哋應該悔改信福音。○
耶穌行遊加利利海邊、睇見西門、共佢嘅兄弟安得烈、撒網落海、因佢哋係攞魚嘅人。
耶穌對佢哋話、跟從我、我將令你哋攞人、好似攞魚一樣。
佢哋即時丟棄個張網、跟從耶穌。
喺個處行冇遠、又見西比太嘅仔雅各、及佢兄弟約翰、喺船上補網。
耶穌即時叫佢哋、佢就離別父親西比太與及工人在船上、跟耶穌去。○
大眾嚟到迦百農、適値安息日、耶穌入會堂教人。
眾人驚奇佢嘅教訓、因佢教人、好似有權柄嘅噉、唔似個的讀書人。
適値會堂有個人、被邪鬼迷嘅、大聲叫話、
拿撒勒人耶穌、我與你何干呢、你嚟想敗壞我哋咩、我知你係乜誰、乃係上帝嘅聖者。
耶穌責佢話、咪出聲、離開佢出去喇。
邪鬼就使個人縮攣、大叫一聲離開佢出去。
眾人見好出奇、大家相問話、呢的係乜門呢係新教訓咯、佢𢬿權柄吩咐邪鬼、邪鬼就依從佢咯。
噉就耶穌嘅名聲、即時傳勻加利利嘅四方、○
佢哋既出會堂、耶穌共雅各約翰、入西門安得烈嘅家、
西門嘅外母有發熱病、瞓倒床處、就有人話耶穌知。
耶穌行前、執住佢手拉起佢、熱即退、個女人就服事佢哋。
到挨晚熱頭落之時、眾人帶住凡有病嘅、被鬼所迷嘅、嚟到耶穌處。
噉就通城嘅人、聚集門前。
耶穌醫好好多病人、係有各樣症嘅、及趕好多鬼、因為個的鬼識佢、故此耶穌唔俾佢出聲。○
到第朝、天色尚黑、耶穌早早起身、出去曠野地方祈禱。
西門共同伴嘅人追尋佢。
遇著、就對佢話、眾人都搵你呀。
耶穌對佢哋話、我哋應該去別處、到附近鄉村、等我喺個處傳道、因我嚟係為呢樣事呀。
噉就耶穌喺加利利各處會堂、傳道逐鬼。○
有個痳瘋嘅人、嚟求耶穌、跪處對佢話、你若係肯、就能潔淨我咯。
耶穌憐憫佢、就伸手摩吓佢、又話、我肯、你得潔淨咯。
個人嘅麻瘋即時甩嘵、全身潔淨。
耶穌嚴禁佢、即時使佢去、又對佢話、
你至緊唔好講過人知、但去俾過祭司睇、因為你得潔淨、要依摩西嘅吩咐、嚟獻禮物、俾過眾人做見證。
但佢出去、就講好多說話、傳開呢的事、故此耶穌唔得顯然入城、單喺野外居住、四方嘅人、嚟親就佢。